1 SAMUEL 19 - Cho Bible Common Language 2016

David cu Saul naw Dukdeiu nak ci

¹ Saul naw a hta Jonathan la a bawi gui ami van am David ngawn vai ah apawng ah mawng cu m’thein gui ci. Cun ung phi Jonathan naw David cu m’hni aih

² ci, cun ah kyasei ani am, “Kapa naw ning ngawn khai ah tha nak ci nei. Ngawi ung khaw ngawi na geing nak vai nei; ang shut nak ah ng’thup neta, a cu ah na om cang vai nei.

³ Kei hteit ne, nang ah na ng’thuh nak ah lo ah kapa ah pei ah ka ng’düi khai, nang ah mawng ka pyen khai. A i baw a mawng ka hmuh ah a kyak ung, ka ning m’thein law ba khai.

⁴ Jonathan naw Saul ah ma ah David cu m’tam ne a pyen cu, “Bawi aw, Na changshäm David ah khan ah chei khai ah kä na bi vai nei. Ani naw nang ung a i phi a hma kä bik ci; ang lakmah nak cu, ani naw abi phung cu nang ah phäh ah ak dämduh ah m’htei htang nak ah kyak ci.

⁵ Ani naw a hnun gui pe ne Koliath cu ngawn ci, Bawipa naw Israel gui ah phäh ah dämduh ciah näng nak bik ci. Acun na hmuh ung, na yei khai nei. Tuhbäi a i ah kyasei chang ni ah khan ah a hma na bi hlü ang, a mawng kä om ciah David na ngawn hlü ang?”

⁶ Saul cu Jonathan ah ng’thu awn a hnga päng khäta, David cu kä ka ngawn khai nei cine Bawipa ah ming ung thukhän bik ci.

⁷ Cun ah kyasei Jonathan naw David khü neta a päng m’thein ci, cun kawn ah Saul ah hteh püi ci, David cu ayan ah mäih ah ghangpughang ah bi bi ba ci.

⁸ Philistin gui awn ng’tuk nak om law ba mä ci. David naw tu gui ne, hnim gui ci, ngami cu püipiang ci gui.

⁹ Hnüüp ät ung Bawipa ah tüih law ah mümcha she naw Saul cu pang ci. Ani cu a im kyong ah ngaw ne ak htei kawt ci, David cu acu ah tingtäng tum ne om ci.

¹⁰ Saul naw David cu ak htei awn pang ung khän ne vawi khai ah tha nak ci, cun ung phi David ana ng’shawn sei k’htei cu k’pang ung ng’cai ci. David cu dawng ne phyawng ci.

¹¹ A cu mü David cu a im ung mah ne, akhaw ngawi ung ngawn khai gui ah chang gui tüi gui ci. David akchu Michala naw am cäi cu, “Tuhmü kä na dawng ah a kyak ung ngawi ung na sik khai.”

¹² Achu naw m’kawt hta ung luh law sak sei, ani cu dawng ne phyawng ci.

¹³ Achu naw ami im ung agup cu, ih phat ung m’shän ne, me ah mu awn pyan ah khum nak cu lu täng ah tha neta, akhan ah yuk uk ci.

¹⁴ Saul ah chang gui naw David bik khai gui ah law u khätah, Michala naw ani gaw ci nei cik ci.

¹⁵ Cun ung phi Saul naw ami teng ba mä vai ah tüi ba gui mä ci. Ani naw k’bä gui ne, “A ih phak mah ah law püi vä, kei naw ka ngawn khai” cik ci.

¹⁶ Ngami cu kyong ah lut u neta, ih phak kyong ah im ung a gup la lu kung ah om ciah me mu awn pyan ah khum nak cu hmuk ci gui.

¹⁷ Saul naw Michala cu ng’shik ci, “A i ah kyasei shik cha ah na theileh na ne, ka ga na phyawn sak ang? Ani naw, “Ani naw, a phyawn vai ah kä ka bi püi ung na ngawn khai ah pyen sei nei” cik ci.

¹⁸ David cu phyawng ne Samuel ah om nak Ramah ah hteit ne Saul naw a kyak nak gui avan cu m’thein tuk ci. Cun kawn ah Samuel la ani cu Naioth ah hteit ne, a cu ah om ci goi.

¹⁹ David cu Naioth, Ramah ah om ci ciah Saul am m’thein ba ci gui.

²⁰ Cun ah kyasei ani phak khai chang gui tüi gui ci. Ngami naw Samuel ng’vai pi ciah prophet ng’bum cu ng’lam ne m’lau u sei hmuk ci gui. Cun ung Khanpughi ah mümcha naw Saul ah chang gui cu k’pang gui sei, ngami cu tün ne ng’lam ne, m’lau tuk ci gui.

²¹ Saul naw cun ah mawng cu ng’ya neta, chang akda pi tui ba gui ci, ngami phi ng’lam ne m’lau ne kya tuk ci gui. Ani naw a thum nak ah chang gui tüiba gui ci, ngami phi acun ah mäih ah kya tuk ci gui.

²² Cun kawn ah ani amät cu Ramah ah hteit ci. Ani cu Secu pigaw tui shawk nu ung gawk law neta, Samuel la David a hawi ani om ng’shi gui sei, Naioth ah om ci goi nei, cine m’thein ci gui.

²³ A cu ah gawk khäta, ani phi Khanpughi ah mümcha naw pang sei, Naioth ah hteh nak lam pum ung ng’lam ne m’lau ci.

²⁴ Ani naw a sui gui sut ne Samuel ah ma ah ng’lam ne m’lau ci, hnüüp pum, mü pum ung ak plui ah ng’yän ci. (Cun ah kyasei cun ung tün ciah thu thuk ci, “Saul mä prophet ah kya tu ne ma?”) ciah om lawk ci.