1 SAMUEL 2 - Cho Bible Common Language 2016

Hannah ah Taigü

¹ Hannah taigü ci; “Bawipa naw ka m’lung cu yei nak awn be sak ci; Ani ah bi ah phäh ah ka yeikyai aih ci nei! Ka gaa gui cu ka gaih tu gui ci; Ka yei aih ci nei, Khanpughi naw na m’htei sei!

² “Bawipa ah mäih ah theingcim ci, a u kä om ci nei, Mi Khanpughi ah mäih ah shungvong ci, a u kä om ci.

³ M’lau ne na längtang nak cu ng’düm ä; Na khähghah nak ah ng’thu cu m’dim ä. Bawipa cu hmuhmat ciah Khanpughi nei, ani naw chang gui ah bi avan m’khoi chak ci.

⁴ Gai ciah gakap gui ah li cu hnget ci, aktha ken cicu gaigawng lawk ci.

⁵ Ami phü ah ei man ciah chang gui cu, ei ami gah vai ah ami mät ng’hlawh ci gui. Ei cawi man ci gui cu kä cawi ba ci gui. Kä hta ciah chu cu chih ah hta ci, Cun ung phi chang akda ah nu ung a i kä om ba ci.

⁶ Bawipa naw hnun gui m’sih ci hnun gui m’ghin ci; ani naw chang gui sih nak ah khaw ah tüi gui ci, law püi ba gui ci.

⁷ Ani naw amshah dukhaih sak ci, amshah bühmang sak ci; Amshah neim sak ci, amshah dämduh sak ci.

⁸ Ani naw dukhaih ci gui cu m’vut ung ka yu chang gui ci, cawi gha ci gui cu geinvai nak ung ka han m’tam gui ci. Ani naw mang hta ng’piang ah teihpüi ah pyang gui ne, küikyang ciah bawi mang nak m’hnawn gui ci. Khomdek ah ang düih nak cu Bawipa naw khäm ci; Cun ah khan ah ani naw khaw ng’lei han k’süm ci.

⁹ Ani naw bekhüt ciah ak chang gui ah hnun gui shungvong ci, Cun ung phi changshe gui cu hmüp khui ung maih ci gui; Chang naw amät ah k’thagui awn näng nak kä gah ci.

¹⁰ Bawipa ah gaa gui cu dishum khai gui; Ani naw khan ah ka naw hmun kyeek awn hnu ng’tuk püi gui khai. Bawipa naw khaw ng’lei avan m’khoi chak khai; ani naw a ghangpughang huham pek khai, ani naw a ghü ah ghangpughang cu näng m’khüt sak khai.”

¹¹ Elkanah cu Ramah pigaw a im ah law ba ci, cun ung phi ak hmaw Samuel cu Shilon ah om shüt ne, taigüpa Eli ah ka ah om ne, Bawipa ah bi bik ci.

Eli ah Hta gui

¹² Eli ah hta gui cu chang sawkshe gui ah kyak ci. Ngami naw Bawipa cu a i ah kä sui ci gui,

¹³ taigü gui naw chang ung ami bi vai ah ami thäh gui phi a i ah kä sui ci gui. Chang tumat naw a khawihnah nak a douthak yah ung, taigüpa ah changshäm cu thum ah pyawng ciah koi kawt ne lawk ci. Meh cu shon yah ung,

¹⁴ ani naw cun ah koi phung yuk shun khäta, koi pyung ung kai lawk ci phung cu, taigüpa naw ka nak ci. Israel chang gui avan, Shilon ah law ne khawihnah douthak tuk ci gui phung cu, acun ah ami kyak nak gui ah kyak ci.

¹⁵ Ang dawn ah, a hta cu law püi ne, mei ung kä m’khih pha ung, taigüpa ah changshäm cu law neta, khawihnah douthak ciah chang am, “Meh api na pe ä, taigüpa naw ang shai vai; ani naw shon ah meh cu na pek ung kä dou khai, meh ket va dou khai.”

¹⁶ Cun ah chang naw am hlan ba ung, “Hman cicu mi bi ne a thau cu mi m’khih ma khai; cun kawn ah na ng’yak hlü cu na lak vai,” taigüppa ah changshäm naw, “Ka! a tuhbäi na pe vä! Kä nami na pek ung, ka ning gut gui khai!”

¹⁷ Shin ah Eli ah hta gui ah hmakat nak cu Bawipa ah ma ah, ak ka pi k’bäih ah kyak ci, a i ah kyasei ci ung ngami naw Bawipa am douthak cu kä chang m’sui u ne, shicha bik ci gui.

Shilon ah Samuelah

¹⁸ Cun yah ung ak hmaw Samuel cu Bawipa ah bi bi gäk gäk ci. Ani naw theing ciah

¹⁹ linen masui sui ci. A kum tä sei ani naw, acei naw khokum khawihnah nak douthak khai a law päng ung law tu neta, suinu akyaw ah pyang ne thak law ci.

²⁰ Cun kawn ah Eli naw Elkanah la akchu am hriham pe goi neta a pyen cu, “Bawipa naw shin ah hnumi ung a hei ak hmaw gui ning pek khai, nang naw ani am na ap ah chang ah hnün cu ngami naw lak khai gui” cik ci. Cun kawn ah ngami cu hteit ba ci gui.

²¹ Bawipa naw Hannah cu hrilham pek ci. Cun kawn ah ani cu pami thum la hnumi hnih ah hrilham pek sei, hta ba ci. Ak hmaw Samuel cu Bawipa ah bi bi nak ung däm ng’vai lawk ci.

Eli ah A hta gui

²² Tuhbäi Eli cu ghi lawk ci. A hta gui naw Israel gui ah khan ah ami bi gui avan cu ani naw ng’yak ci. Bawipa ah phung ung luh nak ah m’kawt ung bi bik ci gui ah hnumi gui awn ami ih om phi ng’ya gui ci.

²³ Cun ah kyasei ani naw ngami am, “A i ah kyasei shin gui nami bi ang? Nangmi naw akshe nami bi cu chang päng naw na m’thein lawk ci nei.

²⁴ “Ka hta gui, nawng vä! Bawipa ah chang gui naw shin ah mawng pyen vai cu kyih aih vai kyak ci nei!

²⁵ Chang tumat naw a hei chang tumat hnu ng’tuk püi ne katnak abi ah a kyak ung, Khanpughi naw shungshet hning ci nei; cun ung phi Bawipa hnung’tuk püi ne katnak bik cicu a u naw shung shet hning khai aw? Ngami naw ami pa ah pyen cu kä ngai ci gui, Bawipa naw ngami ngawn gui vai ah k’bäi pyi ci.

²⁶ Ak hmaw Samuela cu däm ng’vai law ne Bawipa ah ma la chang gui ah ma ah hmai kiang nak gah ne om ci.

Eli ah Kyongkhui Hnu ng’tuk ne Ng’cäi nak

²⁷ Bawipa ung ka lawk ciah shin ah ng’thu awn prophet cu Eli ah lawk ci: “Nami pupa Aaron la akyong khui cu Egypt ghangpughang changshäm ah ami kyak ung, kei naw ka mät Aaron ung ka m’than ci.

²⁸ Israel pakhui avan ung ka, ka taigüpa gui vai ah ani a ah kyong khui cu ka ghü ci, sonkyang ung bi bik khai, masui sui ne kei awn ng’ge pai khai. Sonkyang ung m’khih ne, khawhnak nak aming pai nak tu hning vai ah ami chaw cu kei naw ka pe gui ci.

²⁹ A i ah kyasei, kei naw ka chang gui ung ka thäh ah khawihnah nak la douthak nak cu nangmi naw ei hlü ne nami teng ang? A i ah kyasei Eli, kei ah ta na hta gui na m’taam gui pi ang, ka chang gui naw ami na douthak law ah khawihnah nak ah aknipi gui avan cu ei sak gui ne, na plan sak gui ci gui ne ma?

³⁰ Kei cu Israel gui ah Bawipa Khanpughi, na kyongkhui la na pakhui naw angtäi sei taigüpa ah kya ne, bi ami bi vai ah cau kei naw shai ka tak ci nei. Cun ung phi tuhbäi ka pyen cu kei ung cun kä om ba ci! Acun nak vai sü ung, Na m’tam cicu ka m’tam ba khai, na päipih cicu kam shemshai khai.

³¹ Ngai ä, na kyong khui la na pakhui ung ka, chang nong gui avan ka ngawn nak vai ah a khin gawk lawk ci nei, cun ah kyasei na kyong khui ung ka tumat phi ghi ne kä ghing khai nei.

³² Nang cu na khüi kha khai, a hei Israel chang gui am ka pek vai ah hriham avan cu nang naw vamneng ne na teng khai, cun ung phi nang ah kyong khui ung ka tumat phi ghi ne kä ghing khai.

³³ Cun ung phi na hta ng’shon tumat ghing khai ah ka k’pang khai, ani naw taigüpa ah kya ne, ka bi bik khai. Cun ung phi ani cu amik m’dauh khai, ang ngaih nak avan maih khai, a hei na hta ng’shon gui ami van cu leigai sih nak ung si yawp khai gui.

³⁴ Na hta goi Hophni la Phinehas cu hnüüp ät ung a täng ah ani sih ah a kyak ung, acun naw kei ah ka pyen phung a bä nak cu m’dang khai.

³⁵ Kei ung bekhüt khai la kei naw abi vai ka ng’yak hlü päng bik khai ah taigüpa cu kei naw ka ghü khai. Kei naw hta ng’shon nak ka pek khai, acun naw angtäi sei, kei ah ghü ah ghangpughang ah ma ah bi bik khai.

³⁶ Na hta ng’shon ung ka, api k’pawih ba ci gui cu taigüpa ah hteit ne, ngui la ei k’thäh khai gui, ei vai ami gah vai ah phäh ah taigüpa cu bi ning bi püi kawng cine, ami bi sak vai ah ng’hui ng’pa khai gui.”