1 SAMUEL 21 - Cho Bible Common Language 2016

Saul ung ka David Dawng ci

¹ David cu Nob ah taigüpa Ahimelek ah hteit ci. Ahimelek naw lut law ne cäi ne ng’hlet ne hmu neta, “A i ah kyasei shi ah namät bäng na law ang?” cine ng’shik ci.

² David naw, “Kei, shin ung ghangpughang ah bi awn ka lawk ci. Ani naw na m’cäi ne, kei am ana bi sak ah mawng cu a u am kä hmat sak vai ah pyen ci. Ka chang gui cu, hmun tumat ung ami na hmuh law vai ah ka m’cäi gui ci.

³ Tuhbäi, nang ung a i ang a om? M’htut pum hma la nang ung om cicu na pe ä” cik ci.

⁴ Taigüpa naw, “M’htut düt kei ung kä om ci, m’htut theing bäng va om ci; na chang gui tuhbäi ng’yaw pawm nak kä om ciah a kyak ung nami ei hning ci” cik ci.

⁵ “Ä, a u awn kä ng’yaw ci gui nei” cine David naw m’hlan ci. Bi düt bi vai kami hteh pang ung phi ka chang gui cu ak phiit ah ami mät theing cim ne om ci gui; kei mi ak tung ah bi kami bik ci, ka chang gui a i güt theing khai gui ang?”

⁶ Cun ah kyasei taigüpa naw David am, Theing ciah m’htut cu pek ci, a i ah kyasei ci ung ani ung Khanpughi am douthak ah m’htut gui bäng om ci, cun cu theing ciah tawnglang ung ka m’htut ak thai awn m’thawng ba ne ami lak ba ah kyak ci.

⁷ (Saul ah sei shäm ci; Doeg, Edom ah ka cu, a cu hnüüp a cu ah om tuk ci, a i ah kyasei ci ung ani naw yum nak ung abi vai om ci.)

⁸ David naw, Ahimelek am, “Nang ung k’htei, kä cung khim, kei am na na pek hning vai om ne ang? Ghangpughang ah thu k’bäi awn ang ghit ah ka ng’düi lawk ci kya neta, ka khim la li k’htei gui ka la vai akhin kä ka gah ci nei” cik ci.

⁹ Ahimelek naw, “Kei ung Philistin Koliath, Elah khaw nawi ung na ngawn ah khim om ci nei; cun cu shawiphaw ah hnu ah k’pyon awn hlawp ah kyak ci. Na ng’ya hlü ung, la ä shin ung li khim cun bäng om ci,” cik ci: David naw, “Kei am na pe ä, cun kawn ah ni ba pi ciah khim a hawi kä om khai nei!”

¹⁰ Cun ah kyasei, David cu Saul ung ka ng’düi law ne hteit ne Kath ghangpughang Achish ah hteit ci.

¹¹ Ghangpughang ah a bawi naw Achish am, “Shin ma David, a khaw ung ghangpughang ah kyak ci? Hnumi gui naw ng’äi m’cu ne ami ng’lam ung, “Saul naw phia gha ngawn ci, cun ung phi David naw phi gha ah a gha ngawn ci” ami cicu shin ah chang ah mawng nei.

¹² Ngami ah ng’thu naw David ung akthuuk cu dang sak ci, ani naw ghangpughang Achish cu kyih lawk ci.

¹³ Cun ah kyasei ngami ami ng’pat law phung ung, ngami naw ami m’kat law hlü phung ung David cu gu hlük ciah mäih, akgu ah mäih ah om ci; ani cu mang gaw m’kawt ung chüt shüi shüi ne, am gawngmu ung am’shi shoi ci.

¹⁴ Achish naw ak chang bawi gui am, “Teng vä, shin gu ci nei! A i ah kyasei kei ah nami law püi ang?” pyen na gui ci.

¹⁵ Kei ung ak gu om pyi ciah kä kya ne ma? Ka im ah shin ung, agu su ah na tüihtok khai ah a i ah kyasei, a hei mä nami law püi ang?” cik ci.