1 SAMUEL 16 - Cho Bible Common Language 2016

David Cu Ghangpughang ah Phyuh Theh

¹ Bawipa naw Samuel am, “Saul ah phäh ah a i güt na cäi ng’ä khai ang? Israel ghangpughang ung ka, kei naw ka hnu na pyi ci nei. Cun ung phi tuhbäi oliv-situi la ne Bethlehem ah hteit ä, Jesse ming nak ciah hteit ä, a i ah kyasei ci ung, ani ah hta gui ung ka tumat cu ghangpughang vai ah kei naw ka ghü ci nei” cik ci.

² Samuel naw, “A i haw cha ah ka bi vai ang? Saul naw cun ah mawng ang yak ung kei na ngawn khai nei!” cik ci. Bawipa naw, “Seipat hta tumat hteh püi neta Bawipa cu cä ah khawihnah nak ka douthak khai, cine na pyen vai.

³ Jesse cu khawihnah nak ah na khü vai, kei naw a i bi vai cu ka ning m’thein khai. Kei naw ka ning m’thein ah chang cu ghangpughang ah na phyuhtheh vai.”

⁴ Bawipa naw bi vai ah am thein ah mäih ah Samuel naw bik neta, Bethlehem ah hteit ci, a cu ah mang gaw ng’vai gui cu, hteit ne law ne, hmu law u neta, “Shin cu dimdeeih nak awn na om law tuk ci ma, mikhmu?” cik ci gui.

⁵ Ani naw, “Ä, kei cu Bawipa am khawihnah nak ka douthak khai ah ka lawk ci nei. Nami mät theingthap sak neta law tu vä” cik ci. Ani naw Jesse la a hta gui phi ami mät ami theingthap vai ah pyen na gui neta, khawihnah nak ah khü gui ci.

⁶ Ami gawk law ung Samuel naw Jesse ah hta Eliab cu hmu neta amät ng’htau ne, “Shin ah chang, shin ung düi ci, Bawipa ah ma ah ka shih, Ani naw a ghü ah ng’khän ci nei” cik ci.

⁷ Cun ung phi Bawipa naw ani am, “Ang sau la a kyom cu kä na ngaih nak vai nei. Kei naw ka hnu nak ci nei, a i ah kyasei ci ung kei naw chang ah ng’thumcha ah mäih ah kä ka m’khoi chak ci. Chang naw ak pung ah dang cicu teng ci, cun ung phi kei naw m’lungkyong ka teng ci” cik ci.

⁸ Cun kawn ah Jesse naw a hta Abinadab cu khü ne, Samuel ah law püi ci. Cun ung phi Samuel naw, “Ka, Bawipa naw ani cu kä ghü ci nei” cik ci.

⁹ Cun kawn ah Jesse naw Shammah mä hteh püi ci. Samuel naw, “Ka, Bawipa naw a ni cu kä ghü ci nei” cik ci.

¹⁰ A shin ah mäih ah Jesse naw a hta gui sing chih cu Samuel ah law püi gui ci. Samuel naw ani am, “Ka, shin gui ung ka Bawipa naw a u phi kä ghü ci nei” cik ci.

¹¹ Cun kawn ah ani naw, “Na hta om ba mä naw” cine ng’shi ba ci. Jesse naw, “A hmaw pi om ba ci, cun ung phi ani cu htome shäm ci. Samuel naw, “Shia ah alaw vai ah va m’thein vä, Ani kä a law pha ah chuih khoihnak nak kä mi dou thak khai” cik ci.

¹² Cun ah kyasei Jesse naw chang tüi ne khü sak ci. Ani cu kyom ci, gai ne nong ci, amik cine ng’shü ci. Bawipa naw Samuel am, “Shin ah chang nei na phyuh theh vai!” cik ci.

¹³ Samuela naw olive-situi cu la neta, David cu aphäi gui ah ma ung phyuh theh ci. Ang ghit ah Bawipa ah mümcha naw David cu k’pang ci, cu hnüüp ung tüi ne ani cu om püi ci. Cun kawn ah Samuel cu Ramah ah hteit ba ci.

Saul ah Yung ung David

¹⁴ Bawipa ah mümcha naw Saul cu htehtak ci, Bawipa naw mümcha she cu ani shekdam nak khai ah tüi ci.

¹⁵ Achangshäm gui naw, ani am, “Khanpughi naw atüih law ah mümcha she naw ning shedam nak ciah kami hmat ci nei.

¹⁶ Cun ah kyasei thu k’bäi na pe gui ä, Saza, cun kawn ah a i cha tingtäng tum vai hmat ciah chang cu kami shui khai nei. Nang ah khan ah mümcha she a law yah ung, cun ah chang naw a tingtäng tum khai nei, cun ung nang na gai ba khai” cik ci gui.

¹⁷ Saul naw thu k’bäi gui ci, “Akni ah tum thei cicu na shui pe vä, kei ah law püi vä” cik ci.

¹⁸ Acun ung om ci gui ung ka tumat naw, “Bethlehem ah ka Jesse ung akni ah tumkhawng thei ciah a hta pami om ci. Ani cu ng’phet ne, kyom ci, gakap ni ah kyak ci, thu m’gawng thei ciah kyak ci. Ani cu Bawipa naw om püi ci.

¹⁹ Cun ah kyasei Saul naw Jesse ah chang tüi ne a pyen sak cu, “Na hta David htome shäm cicu kei ah na tüih law vai nei” ciah kyak ci.

²⁰ Jesse naw a hta David cu me’hta tumat, m’htut be sei taih ah la lah, sapyit tui be ciah meh vun ng’ip law püi sak ne, Saul ah tüi lawk ci.

²¹ David cu Saul ah hteit ne, a bi bi tuk ci. Saul naw ani cu m’hni aih neta, a li khim gui kawt khai ah ani cu ghü ci.

²² Cun kawn ah Saul naw Jesse am ng’thu m’khäh ci, “David cu ka yum ci. A shia ah om ne, ka bi bi tu sä” cik ci.

²³ Cun kawn ah Khanpughi naw atüih law ah mümcha she cu Saul ah khan ah a gawk law päng ung, David naw a tingtäng cu la ne tum ci. Cun ung mümcha she cu a hei ah hteit ci, Saul cu ng’mang ba ne, gai ba ci.