1 SAMUEL 18 - Cho Bible Common Language 2016

¹ Saul la David cu ng’htau yawp ci goi. Cun kawn ah Saul ah hta Jonathan naw David cu yei na aih neta, amät naw amät am hni ah mäih ah David cu m’hni ci.

² Saul naw David cu, a cu hnüüp tün ne a täng ah om püi ne, a im ah kä hteh ba sak ci.

³ Jonathan naw David cu angtäi sei ng’khawt püi khai ah k’bäi ci, a i ah kyasei ci ung ani naw a yei nak aih su ah kyak ci.

⁴ Ani naw amät ah suinu cu sut neta, David am pek ci, a shawiphaw ni, akhim ni, ali ni, a khei pat ni phi pek ci.

⁵ David cu Saul naw ng’tuk khai ah a tüih nak päng a van ung näng nak gah ci, cun ah kyasei Saul naw gabawi ah tha ci. Cun naw Saul ah bawi gui la achang avan cu yei sak gui ci.

Saul cu David ah Khan ah M’thüi lawk ci

⁶ David naw Koliath ngawn neta law ba sei, gakap gui phi ami im ah law ba ci gui, Israel khaw gawnu päng ung ka hnumi gui cu law ne ghangpughang Saul hmu lawk ci gui. Ngami cu yeikyai ne ng’äi m’cu u ne, ng’lam u ne, htung, sheei gui tum ci gui.

⁷ Ami pawi nak ung hnumi gui naw, “Saul naw Phia gha ngawn ci, cun ung phi David naw phia gha ah a gha ngawn ci nei” cine ng’äi ci gui.

⁸ Saul naw cun cu kä hni ne, ak tä ah m’lung she ci. Ani naw, “Ngami naw David ah phäh ah phia gha ah a gha ah pyen ci gui, kei ah phäh ah phia gha bäng ah pyen ci gui. Ngami naw ani cu ghangpughang ah hmoh hlük ci gui nei.

⁹ Cun ah kyasei ani cu, cu hnüüp ung tün ne David ah khan ah m’thüi ne kä ngaih gep lawk ci.

¹⁰ A ngawi ung khaw ngawi Khanpughi ah tüih law ah mümcha she naw Saul cu ang ghit ah k’pang sei, a im kyong ah ak gu ah mäih ah gawmva ci. David cu ak hnüüp tä a tum man ah mäih ah tingtäng tum ci, Saul cu k’htei kawt ci.

¹¹ “Pang ung m’khän ne ka hei vawi khai” ci nei Saul cu amät ng’htau neta, k’htei awn hnih vei vawi ci: cun ung phi David naw ana ng’shawn ghäm ghäm ci.

¹² Saul naw David cu kyih ci, a i ah kyasei ci ung Bawipa naw David om püi ci, ani cu nawng ci.

¹³ Cun ah kyasei Saul naw ani cu a hei ah hteh sak ne, chang phia gha ah bawi ah kyak sak ci. David naw ak chang gui cu ng’tuk nak ah hteh püi gui

¹⁴ ci, ani cu abi nak phung ung näng ci, a i ah kyasei ci ung ani cu Bawipa naw om püi ci.

¹⁵ Saul naw David ah näng nak cu teng neta, ani cu kyih law pi k’täi ci.

¹⁶ Cun ung phi Israel la Judah ung chang päng naw David cu m’hni ci gui, a i ah kyasei ci ung ani cu näng ciah lam ma ciah kyak ci.

David naw Saul ah Htahnumi Chu nak ci

¹⁷ Cun kawn ah Saul naw David am, “Shin cu kei ah ka hta hnumi ang vai pi Merab nei. Na chu nak vai ah ka ning pek khai. Cun cu m’gäi ne hläkhäm ciah gakap ah kya ne, ka bi na bi ah phäh la Bawipa ah ng’tuk na bi ah phäh ah kyak ci” cik ci. (Saul ah ngaih cu, cun ung Philistin gui naw David cu ngawn khai gui, ani naw a i abi vai kä hlü khai, ciah kyak ci.)

¹⁸ David naw, “Kei cu a u ah kya ngä sei, ka kyong khui cu a i ah kyasei, kei cu ghangpughang ah kawi ah ka kyak vai ang?” cik ci.

¹⁹ Cun ung phi Merab cu David am ami pek vai a khin gawk law ung, a hei pami Meholah ah ka Adriel am pe tuk ci gui.

²⁰ Saul ah hta hnumi tumat Michala naw David cu m’hni ci, cun cu Saul naw ng’ya neta yei ci.

²¹ Ani amät ng’htau ci, “Kei naw Michala cu David am ka pek khai; ka hta hnumi cu ani pha nak vai ah ka mang khai, cun ung ani cu Philistin gui naw ngawn khai gui.” Cun ah kyasei Saul naw a hnih vei nak ah David am, “Nang cu ka kawi ah na kyak khai” cik ci.

²² Ani naw a bawi gui am amät David a düm ah ami ng’htau püi vai ah pyen na gui ne, am cäi gui cu, “Ghangpughang naw ning yei nak ci, ani ah bawi gui avan naw ning m’hni ci gui; tuhbäi cu a hta nak chu nak vai akhin aknipi bäih ah kyak ci.”

²³ Cun ah kyasei ngami naw acun ah David am m’thein ci gui, David naw, “Ghangpughang ah a kawi ah kyak vai cu dämduh ciah m’taam nak ah kyak ci nei, dukhaih ne pyamtham ciah kei ah mäih ah phäh ah dämduh aih ci nei” cik ci.

²⁴ Bawi gui naw David ah pyen cu Saul am m’thein ba ci gui,

²⁵ cun kawn ah Saul naw David am ami m’thein ba vai ah ak bäi ba gui cu, “Nang naw na pek vai ah m’cümhnah nak ghangpughang naw ang yak hlü avan cu, Philistin changsi phia ah yang m’dawng gui ah kyak ci, cun cu a ga gui ung phu a tuknak ah kyak ci.” (Cun cu Philistin gui naw David ami ngawn vai ah Saul naw abi ah kyak ci.)

²⁶ Saul ah bawi gui naw Saul naw a pyen nak gui cu David am m’thein ci gui. David cu ghangpughang ah kawi ah a kyak law vai ngai ne yei ci. Ng’chu la nak kä ami bi pha ung,

²⁷ David la ak chang gui hteit u ne, Philistin chang phia goi ngawn ci gui. Ani naw Philistin gui ah vun ah gui cu ghangpughang ah law püi neta, avan khei ne ap ci, cun ah kyasei ani cu a kawi ah kya lawk khai kyak ci. Cun ah kyasei Saul naw a hta hnumi Michala cu David naw a chu nak vai ah pek ci.

²⁸ Bawipa naw David a täng ah om püi ci, cicu Saul naw ng’htei cha sei hmat ci, a hta hnumi Michala

²⁹ naw phi m’hni ci, cun ah kyasei ani naw David cu kyih law pi k’täi ci, amät cu a ghin ah chuih David ah ga ah kyak ci.

³⁰ Philistin gakap gui naw law ne tu lawk ci gui, cun ung phi ami ng’tuk nak päng ung Saul ah bawi gui ah ta David cu näng pi ci. Ak hnu ah David cu ang htei ah mingthang lawk ci.