1 SAMUEL 17 - Cho Bible Common Language 2016

Koliath naw Israel gui Gheet Taap Gui Ci

¹ Philistin gui cu ng’tuk vai ah Judah khaw Socoh gawnu ung bum ci gui; ngami cu Ephes Dammim ung hmun tu ne om ci gui, cun cu Socoh la Azekah ah ng’lak ah kyak ci.

² Saul la Israel gui cu Elah khaw nawi ung hmun tu ne bum ci gui, cun ungka naw Philistin gui tuk gui ge vai ah pawng ci gui.

³ Philistin gui cu vangtäng kho gui ung pawng ci gui, Israel gui cu vangtäng kho gui ung pawng ci gui, ami ng’lak ung khaw dou om ci.

⁴ Gath mang gaw ung ka Koliath ming nak ciah chang cu Philistin phung ung ka lut law ne Israel gui cu gheet taap gui ci. Ani cu dawng chuk la khap ah ng’sau ne,

⁵ pit hma kip lawk ciah kyei shawiphaw sui ne, kyei lukhu ng’büng ci.

⁶ Akhaw ung phi kyei shawiphaw sak ci, ani naw ak phleing ung kyei htei hnga mah kawt ci.

⁷ Ani ah hteipawng cu tah im ng’lawng teih law ne khüih ci, acun ung m’si htei cu pit chih vai lawk ci, gakap tumat naw ama ah hteit ne a shawiphaw cu kawh pek ci.

⁸ Koliath cu ng’düi ne Israel gui hawh gui ci, “Ng’tuk vai ah ng’düi law vä, Cän ung a i nami haw ci ang? Kei Philistin chang nei, Saul ah changshäm gui! Kei na ng’tuk püi khai ah nami chang tumat ghü vä.

⁹ Ani naw kei na näng ne, ana ngawn ah a kyak ung, keimi cu nangmi ah khleihtein ah kami kyak khai; kei naw ani näng ne, ka ngawn ah a kyak ung nangmi cu keimi ah khleihtein ah nami kyak khai.

¹⁰ Shin ung tuhbäi, kei naw Israel gakap cu ka gheet taap ci nei. Kei na ng’tuk püi khai ah chang tumat nami ghü vai ah m’gäi ne ka ning pyen na gui ci nei!” cik ci.

¹¹ Saul la a chang gui naw ng’ya u neta, ngami cu cäicat ci gui.

Saul ah Phung ung David

¹² David cu Jesse ah hta, Ephrathit pakhui, Bethlehem mang gaw, Judah khaw ung ka ah kyak ci. Jesse ung a htapa cheit om ci, Saul ghangpughang ah a kyak yah ung ani cu ang’htei ah ghi law pyi ci.

¹³ A hta pami ang vai ba thum cu Saul awn a täng ah ng’tuk nak vai ah hteit tuk ci gui. Ang’vaipi cu Eliab, cun tawi cicu Abinadab, a thum nak cu Shammah ah kyak ci.

¹⁴ David cu ak hmawpi ah kyak ci, ang vai ba thum gui Saul awn a täng ah ami om yah ung,

¹⁵ apa ah htome gui shäm khai ah, David cu Bethlehem ah hteit ba ci.

¹⁶ Koliath naw Israel gui cu a khaw ngawi tä, a mühun tä hnüüp phli kip ung gheet taap gui ci.

¹⁷ Hnüüp ät ung Jesse naw David am, “M’va püm hlaw phawi gha la m’htut pum gha hteh püi ne, na phäi gui ah om nak phung ah ak yang ah hteit tä.

¹⁸ Shin ah seisuk-mawng pum gha cu hteh püi ne gabawi am na pek vai. Na phäi gui a i ah ami kyak cu na teng gui vai, na hmuh gui ah mawng m’dang nak ah a i baw na law püi vai, cun ung ngah mi gai ci gui ah kyak khai.

¹⁹ Ghangpughang Saul, na phäi gui la Israel chang gui ami van cu Elah kho dou ung, Philistin gui tuk u ne om ci gui.

²⁰ David cu a ngawi ung kho ngawi hta tho lawk ci, Htome gui shäm khai chang tumat nawng shüt neta, buh htun m’kang ne, Jesse naw am cäi ah hteit ci. Ani phung ung a gawk yah ung Israel gui cu ng’tuk nak vai ah ana hteit vai ci gui, ng’tuk vai nei cine m’lau ci gui.

²¹ Philistin gui la Israel gakap gui cu ng’tuk ge vai ah, ng’man na tu ge ci gui.

²² David naw ei k’thak gui ah ng’vai am ei vai a hteh püi cu nawng pe shüt neta, ami ng’tuk nak vai ah dawng ne, aphäi gui ah hteit neta, a i ah ami kyak ng’shi gui ci.

²³ Ani naw ang htau püi gui yah ung, Koliath cu ng’phäi law ba ci, a cita ah mäih ah Israel gui cu gheet taap ba gui ci, cun cu David naw ng’yak ci.

²⁴ Israel gui naw Koliath cu hmu u neta, kyi ne dawng ci gui.

²⁵ “Teng tu vä” cine ami mät ng’htau ci gui. “Ani ah gheet taap nak cu ngai vä! Ghangpughang Saul naw ani ngawn ci am dämduh ciah m’cümhnah nak pek khai ah shaitak ci nei. Ghangpughang naw a hta hnumi phi chu na sak khai nei, ani ah pa ah kyong khui ung phlam phi kä lak khai nei” cik ci gui.

²⁶ David naw a pei ah ka gui cu ng’shi gui ne, “Shin ah Philistin chang ngawn ne Israel gui cäi ng’ä nak ung phyawn sak ciah chang naw a i gah khai ang? Ghing ciah Khanpughi ah gakap ghet taap ciah shin ah chang hei Philistin chang cu a u ang?” cik ci.

²⁷ Koliath ngawn ciah chang cu a i ah kya lawk khai cicu ngami naw m’thein ci gui.

²⁸ David naw chang gui ang thu püi gui cu a phäi ang vai pi Eliab naw ng’yak ci. Ani cu David ah khan ah m’lung she neta, shin ung a i na haw lawk ci ang? Bung hmu ah na htawme gui cu a u naw ang a shäm? Nang changshe hta! Ng’tuk na teng tu düt khai ah na lawk ci nei” cik ci.

²⁹ “Tuhbäi a i ka bik khai ang? A i phi kä ka ning shi gui hning khai ma?” cik ci.

³⁰ Ani naw a hei tumat cu ng’hlah shi ne ng’shi ba mä ci, ang shi päng naw acun ah m’shang ci gui.

³¹ David ah ng’thu ng’yak ciah chang amshah gui naw Saul am m’thein u ne, ani ah tüi ci gui.

³² David naw Saul am, “Bawi mang aw, “A u naw shin ah Philistin chang kä kyih en sä! Kei naw hteit ne ka tuk khai nei” cik ci.

³³ Saul naw, “Ka, a i hawkcha ah nang naw na tuk khai aw? Nang cu ak hmaw, ani cu a ghin ah chuih gakap ah kyak ci!” cik ci.

³⁴ David naw, “Bawi Mang aw, Kei naw ka pa ah htome gui cu ka shäm ci. Kawng naw baw khawm naw baw htome lou ne a saw ung,

³⁵ kei naw gawt ne, tu ne, htome hta cu ka gut ba ci. Kawng, khawm cu kei täng ah ang hlah law ung pha ne ven ne a gawn ung k’hteu ne ka ngawn gui ci,

³⁶ Kei naw kawng gui la khawm gui cu ka ngawn ci, shin ah khuihei Philistin acun ah mäih ah ka cik khai, ani naw ghing ciah Khanpughi ah gakap gui cu gheet taap gui ci.

³⁷ Bawipa naw kawng la khawm ah kut ung ka na hun ci; ani naw shin ah Philistin ung ka na hun khai.” Saul naw, “Bä khai, hteit ä, Bawipa naw ning om püi khai” cik ci.

³⁸ Ani naw amät ah m’si shawi phaw cu David am pe ne sui sak ci: kyei lushung cu David ah lu ung bün sak ne, suinu shawiphaw phi pek ci.

³⁹ David naw Saul ah khim cu shawiphaw ung bun ne hteit shüm ci, cun ung phi kä hteit hlawt ci, a i ah kyasei ci ung ani naw cun gui cu kä ah sui man ah kyak ci. “Shin awn kä ka tu hning khai nei, kei shin ah mäih kä ka sui man ci” cine Saul am pyen nak ci. Cun ah kyasei ani naw avan sut ba ci.

⁴⁰ Ani naw htome a shäm nak ah ng’sho htung la ne, tui ung ka lung, ng’lung hma kaw ne, ang za ung m’khäp ci. Azaili cu m’hnüüt ge neta, Koliath tuk khai ah hteit ci.

David naw Koliath Hnim ci

⁴¹ Philistin chang cu David täng ah ana a vük ci, a shawi kawh pek cicu ama ah hteit ci. Ani cu ng’et law pi pi ci,

⁴² David cu hmu law ne ng’htei neta, ani cu a i ah phi kä sui ci, a i ah kyasei ci ung ani cu nong ne, kyom hta ci.

⁴³ Ani naw David am, “Cän ah htung a i na haw nak vai ang? Kei ui ah na na ngai ne ma?” ci nak ci. Ani naw amät ah Khanpughi khü ne David cu taam ci.

⁴⁴ Ani naw David cu gheet taap ne, “Law ä, kei naw na pumsa cu kha gui la khisa gui am ka vuh khai nei.”

⁴⁵ David naw, “Nang naw kei na na ng’tuk püi khai ah khim ni, k’htei ni, htei pawng ci kawt ne na lawk ci, cun ung phi kei naw nang ka ning tuk püi khai ah, nang naw na ghet taap ah, Israel gakap gui ah Khanpughi, hlüngtai ciah Bawipa ah ming awn ka lawk ci nei.

⁴⁶ Shin ah hnüüp ung Bawipa naw nang cu kei ah ka huham kyong ung ning tha ci nei; kei naw nang cu ning hnim ne, na lu ka ning täng khai nei. Kei naw Philistin gakap gui ah pumsa gui cu kha gui la khisa gui am ka vuh khai nei. Cun kawn ah khaw ah khan ung chang van naw Israel gui ah Khanpughi om ci, cicu hmat khai gui,

⁴⁷ shin ung om ciah chang gui phung naw, Bawipa naw ak chang gui a hun nak gui vai ah khim la htei kä hlü ci, cicu hmuk khai gui nei. Ani cu ng’tuk nak ung näng nak ah huham kyong ung ning tha gui khai nei” cik ci.

⁴⁸ Koliath cu David lam ah ana a vü ba mä ci, David cu Philistin gui täng ah ani tuk khai ah, va dawng vük ci.

⁴⁹ Ani naw ang za kyong ah ka lung yu saw neta, yaili awn Goliath cu ng’väi ne vawi ci. Cun naw am cakau ung vawi sei alu am goop ci, Koliath cu kyu ne a hmai m’dek ung chah ne ng’yän ci.

⁵⁰ Cun ah David naw Koliath cu khim kä bi ah yaili la lung awn hnim ne ngawn ci!

⁵¹ Ani cu va dawng ne a khan ah ng’düi neta, Koliath ah khimpem ung ka, khim la ne, ani ah lu cu täng ne ngawn ci. Philistin gui naw ami gabawi a sih cu hmu u neta, dawng yawp ci gui.

⁵² Israel gui la Judah gui naw m’lau ne dawng ne Gath lam pu ung gawk u ne, Ekron m’kawt ung khüt sei k’täm gui ci gui. Leim ciah Philistin gui cu Saaraim ungka naw Gath la Ekron ung khüt sei lam pum ung kyu ne ng’zaih ci gui.

⁵³ Israel gui naw Philistin gui ami gawt nak ung law ba u neta, ami phung gui phi gut gui ci gui.

⁵⁴ David naw Koliath ah lu cu la ne Jerusalem ah law püi ci, cun ung phi Koliath khim gui cu amät ah phung ung nawng shüt ci. David cu Saul ah hteh püi ci gui.

⁵⁵ David naw Koliath tuk khai ah a hteh cu Saul naw hmu neta, gabawi, Abner cu ng’shik ci, “Abner, Ani a u ah hta ang?” Abner naw, “Bawi Mang, kä ka hmat ci nei” cik ci.

⁵⁶ Saul naw k’bäi ne, “Hteit ne va ng’shi ä” cik ci.

⁵⁷ David cu Koliath a ngawn kawn ah phung ah law ba khäta, Abner naw Saul ah hteh püi ci. David naw Koliath ah lu cu kawt law gäk gäk ci.

⁵⁸ Saul naw, “Chang nong, a u ah ning hta ang?” ani naw, “Kei cu Bethlehem ah ka na changshäm Jesse ah na hta nei” cine David naw m’shang ci.