1 SAMUEL 12 - Cho Bible Common Language 2016

Samuel naw Chang gui Pyen nak ci

¹ Samuel naw Israel chang gui am, “Kei naw ka bi vai ah nami na k’thäh cu ka bi pyi ci nei. Ning uk gui khai ah ghangpughang ka ning pe gui pyi ci nei,

² Tuhbäi ning chuiso gui khai ani om ci. Kei ka mät cu, ka ghi ci, ka ng’pyok ci, ka hta gui cu nangmi awn a täng ah om ci gui. Kei cu ka hmaw yah ung tün ne, tuhbäi ung khüt sei nang mi ah chuisotu ah ka kyak ci.

³ Shin ung ka om ci. Hma nak ka bi a om ah a kyak ung, Bawipa la ani ah ghü ghangpughang ma ah kei cu na chah vä. Kei naw chang ah sei, chang ah la, ka lak om man ne ang? Kei naw chang aka m’hteihlak ka yawshe nak om man ne ang? Chang tumat mat ah ng’mü khawh ka dou om man ne ang? Cun ah mäih gui ka bi a om ah a kyak ung, kei naw ka lak phung cu ka m’thung ba yawp khai nei.

⁴ Chang gui naw, “Ka, nang naw kä na na m’hleei gui man ci, kä na na yawshe na gui man ci; nang naw a u ah ka, a i phi kä na la man ci,” cik ci gui.

⁵ Samuel naw pyen ba ne, “Kei chang ni akbe ah ka kiak, nangmi naw nami na hmuh nak ah mawng ung, Bawipa la aghü ah ghangpughang cu tuhngawi saksi ah kyak khai goi” cik ci. Ngami naw, “Ä, Bawipa cu mikmi ah saksi nei” cik ci gui.

⁶ Samuel naw, “Bawipa cu Moses la Aaron ghü goi ciah kyak ci, Egypt ah ka nami pupa gui phi law püi ba gui ci.

⁷ Tuhbäi nami om nak ung nami ng’düih vai, nami pupa gui la nangmi ning hun gui khai ah Bawipa ah küika ciah hnün thawh nak avan ka ning m’shüm thein nak ba gui ah Bawipa ah ma ah kei naw ka ning chah gui khai.

⁸ Jakob la akyong ung ka gui Egypt khaw ah ami hteh yah ung, Egypt chang gui naw yawshe na gui ci gui, nami pupa gui naw Bawipa naw am htei gui vai ah k’thäh ci gui, ani naw Moses la Aaron cu tüi goi ci, ngami naw Egypt ung ka law püi ba gui ne, shui ah khaw ung om sak gui ci.

⁹ Cun ung phi chang gui naw Bawipa ami Khanpughi cu m’hnih ci gui. Cun ah kyasei ani naw Philistin gui, Moab ghangpughang Sisera, Hazor mang gaw ung gakap bawi cu lam shüm gui ne, nami pupa gui cu ng’tuk püi gui sak ne, näng sak gui ci.

¹⁰ Cun kawn ah Bawipa naw am htei gui vai ah m’lau u neta, “Keimi kami hma ci, a i ah kyasei ci ung, keimi naw nang kami ning hlah tak ci, Bawipa, keimi naw Baala la Astarte gup cu kami khawihnah ci. Kami ga ung ka nak phyawn gui ä, keimi naw kami ning khawihnah khai!” cik ci gui.

¹¹ Cun ung Bawipa naw Gideon, Barak, Jephthah la ak hnu ah kei cu na tüi gui ci. Keimi tumat ci naw nami ga ung ka, kami ning hun gui ci, nangmi phyawng ne nami om ci.

¹² Cun ung phi Ammon ghangpughang Nahash naw ning tu law gui khai ah hmu u neta, nangmi naw nami ghangpughang ah, Bawipa cu nami hnu ng’tuk püi ci, cun kawn ah kei ah ma ah, “Na uk gui khai ghangpughang kami ng’ya hlük ci” nami cik ci.

¹³ Tuhbäi shin ung nami ghü ah ghangpughang nei; nangmi naw nami thäh, tuhbäi Bawipa naw a ning pek gui nei.

¹⁴ Bawipa nami Khanpughi cu nami m’tamkhah ah a kyak ung, abi nami b ung, nami ngaih ung, ang thumkhän nami läk ung, nangmi la nami ghangpughang naw a hnu nami läk ah a kyak ung, avan cu nangmi ung ni bä yawp khai.

¹⁵ Cun ung phi Bawipa ah thu kä ngai ne, a thumkhän kä nami läk ah a kyak ung, ani naw nangmi la nami ghangpughang cu ning hnu ng’tuk püi gui khai.

¹⁶ Cun ah kyasei, nami om nak ung nami ng’düih vai, cun ung nangmi naw Bawipa naw abi law vai ah dämduh ci gui cu nami hmuk khai.

¹⁷ Shin cu kho cha ah kyak ci, kä kya ne ang? Cun ung phi kei ka taigü khai. Bawipa naw kho hmun la kho aa tüi lawk khai. Shin gui a kyak law ung, nangmi naw Bawipa hnu ng’tuk püi ne dämduh ciah katnak nami bi cu nami hmat ba khai.

¹⁸ Cun ah kyasei Samuel taigü ci, acun hnüüp ung Bawipa naw kho hmum la kho k’aa tüi lawk ci. Chang avan naw Samuel la Bawipa cu kyih ci gui.

¹⁹ Cun kawn ah ngami naw Samuel am, “Na bä ni saza, keimi ah phäh ah Bawipa na Khanpughi ah na taigü pe gui vä. Cun ung keimi kä kami shik khai. Keimi naw kami hmat lawk ci, kami hma gui avan ah kawn ah ghangpughang kami thäh nak awn kami hma ba mä ci nei” cik ci gui.

²⁰ Samuel naw, “Kä nami kyih vai, nangmi naw akshe nami bi pyi pang ung phi, Bawipa kä nami ng’hlah tak en vai, nami m’lung avan awn abi nami bi vai.

²¹ Khanpughi she gui ah hnu ah kä nami hteh tu vai; ngami naw kä ning m’htei gui hning khai, kä ning hun gui khai, ngami cu akcang ah kä kyak ci gui.

²² Bawipa naw thuk ng’kau ciah shaitak bik ci, ani naw kä ning nawng gui khai, ani naw amät ah chang ah ning pyang gui khai ah k’bäi pyi ci.

²³ Kei ah phäh ah, Bawipa naw ana taa cu, nangmi ah phäh ah kä taigü ba nak awn, ani hnu ng’tuk püi ne kei ka hma nak ah kyak ci. Acun nak vai sü ung, kei naw ka ning m’thein gui vai cu nangmi ah phäh ah nik ci la düng ci nami bi vai ah kyak ci.

²⁴ Bawipa läk ne, nami m’lung kyong avan awn bekhüt ne abi nami bi vai. Nangmi ah phäh ah küikyang ciah bi abi cu nami shüm ba vai.

²⁵ Cun ung phi katnak nami bi lä ah a kyak ung, nangmi la nami ghangpughang cu ning m’di gui khai,” cik ci.