1 SAMUEL 15 - Cho Bible Common Language 2016

Amalek Chang gui Tuknak

¹ Samuela naw Saul am, “Israel gui ah ghangpughang ah na kyak khai ah, nang cu ka ning m’shumphyuk khai ah, kei cu Bawipa naw a na tüih law ah kyak ci. Tuhbäi Bawipa Akhlüngtai naw a i a cicu ngai ä.

² Ani naw Amalek chang gui cu m’kyuk law gui khai, a i ah kyasei ci ung, ngami ah pupa gui naw Israel chang gui cu Egypt khaw ah ka, ami law ba yah ung hnu ng’tuk püi gui ci gui.

³ Amalek chang gui cu hteit ne tu gui vä, ngami ung om ci phung m’di yawp vä. A i phi kä nami k’pawih nak vai; chang avan pami, hnumi, akhmaw, nau sen; htome, kala uk la ng’sela avan nami ngawn vai.”

⁴ Saul naw a gakap gui cu a täng ah Telem ung ng’bum sak gui ne khei gui ci: Israel ung ka gakap 200, 000 lawk ci, Judah ung ka 10, 000 lawk ci.

⁵ Ani la a chang gui cu Amalek mang gaw ah hteit u neta, tuinu a hnün hmawi chawng ung ng’mah ci gui.

⁶ Ani naw Kenite chang gui ah ng’thu m’shäk ci, ngami ah pupa gui cu Israel gui Egypt ah ka ami law ba yah ung m’gein tuk ci gui ah kyak ci: “A hei ah hteit vä, Amalek gui hteh ta gui vä, cun ung ngami awn a täng ah kä ka ning ngawn gui khai” cik ci. Cun ah kyasei Kenite chang gui a hei ah hteit ci gui.

⁷ Saul naw Amalek gui cu hnim gui ci, Egypt khaw ak kyang täng, Havilah ungka naw Shura ung khüt sei avan ung ng’tuk ci gui;

⁸ Ani naw Amalek ghangpughang Agag cu akghing ah pha ne, chang gui avan ngawn gui ci.

⁹ Cun ung phi Saul la akchang gui naw Agag cu kä ngawn ci gui, htome la seipat aknipi, sei hta la htome hta aknipi, aknipi phung cu kä ngawn ci gui; a i ah kä mawng phyak ci la kholä khai phung m’di yawp ci gui.

Saul Cu Ghangpughang ah Hnu Ng’tuk Püi Ci Gui

¹⁰ Bawipa naw Samuela am

¹¹ “Saul ghangpughang ah kam hmoh ah phäh ah kei ka thüi ci nei; ani cu kei ung ka ng’hlat ne, ka thumkhän phi kä läk ci” cik ci. Samuela cu m’lung shei ci, amü pum Bawipa ah ng’coi ng’pa ci.

¹² A ngawi ung kho ngawi hta ani cu Saul hmu khai ah hteit ci. Saul cu Carmela gawnu ah hteit ci, ciah ani naw ng’yak ci, acu ah ani naw amät ah phäh ah lungtung ling ci, cun kawn ah ani cu Gigal ah hteit ba ci.

¹³ Samuela cu Saul ah gawk khäta, Saul naw, yavaih na neta, “Bawipa naw hriham ning pe sä, Samuela! Kei naw Bawipa ah thumkhän cu ka läk ci nei” cik ci.

¹⁴ Samuela naw, “Sei ah maw la htome ah m’lau ka ng’yak ci, a i ah kyasei ang?” cik ci.

¹⁵ Saul naw, “Ka chang gui naw Amalek chang gui ah ka mi law püi nei. Ngami naw aknipi ah htome la seipat gui cu Bawipa na Khanpughi am khawihnah nak ah dou thak vai ah ami gim ah kyak ci, ak pawih ba cicu avan kami m’di zawip ci” cik ci.

¹⁶ Samuela naw k’bäi ne, “Ng’düm ä! Bawipa naw zaamü ng’thu ana m’thein cu ka ning m’thein khai.” Saul naw, “Na m’thein ä” cik ci.

¹⁷ Samuela naw, “Namät naw namät kä küikyang ciah na ngaih ung phi, nang cu Israel pakhui ah ng’vai pi ah na kyak ci,

¹⁸ ani naw thu k’bäi ne Amalek changshe gui m’di gui vai ah a ning tüih ah kyak ci. Ami van kä na ngawn gui pha ah chuih na tuk gui vai ah a ning m’thein ah kyak ci.

¹⁹ I i ah kyasei cun cu kä na läk ang? A i ah kyasei chang ah khawh gut ne na lak ang? Acun naw Bawipa kä yei sak ci.

²⁰ Saul naw, “Bawipa ka läk ci nei” cik ci. “Ana m’cäi ah mäih ah kei ka hteit ci, Ghangpughang Agag ka law püi ci, Amalek chang gui avan ka ngawn gui ci.

²¹ Cun ung phi ka chang gui naw ami pha ah htome la seipat aknipi gui cu kä ngawn ci gui, ngami naw shin ung Gilgal ah law püi u ne, Bawipa, na Khanpughi am khawihnah dou thak vai ah cik ci gui.

²² Samuela naw, “A i ang Bawipa naw a yum pi; ang thu ngaih ang, khawihnah dou thak ang? Htome ak bä pi awn khawihnah ah ta ang’thu ngaih cu bä pi ci nei.

²³ Ani hnu ng’tuk püi cu khawshe m’bei ah mäih ah shek ci, lingkeng aih cu agup khawihnah ah mäih ah katnak ah kyak ci. A i ah kyasei ci ung nang naw Bawipa ah thumkhän na hnu ng’tuk püi ci, ani naw na ghangpughang nak cu ning hnu ng’tuk püi ci” cik ci.

²⁴ Saul naw, “Ä, kei ka hma ci nei. Kei naw Bawipa ah thumkhän la nang ah m’shümthein cu kä ka läk ci nei. Kei naw ka chang gui cu ka kyih gui ci, ngami naw ami ng’yak hlü bik ci gui.

²⁵ Cun ung phi tuhbäi, ka ning paa nak ci nei, ka hma nak na m’geinsei ne, kei awn a täng ah hteit tu ba ä, cun ung kei naw Bawipa ka khawihnah hning khai.”

²⁶ Samuela naw, “Nang awn a täng ah kä ka hteit tu ba khai, nang naw Bawipa ah thumkhän na hnu ng’tuk püi ci, ani naw Israel ghangpughang ung ka ning hnu ng’tuk püi ci.

²⁷ Samuela cu hteit ba khai ah va ng’hlat ci, cun ung phi Saul naw a suinu ung pha ne k’pang sei, k’teek ci,

²⁸ Samuela naw ani am, “Tuhngawi nang ung ka Israel uknak kho cu Bawipa naw heng pyi ci nei, nang ah bä pi ciah chang am pe pyi ci nei.

²⁹ Israel gui ah m’gäi ciah Khanpughi cu kä hleei ci, am lung kä m’thawng ci. Ani cu chang ah kä kyak ci, ani naw am lung kä m’thawng ci nei” cik ci.

³⁰ Saul naw, “Kei ka hma ci nei” ci ba ci. Cun ung phi ka chang gui ah ami ng’vai gui la Israel chang avan ah ma ah, chang m’sui nak bawta na m’dang pe ä. Kei awn a täng ah hteit tu ba ä, cun ung kei naw Bawipa na Khanpughi cu ka khawihna hlawt khai” cik ci.

³¹ Samuela cu ani awn a täng ah hteit tu ba sei, Saul naw Bawipa cu khawihnah ci.

³² Samuela naw k’bäi ne, “Ghangpughang Agag cu shin ung ka pei ah law püi vä” cik ci. Agag cu a pei ah kyi ne ng’hlet ne lawk ci, amät naw ngai ne, “Sih vai cu a i hlawk ah tä khai aw? cik ci.

³³ Samuela naw, “Nang ah na khim naw nu nu akda cu a hta kaa ah kyak sak ci, cun ah kyasei, tuhbäi na nu cu a hta ah kyak khai nei” cik ci. Ani naw Gilgal sonkyang ma ah Agag cu tupit pit ci.

³⁴ Cun kawn ah Samuela cu Ramah ah hteit ba ci, Saul ghangpughang cu Gibeah a im ah hteit ba ci.

³⁵ Samuela naw a ghin ah chuih ghangpughang cu kä hmu ba ci; cun ung phi ani ah khan ah ng’ä ai ci. Saul cu Israel ghangpughang ah kyak khai ah a bi ah phäh ah Bawipa cu a yä ci.