1 SAMUEL 23 - Cho Bible Common Language 2016

David naw Keilah Gawnu Cu Gung ci

¹ Philistin gui naw Keilah gawnu tu u ne, ami khäm thai ah ami htang gui ami m’guk cu David naw ng’ya neta,

² “Hteit ne, Philistin gui ka tu gui vai ang?” cine Bawipa cu ng’shi ci. Bawipa naw, “Ä, ngami tu gui ne, keilah cu gung ä” cik ci.

³ David ah ak chang gui naw ani am, “Mikmi shin ah Judah ung kyikyawk ne mi om ci, mikmi keilah ah hteit ne, Philstin gui mi tuk gui ung mikmi ung ka pi khai nei!”

⁴ Cun ah kyasei David naw Bawipa ng’shi ba ci, Bawipa naw ani am, “Hteit ne keilah na tuk vai, Philistin gui ah khan ah näng nak vai kei naw ka ning pek khai” cik ci.

⁵ Cun ah kyasei David la a chang gui cu keilah ah hteit ne Philistin gui cu tu gui ci gui; ngami naw akda ngawn gui u ne, ami vuhchah phi lak ci gui. Cun cu David naw gawnu a gun ah mawng ah kyak ci.

⁶ Ahimelek ah hta Abiatha cu phyawng ne, keilah ah David cu ang dawn tu yah ung, ani naw shawi cu hteh püi ci.

⁷ David keilah ah a hteh ah mawng cu Saul am m’thein ci gui. Ani naw, “Khanpughi naw ani cu kei ah huham kyong ah tha ci nei. Akhäng ah m’kawt pyang ne, k’pang ah gawnu ung hteit ciah David cu amät naw amät pha pyi ci nei,” cik ci.

⁸ Cun ah kyasei Saul naw a gakap gui cu ng’tuk vai ah khü gui ci, keilah hnu ng’tuk püi ne David la a chang gui khaai gui vai ah hteit ci gui.

⁹ Saul naw tu lawk khai ah apawng ah mawng cu David naw ng’ya neta, ani naw taigüpa Abiatha am, “Shawi sha law püi ä” cik ci.

¹⁰ Cun kawn ah David naw, “Bawipa, Israel ah Khanpughi, Na changshäm kei ana ci nak hlü awn, Saul naw law ne keilah m’di khai ah pawng ci, cicu kei naw ka ng’yak ci nei.

¹¹ Keilah chang gui naw kei cu Saul ah kut ung ami na ap vai ang? Ka ng’yak ah mäih ah Saul cu akcang ah lawk khai ang? Bawipa, Israel Khanpughi, na na m’shan vai ah ka ning ng’zawi ci nei!” cik ci. Bawipa naw, “Saulu cu lawk khai nei!” cik ci.

¹² David naw ng’shi ba ci, “Keilah chang gui naw kei la ka chang gui cu Saul ah kut ung na ap khai gui ang?” Bawipa naw, “Ning ap khai gui nei” cik ci.

¹³ David la a chang gui phia chuk cu, keilah ang ghitah naw u ne, a hei ah ng’nawn ci gui. Keilah ungka David ni ami dawng cu Saul naw ng’ya neta, a pawng püi cu m’lung si ci.

Ng’yung Bung ah David

¹⁴ David cu khaw ng’yung bung ah ng’thup ne om ci, cun cu ziph ah pei bungpuk ah kyak ci. Saul naw ani a hmuh vai ah angtäi sei k’tha nak ci, cun ung phi Khanpughi naw David cu ani ah kut ung kä ap ci.

¹⁵ Saul naw ani ngawn khai ah a law cu David naw hmuk ci. David cu ziph bungpuk pei Horesh ung om ci.

¹⁶ Jonathan cu a cu ah hteit neta, Khanpughi ah ngäng m’htei nak ah mawng a ngaih gep vai ah k’thamah nak pek ci.

¹⁷ Ani naw a pyen nak cu, “Kä na kyih vai, kapa Saul naw kä ning hnim hlawt khai. Nang cu Israel ghangpughang ah na kya lawk khai, cun kei naw ka ning tawi lawk khai cicu ani naw ang khai ah hmat ci.

¹⁸ Ngani cu ani ng’lak ung theing ciah shaitak bi ne ng’khawt ci goi. David cu Horesh ung om sei, Jonathan cu a im ah hteit ba ci.

¹⁹ Ziph ah ka chang amshah gui cu Gibeah ah Saul ah om nak ah hteit u neta, David cu Hachilah m’htung Horesh bung ah ng’thup ci nei, cun cu Judean khaw bung ah a htumtäng ah om ci.

²⁰ Kami Bawi, nang naw a i hlawk ah na pha hlü cu kami hmat ci nei; keimi ah kami khaw ah law ä, nang naw na pha hning vai ah kami bik khai nei” cik ci gui.

²¹ Saul naw, “Kei nami na m’hni aih ah phäh ah Bawipa naw hriham ning pe gui sä!

²² Hteit ne ng’hteicha khai ah ci ba vä. Ani a hawi a om ah, acu ah a u naw a hmuh ah va teng ba vä. Ani anghtei ah theileh ciah ka ng’yak ci nei.

²³ Ani ang thuh nak ah hmun cu ang kheing ah nami teng vai. Cun ung ka, ang düng ah law ba ne, a mawng nami na m’thein law ba vai. Cun kawn ah nangmi awn a täng ah ka hteit tuk khai, cun ah khaw ung ani om lä ciah a kyak ung, ani ka züh khai, Judah khaw avan ung ka shui khai,” cik ci.

²⁴ Cun ah kyasei ngami cu ng’düi law ne, Saul ah ma ang ci gui. David la a chang gui cu Judean khaw hmun a htum täng, Moan khaw bung ng’bäng ciah khaw nawi ung om ci gui.

²⁵ Saul la a chang gui naw David shui vai ah hteit ci gui, cun ung phi ani naw cun ah mawng ng’ya neta, Maon bung, lungsong m’htung ah hteit ne om ci. Saul naw a cun ng’ya neta, David ah a hnu ah k’täm ci.

²⁶ Saul la a chang gui cu khomhtng ah vangtäng ah om ci gui, ngami awn ng’lakmah ne David la achang gui cu vangtäng ah om ci gui. Ngami cu Saul la a chang gui ang ghit ah dawng ta ne dawng ci gui, ngami cu ng’et law u ne, pha law gui khai ah kya sei.

²⁷ Cun ah ng’lak ung thupyenei tumat gawk law ne Saul am, “Ang ghit ah law ba ä, Philistin gui naw mi khaw tu lawk ci gui nei!” cik ci.

²⁸ Cun ah kyasei Saul naw David a gawt cu ng’düm ne, Philistin gui tuk khai ah hteit ba ci. Cun ah kyasei cun ah hmun cu “Ng’pai nak a m’htung ah ami pyen ah kyak ci.

²⁹ David cu cun ung ka hteit ne, Engedi khaw ung ng’thup ne om ci.