1 SAMUEL 14 - Cho Bible Common Language 2016

Jonathan Naw Tha Hlü ne Abi nak

¹ Hnüüp ät ung Jonathan naw a li k’htei gui kawt ciah chang nong am, “Philistin gui ah phung kan ne mi hteit khai nei” cik ci. Cun ung phi Jonathan naw apa Saul am kä m’thein ci.

² Apa cu Migron ah htale-ghing ka ah phung tu ne om ci, cun cu Gibeah awn kä ng’shawng ci; ani ung ak chang phia chuk om ci.

³ (Shawi phaw kawt ciah taigüpa cu Ahijah ah kyak ci, ani cu Ichabod ah phäi Ahitub ah hta ah kyak ci, Ahitub cu Phinehas ah hta Eli ah tu ah kyak ci, Eli cu Shilon ung Bawipa ah taigüpa ah kyak ci.) Jonathan a hteh cu chang gui naw kä hmat ci gui.

⁴ Michmash sun pah nak, Jonathan naw Philistin gui ah phung ah a hteh nak lam ah, lungsong m’shum akdäm hnih om ci, lam ah vng täng ung tumat ciah om ci. Tumat cu Boaz ah khü ne, tumat cu Seneh ah ami khü ah kyak ci.

⁵ Tumat cu lam ah ak khan lam ah om ne, Michmash täng ah mang ci, tumat ah a htumtäng ah om ne, Geba lam ah mang ci.

⁶ Jonathan naw chang nong am, “Philistin chang hei gui ah phung ah ni va ng’kat khai. Bawipa naw na m’htei goi hman khai; ana m’htei goi ah a kyak ung kä ma ne, näng nak na pe goi khai, mi ken ung phi a i kä kyak khai” cik ci.

⁷ Cun ah chang nong naw, “Na bi nak hlü phung ung, nang awn a täng ah ka om khai” cik ci.

⁸ Jonathan naw, “Bä khai, nik ni ni vakai neta, Philistin gui naw ami na teng gui vai ah.

⁹ Ngami naw mi ging gui vai, mikmi ah lawk khai gui ah ami pyen ung, ni om nak ung ni ging gui khai.

¹⁰ Ami om nak ah ni hteh vai ami pyen ung, ni hteit khai, a i ah kyasei ci ung cun cu ngami ah khan ah näng nak vai Bawipa naw ana pek goi ah ang dang nak ah kyak khai.

¹¹ Cun ah kyasei ngami cu Philistin gui naw ami hmuh goi vai ah om ci goi, Philistin gui naw, “Teng vä, Hebrew chang amshah cu ami ng’thuh nak ah khui ung ka, lut lawk ci gui nei!” cik ci gui.

¹² Ngami naw Jonathan la chang nong cu khü goi u neta, “Sha law ni ä! Kami ning m’thein goi vai om ci nei” cik ci gui. Jonathan naw chang nong am, “Na läk ä, Bawipa naw Israel gui am ngami ah khan ah näng nak vai pe pyi ci nei” cik ci.

¹³ Jonathan cu lam phlän ne a kut khaw ng’vaak ne kai law sei, chang nong naw läk lawk ci. Jonathan naw Philistin gui cu tu ne hnim gui sei, chang nong naw ngawn gui ci.

¹⁴ Ak htük ah ami ngawn nak ung, Jonathan la chang nong naw, khaw bung ät ung chang sing m’ku ng’yän khai ah ngawn ci goi.

¹⁵ Cun ah khohmun ung om ciah Philistin gui cu cäcat yawp ci gui, ng’tuk bi ci gui la gakap gui cu phung kyong ah kyi ne htet ci gui; khomdek thüng ci, ak tung ah thünggüng nak om ci.

Philistin gui Ami Hnim Gui

¹⁶ Benjamin khaw Gibeah ung gaw ngäng ciah Saul ah chang gui naw Philistin gui cu püpiang ne ami dawng cu hmuk ci gui.

¹⁷ Saul naw ak chang gui am, “Gakap gui khei gui ne kä om cicu nami m’dang vai” cik ci. Ngami naw acun ah khei u neta, Jonathan la ki k’htei kawt ciah a chang cu kä om ni sei hmuk ci gui.

¹⁸ Saul naw taigüpa Ahijah am, “Shawi phaw law pui ä” cik ci. (Cun hnüüp ung cun cu Ahijah naw Israel chang gui ah ma ah kawt ci.)

¹⁹ Saul naw taigüpa ang thu püi yah ung, Philistin phung ung ami püipiang thüng kyüng tä law pi k’täi ci, Saul naw ani am, “Bawipa ng’shi ng’täh nak vai akhin kä om ci nei!” cik ci.

²⁰ Cun kawn ah ani la akchang gui cu Philistin gui tuk gui vai ah ng’güüt ne lawk ci gui, ngami cu ami mät ng’tu u ne, ng’tawh pah ci gui.

²¹ Philistin gui täng ah om tu te ciah Hebrew gui la ami phung ah gawk pyi ci gui cu ng’lat ba u ne, Saul la Jonathan ung ng’dawn tu ba ci gui.

²² Amshah gui Ephraim kho m’htung ah ng’thup ci gui naw, Philistin gui ami dawng ah mawng cu ng’ya u neta, ng’dawn law ba u ne, Philistin gui cu tu law tuk ci gui.

²³ Bethaven gawnu a hnu täng avan ung ng’tuk bäng ah kyak ci. Cun hnüüp ung Bawipa naw Israel gui hun gui ci.

Ami Ng’tuk awn ah Amawng Gui

²⁴ Cu hnüüp ung Israel gui cu cawi u ne ami k’tha ken ci, a i ah kyasei ci ung Saul naw ak thukau ah taam ne ak bäi gui cu, “Ka ga gui ah khan ah phu kä ka tuk pha ah chuih tuhngawi a u naw ei kä a ei vai, ei cicu kyuk khai” cik ci. Cun ah kyasei cu hnüüp a u naw ei kä ei ci.

²⁵ Ngami cu bung hmu ah gawk law u neta, khoitui avan ung hmuk ci gui.

²⁶ Sing gui cu khoitui bäng ah be ci, cun ung phi Saul ah taam kyih u ne a u naw kä ei ci.

²⁷ Cun ung phi apa naw chang gui ung taam nak abi cu Jonathan naw kä ng’ya tuk ci. Cun ah kyasei ani naw akawh ah htung awn khoi phiai tawk neta, khoitui cu ei ci. Acun vai am ani cu cüngkhüi ne theek ci.

²⁸ Cun ung phi chang tumat naw, “Keimi kami van cawi ne kami tha ken ci, cun ung phi napa naw k’bäi ne na m’cäi gui ci, “Tuhngawi ei ei ci phung ah khan ah kyuk nak om khai nei” cine m’thein ci.

²⁹ Jonathan naw, “Mi chang gui ah khan ah kapa naw, a i ah kyasei kyih aih vai cu abi ang! Khoitui ei ne a i hlawk ah ka cüngkhüi cu na teng vä!

³⁰ Ga ami tuk pyi ung, mi chang gui naw mi ga gui ah ka, mi gah ah ei, ami ei ung, tuhngawi a i hlawk ah bä pi khai aw. Ngai shüm vä, ngami naw Philistin gui akda ngawn hning khai sü gui te nei!

³¹ Cu hnüüp ung Israel gui naw Philistin gui cu hnim gui ci gui. Michmash la Aijalon ah ng’lak avan ung ng’tuk bäng ah kyak ci. Cun yah pum ung Israel gui cu ei ah cawi u ne, ami tha ken ci,

³² cun ah kyasei ngami cu ga ah kutung ka mi gah ba ah khaw ung ng’güüt ne, lut u ne, htome gui, seipat gui cu ngawn ghet u ne, a sa gui cu, si mah mah ah ei ci gui.

³³ Saul am ami pyen nak cu, “Teng ä, chang gui naw si mah mah ah sa ei u ne, katnak bi ne, Bawipa hnu ng’tuk püi ci gui nei.” “Nangmi cu hnukuk ciah chang gui! Saul naw m’lau ne, “Lungnu akdäm shin ung kei ah

³⁴ ma ah k’täi law vä” cik ci. Cun kawn ah ani naw thu k’bäi ba ne, “Chang gui ah ng’lung ah hteit ne, ami sei gui la ami htome gui van naw ami law püi vai ah m’thein gui vä. Cun gui avan ngawn ne shin ung mi ei khai. Si mah ah sa ami ei nak awn ngami naw katnak bi ne, Bawipa kä hnu ng’tuk püi khai gui.” Cun ah kyasei ami van naw, cu mü ami seipat gui law püi u ne, a cu ah ngawn ci gui.

³⁵ Saul naw Bawipa ah sonkyang co ci. Cun cu a cawh htük bäih ah kyak ci.

³⁶ Saul naw ak chang gui am, “Mü ung mi hteit ne Philistin gui cu mi tu gui khai nei, khaw kä a thaih pha a chuih mi tu gui u ne, mi ngawn gui yawp khai nei. Ngami naw, “Nipi khai na ngaih phung cu na bi vai nei” cik ci gui. Cun ung phi taigüpa naw, “Khanpughi mi shi thäh cang khai nei” cik ci.

³⁷ Cun ah kyasei Saul naw Khanpughi ng’shik ci,” Philistin gui ka hnim gui vai aw? Nang naw näng nak na na pe gui khai aw?” Cun ung phi cu hnüüp Khanpughi naw kä m’shang ci.

³⁸ Cun kawn ah Saul naw chang vai gui am, “Sha law ne, tuhngawi a i katnak a om ah shui vä.

³⁹ Kei naw Israel gui am näng nak pek ciah, ghing ciah Bawipa ung shai ka tak ci, cheishoh ciah chang cu ngawn vai, ka hta Jonathan ah a kyak ung phi” cik ci. Cun ung phi a u naw a i kä pyen ci.

⁴⁰ Cun kawn ah Saul naw ngami am, “Nangmi nami van cä ah nami ng’düih vai, kei la Jonathan cu shi ah ka ni düi khai” cik ci. Ngami naw, “Ni pi khai ah na ngaih phung cu na bi vai nei” cik ci gui.

⁴¹ Saul naw, Bawipa, Israel gui ah Khanpughi ah ma ah “Bawipa, a i ah kyasei tuhngawi kä na na m’shan ang? Bawipa, Israel Khanpughi, theingcim ciah lung gui awn na m’shang ä. Cheishoh nak cu Jonathan ah baw, kei ah baw a kyak ung, Urim awn na m’shang ä; na chang Israel gui ah a kyak ung Thummim awn na m’shang ä” cik ci. Am shan nak naw Jonathan la Saul cu m’dang ci; cun kawn a chang gui cu ci ci gui.

⁴² Cun kawn ah Saul naw, “Kei la kahta Jonathan ah ng’lak ung ng’thumcha nak bi ä” ci sei, Jonathan cu m’dang ci.

⁴³ Cun kawn ah Saul naw Jonathan am, “A i ang na bi” cik ci. Jonathan naw, “Htungka kawh cawn tawk ne, khoitui api hta ka ei ci nei. Shin ung kei ka si ge khai ah ka om ci nei” cik ci.

⁴⁴ Saul naw ani am, “Nang kä na sih ah a kyak ung, Khanpughi naw kei na m’sih sä!” cik ci.

⁴⁵ Cun ung phi chang gui naw Saul am, Jonathan, Israel gui ah phäh ah dämduh ciah näng nak gah ci cu, sih sak vai ma? Ka! Kei mi naw ghing ciah Bawipa ung shai kami tak ci nei, ani ah lu ung lumu ng’ma ät phih kä maih sak vai nei. Tuhngawi ani ah bi phung cu Khanpughi ah m’htei nak awn na kyak ci ne,” cik ci gui. Cun ah kya ne, chang gui naw Jonathan cu sih nak ung hun ci gui.

⁴⁶ Cun kawn ah Saul naw Philistin gui cu kä gawt ba gui sei, ami mät ah khaw phäh phäh ah hteit ba ci gui.

Saul ah Uknak la Akyongkhui

⁴⁷ Saul naw Israel ghangpughang ah a kyak law kawn ah akhaw päng ung a ga gui avan cu tu gui yawp ci: Ammon la Edom, Moab chang gui, Zobah la Philistin ghangpughang gui. Atuk nak päng ah ani cu näng ci.

⁴⁸ Ani naw m’gäi ne tu gui ne, Amalek chang gui phi näng gui ci. Ani naw Israel gui cu ng’tuk nak avan ung hun gui ci.

⁴⁹ Saul ah hta gui cu Jonathan, Ishvi, Makhishua, A hta hnumi ang vai ba ah ming cu Michala ah kyak ci.

⁵⁰ Achu cu Ahinoam, Ahimaaz ah hta ah kyak ci; a gakap bawi cu amät ah nau m’shum Abner ah kyak ci, apu khaw Ner ah hta ah kyak ci.

⁵¹ Saul ah pa Kish la Abner ah pa Ner cu Abiel ah hta goi ah kyak ci.

⁵² Philistin gui cu Saul naw a ghin ah chuih akgat ah a tuk gui vai ah kyak ci. Cun ah kyasei a i yah ung phi, ani naw gai ne, m’gäi ciah pami a hmuh phung cu, a gakap ung luh sak ci.