1 SAMUEL 22 - Cho Bible Common Language 2016

Taigüpa Gui Ami Ngawn Gui

¹ David cu mang gaw kath ung ka hteit ne, Adullam gawnupei ah khui ung gawk ci. A phäi nau gui la k’pawih shüt ciah akyong chang gui naw ani cei ah a om cu ng’ya u neta, hmu teng lawk ci gui.

² Ami yawshe nak gui, apu da ci gui, la kä yum ci gui cu ani ah lawk ci gui, avan cu chang phia phli lawk ci gui, ani cu ami ng’vai pi ah kya lawk ci.

³ David cu a cun ungka naw Moab khaw Mizpah ah hteit ne, Moab ghangpughang ah ma ah, “Na bä ni, Khanpughi naw kei ah phäh ah a i abi law kä ka hmuh pha a chuih kanu la kapa cu law ne nang awn a täng ah om tu ni sä,” cik ci.

⁴ Cun ah kyasei David naw anu pa gui cu Moab ghangpughang ah nawng shüt gui sei, David khui ung ang thuh ah chuih aca om tuk ci gui.

⁵ Cun kawn ah prophet Gad cu David ah law neta, a pyen cu, “Shin ung kä om tu vä, Judah khaw ah tuhbäi hteit ba vä” cik ci. Cun ah kyasei David cu Hereth bung ah hteit ci.

⁶ Hnüüp ät ung Saul cu Gibeah khaw, ng’yung ah m’dum ghing ka ah ngoh ci, ani cu k’htei kawt sei, a bawi gui naw veing ne ng’düi ci gui. David la ak chang gui kami hmuk ci nei, cine m’thein law u khäta,

⁷ ani naw a bawi gui am, “Ngai vä, Benjamin chang gui! David naw lai gui la sapyit lo gui nami van am ning pe gui ne, a ga kap ung bawi ah ning pyang gui khai ah nami ngai ne ma?

⁸ Cun ah kyasei nangmi naw nami na hnu ng’tuk püi ciah kä kya ne ma? Ka mät ah hta naw David awn ng’gei nak abi ah mawng a u naw phi kä na mi na m’thein ci. A u phi kei ah kä nami ng’ä ci. Ka mät ah chang, David naw kei a na ngawn nak vai ah khin ashui ah manwg la, ka hta naw a hnün thawh püi ah mawng cu a u naw phi kä nami na m’thein ci!” cik ci.

⁹ Doeg cu Saul ah bawi gui awn a täng ah ng’düi u neta, “Nob ah Ahitub ah hta Ahimelek ah a hteh yah ung David cu ka hmuk ci.

¹⁰ David naw a i abi vai ah mawng cu Ahimelek naw Bawipa ng’shi thäh ci, cun kawn ah David am ei m’bei ne, Philistin Koliath ah khim cu pek ci,” cik ci.

¹¹ Saul ghangpughang naw taigüpa Ahimelek la amätyah gui ami van cu khü gui ci, ngami ami van cu Nob ah taigüpa gui ah kyak ci gui. Ngami gawk law u khäta,

¹² Saul naw Ahimelek am, “Ngai ä, Ahimelek!” cik ci. Ani naw, “Ka ngai ci nei” cik ci.

¹³ Saul naw ng’shi ne, A i ah kyasei nang la David naw nani na hnu ng’tuk püi ang? A i ah kyasei ani am, ei vai ni, khim ni pe ne, Khanpughi ung na ng’ge pek ang? Tuhbäi ani ng’hlat ne kei na hnu ng’tuk püi ne, kei ana ngawn nak vai ah akhin cu ngäng ci nei!” pyen nak ci.

¹⁴ Ahimelek naw, “David cu nang ung bekhüt pi k’bäih ciah bawi ah kyak ci nei! Ani cu na kawi, nang ning ngäng ciah gabawi, mang im ung chang päng naw aktung ah ani chang m’sui ah kyak ci nei.

¹⁵ Ä, Khanpughi ka ng’ge pai püi ci nei, cun cu ak htük bäih ah kä kyak ci. Ning hnu ng’tuk püi ciah a mawng kei phi, ka kyong ung a u phi kä na k’bün nen gui ä Bawimang. Shin ah mawng a i phi kei naw kä ka hmat ci nei!”

¹⁶ Ghangpughang naw, “Ahimelek, nang la na mätyah gui avan nami sik khai,” cik ci.

¹⁷ Ani naw a pei ah ng’düi ci gui ah ngäng ci gui am, “Bawipa ah taigüpa gui ngawn gui vä! Ngami cu David awn ng’ge na u ne, ani adawng ah mawng cu avan hmat lang u ne kä na m’thein ci gui.” Cun ung phi Bawipa ah taigüpa ah taigüpa gui ngawn vai ah ami kut ami chan vai ah gakap gui cu mak ci gui.

¹⁸ Cun ah kyasei Saul naw Doeg am, “Nang naw ngawn gui ä! ci sei, Doeg naw ami van ngawn gui ci. Cun ah hnüüp ung ani naw shawiphaw kawt hning ciah taigüpa chei-kip-lei-hma cu ngawn gui ci.

¹⁹ Cun kawn ah Saul naw, Nob, taigü gui ah mang gaw ung om ci gui avan ngawn sak gui ci: Pami gui, hnumi gui, hmaw gui, hmaw hta gui, sei gui, la gui, htome gui avan ngawn sak gui ci.

²⁰ Cun ung phi Ahimelek ah hta tumat Abiatha cu phyawng ne, hteit ne David ung ng’dawn tuk ci.

²¹ Bawipa ah taigüpa gui Saul naw a ngawn gui yawp ah mawng cu ani naw m’thein tuk ci.

²² David naw ani am, “Cu hnüüp ung kei naw Doeg cu ca ka hmuk ci, ani naw Saul am m’thein ba ge khai ah ka hmat ci. Na mätyah gui ami van ami sih nak ah mawng cu kei naw ka ma nak vai ah kyak ci nei.

²³ Kei awn a täng ah na om tu vai, kä na kyih vai, Saul naw nang la kei cu na ngawn hlü goi ci, cun ung phi nang cu kei awn a täng ah na phyawng khai,” cik ci.