1 SAMUEL 20 - Cho Bible Common Language 2016Jonathan naw David M’hteihtang ci 1 Cun kawn ah David cu Naioth, Ramah ungka naw Jonathan ah hteit neta, “A i ang kei naw ka bi? A i hma katnak ang kei naw ka bi? Kei a na ngawn hlü nak vai ah, a i hma nak ang na pa ah khan ah kei naw ka bi?” cine ng’shik ci. 2 Jonathan naw, “Khanpughi naw nang na sih vai cu ma nak ci! Kapa naw abi päng vai küikyang ci phi na m’thein ci, shin ah mawng ani naw kä na m’zih khai, cun cu kä hman ci nei!” 3 Cun ung phi David naw, “Nang naw kei a i hlawk ah na na m’hni cu na pa naw hmat ci, a bi vai a pawng püi cu kä na hmat tu vai ah ani naw k’bäi ci nei, a i ah kyasei ci ung nang ang htei ah na thüi khai kiasei. Ghing ciah Bawipa ung ng’tam ne ka ning pyen nak cu, kei sih nak ung ka gawk vai m’khan ät bäng nei hlü ba ci!” 4 Jonathan naw, “Na ng’yak hlü päng ka bik khai nei” cik ci. 5 David naw, “Ngawi ung cu cha thai pawi ah kyak ci, kei cu ghangpughang awn a täng ah ka ni ei khai kyak ci. Cun gui cu nang ung hman ciah a kyak ung, kei cu hteit ne, cituh hnüüp mühun güt bung ah ka ng’thup khai. 6 Kei tawnglang ung kä ka ngoh tu cu na pa naw a hmat ah a kyak ung, na m’thein vai, nang ah ma ah pyen neta Bethlehem im ah ang ghit ah hteit ba ci, acu ah ka kyong khui avan naw kum ng’län khawihnah nak ah khin ah kyak ci. 7 Ani naw, “Bä khai, a ci ung ka phyawng khai; cun ung phi ani am lung she ah a kyak ung, na cik khai ah k’bäi ciah na hmat khai. 8 Kei ah phäh ah shin na na bi pek vai, kei ung na bi ah theingthap ciah shaitak cu na pan vai. Cun ung phi ka katnak a om ung na mät naw na ngawn ä! A i ah kyasei na pa naw ana ngawn vai ah na na hteh püi vai ang?” cik ci. 9 “Cun ah mäih cu kä na ngaih-tüh vai! Kapa naw ning hnim khai ah a pawng ka hmat ung kei naw kä ning m’thein ah ka om khai ma?” cine Jonathan naw pyen ci. 10 Cun kawn ah David naw, “Napa naw m’lungshe ne a ning m’shan ung a u naw kei am na m’thein ba khai ang?” cik ci. 11 Jonathan naw, “Loma ah ni hteit khai” ci sei htei ci goi, 12 Jonathan naw David am, “Bawipa Israel gui ah Khanpughi cu nikni ah saksi ah kya sä! Ashin ah khin ung, ngawi ung la lawk ciah khaw hnüüp gui ung kapa cu ka ng’shik khai nei. Nang ung a om nik ciah a kyak ung thu ka ning m’khäh lawk khai nei. 13 Ani naw nang ning hnim vai ah abi cu nang naw na phyawn nak vai ah kä ka ning m’thein ah a kyak ung, Bawipa naw kei cu na sih sak sä. Bawipa naw ka pa a om püi man ah mäih ah nang cu ning om püi sä. 14 Kei ka ghin nei ah a kyak ung, theing ciah na shaitak cu nak bä vai, kei ung na hläkhäm vai; cun ung phi kei ka sih ah a kyak ung, 15 acun ah mäih ah hläkhäm nak cu angtäi sei ka kyong khui ung na m’dang vai nei. Bawipa naw mi ga gui avan cu am di yawp ah a kyak ung, 16 Tumat la tumat shai mi tak cu kä hnget khai nei. Cun cu a hnget ah a kyak ung, Bawipa naw ning m’kyuk gui khai” cik ci. 17 Jonathan naw David cu m’hni ne shaitak nak bi ci. Jonathan naw David cu amät am’hni ah mäih ah m’hni ci. 18 Cun kawn ah Jonathan naw ani am, “Ngawi ung cu cha thai pawi ah kyak ci, nang cu ei ei nak ung kä na om tu ah a kyak ung, nang kä na om cu hmat lawk khai. 19 Cituh ung mä ta nang kä na om cu hmat lawk khai; cun ah kyasei zan ung na ng’thuh nak ah na hteh ba vai, lung gui ng’bum ciah hnu ah na ng’thuh vai. 20 Kei naw ka bong khäh nak ah m’la thek thum cu ka kap lawk khai. 21 Kei naw ka changshäm am hteit ne shui ba ä, ka cik khai, kei naw, “Teng ä, m’la gui cu na pei ah om ci; la ba ä, ka ci ung, nang cu na phyawng ci, na law ba hning ci, ka ciah kyak khai. Kei naw ghing ciah Bawipa ung akcang ah ka pyen cu, nang cu kyi ng’ä nak kä om khai. 22 Cun ung phi, “M’la gui cu a hei ah nei ami om” cine ka kyak nak ung, na hteh vai, Bawipa naw a hei ah ning tüi ciah kyak khai. 23 Tumat la tumat shaitak ni bi cu, angtäi sei mi k’pan vai ah Bawipa naw akcang ah bik khai nei.” 24 Cun ah kyasei David cu k’pyama ah ng’thup ci. Cha Thai pawi ung, ghangpughang Saul cu ei ei nak ah lawk ci, 25 pang pei ah a ngoh nak man ung ngok ci. Ani tawi ne Abner ngok ci, Jonathan cu hmai chum ne, ngok ci. David ah ngoh nak cu a ghawng ah kyak ci, 26 Cun ung phi cu hnüüp Saul naw a i phi kä pyen ci, a i ah kyasei ci ung, ani a i ah baw kya hman mäih ci, cine ngai ci, cun ung phi ani cu kä ci ng’ciim ci. 27 A cu hnüüp, a cituh cha thai pawi vai ung, David ah ngoh nak cu ghawng lä ci, cun ung Saul naw Jonathan am, “A i ah kyasei David, yanta la tuh ngawi ei ei nak ung kä a law ang?” cik ci. 28 Jonathan naw, “Bethlehem ah hteh ba sak vai ah ani naw ng’zawi lawk ci nei. 29 Ani naw, “Na bä ni, na hteh ba sak ä, a i ah kyasei ci ung kami kyong khui naw khawihnah nak ei pawi gaw nu ah bik ci gui, ka phäi naw a cu ah ka om tu vai ah na k’bäi ci. Cun ah kyasei, nang cu ka teihpüi ah na kyak ung, na hteh sak ne, ka mätyah gui cu na hmuh sak ä’ cik ci. Cun ah kyasei nang ah tawnglang a ngoh nak ung kä ah om ah kyak ci.” 30 Saul cu Jonathan ah khan ah m’lungshe neta, “Nang ah nu cu hnu ng’tuk ne, kä be khüt ci nei! Tuhbäi ka hmat pyi ci, nang cu David täng ah na kyak ci, na nu ah ning hta ah kya ne, na mät kä na yei ci! 31 Nang naw kä na hmat ci ma, David a ghin ah chuih nang cu shin ah khaw ah ghangpughang ah kä na kya hlawt khai? Tuhbäi hteit ne, shin ung law püi ä ani cu sik khai!” 32 Jonathan naw, “Ani a i ah kyasei a sih vai ang, Ani naw a i ang a bi” cik ci. 33 A cun ung, Saul naw Jonathan cu ngawn khai ah k’htei awn vawi ci, cun ah kyasei apa naw David ngawn vai ah ak bäi cu Jonathan naw hmat ci. 34 Jonathan cu Tawnglang ung ka nget ne ng’düi law ba ci, a i phi kä ei tuk ci, cun cu cha Thai pawi a hnüüp goi nak ah kyak ci. Ani cu David ah phäh ah ang htei ah cümbawng ci, a i ah kyasei ci ung Saul naw a yawshe nak ah phäh ah kyak ci. 35 A cu hnüüp khaw ngawi Jonathan naw ani pyen te ah mäih ah David hmuk khai ah k’pya ah hteit ci. Ani naw ak hmaw khah püi ci, 36 Acun am, “Ka kah law ah a kyak ung m’la cu dawng ne, na shui ba vai,” cik ci. Ak hmaw dawng sei, Jonathan naw m’la ama ah kap ci. 37 M’la ah va kyak nak ah ak hmaw va gawk khäta, Jonathan naw hei m’lau ci, “M’la cu yong ei ci nei, 38 Cän ung kä ng’düi ä! Ang ghit ah law ba ä! Ak hmaw naw m’la cu kaw ne, a bawi ah om nak ah law ba ci, 39 ani naw a i a pyen cu kä hmat ci, Jonathan la David bäng naw hmat ci goi. 40 Jonathan naw ali htei gui cu ak hmaw am pe neta, pigaw ah a hteh püi ba vai ah m’cäi ci. 41 Ak hmaw a hteh ba kawn ah, David cu lung pum gui ah hnu ung ka tho law ba ne, m’khukdong ne, m’dek ung thum vei kawp ne khawihnah ci. Ani ni hnih cu kyap ni ne, ng’ui tuk ci goi; David ah thüi cu Jonathan ah ta tä pi ci. 42 Cun kawn ah Jonathan naw David am, “Khanpughi naw ning om püi sä. Nik ni naw ni bi ah theing ciah shaitak cu, nang la kei la, nang ah hta ng’shon la kei naw ng’hteicha sak khai nei,” cik ci. Cun kawn ah David hteit sei, Jonathan cu pigaw ah hteit ba ci. |
Cho Bible Common Language © Bible Society of Myanmar, 2016.
Bible Society of Myanmar