1 SAMUEL 11 - Cho Bible Common Language 2016

Saul naw Ammonit gui cu Tudep gui ci

¹ Cha ät alüng kawn ah Ammon ghangpughang Nahash naw a gakap gui m’tho ne, Gilead kho, Jebesh gawnu cu hnu ng’tuk püi ne khaai ci. Jebesh chang gui naw Nahash am, “Ng’gei nak na bi püi gui ä, cun ung kami uktu ah kami ning dou khai nei” cik ci gui.

² Nahash naw, “Amawng tumat ung, kei naw nangni awn ng’gei nak ka bik khai: Kei naw chang päng ah k’pat lam mik cu ka kawih khai, Israel avan ung thüi sei nak ka law püi khai” cik ci.

³ Jebesh ah ami ng’vai gui naw, “Israel kho avan ung ng’shächang tüih nak vai ah akkhin hnüüp chih na pe gui ä. A u naw kä a na kugam tu gui ah a kyak ung nang ah ma ah kut kami chah khai” cik ci gui.

⁴ Ami chang tüih gui cu Saul ah om nak Gibeah ah gawk law u ne, a mawng cu m’thein gui u khäta chang gui cu om k’she ne kya ci gui.

⁵ Saul cu atuhbäi hta, a seipat awn a lai ah ka law neta, ang shi gui cu, “A i ang a hma, a i ah kyasei chang päng a kyah ang?” cik ci. Ngami naw Jebesh ah ka chang ami tüih law gui ah ng’thu pyen cu m’thein ci gui.

⁶ Saul cu cun ng’ya neta, Khanpughi ah mümcha naw k’pang sei, m’lung she lawk ci.

⁷ Ani naw vantang hnih la ne, akhui ah kyük neta, Israel kho avan ung chang gui tüi ne, meh kyük cu hteh püi sak gui neta, shin ah ng’thu m’khäh gui ci: Ng’tuk nak vai ah Saul la Samuel kä läk tu ciah chang phung naw avantang cu ashin ah mäih ah a ci vai nei. Israel chang gui naw Bawipa naw a bi law vai cu kyih u neta, ami van, a u kä pawih sei, a täng ah lut lawk ci gui.

⁸ Saul naw Bezek ung bum sak gui ci: Israel ung ka chang 300, 000 lawk ci.

⁹ Ngami naw Jebesh ah ka lawk ciah changtüih gui am, “Nami chang gui m’thein ba gui vä, ngawi ung kho kä a hnüüp pha ung ngami cu phyawng khai gui nei” ci na gui ci gui. Jebesh chang gui naw cun ah ng’thu gah u neta yei aih ci gui.

¹⁰ Ngami naw Nahash am, “Ngawi ung nang ah ma ah kut kami chah khai nei, nang naw a i phi na ng’ya hlü keimi ung na bi hning ci nei.”

¹¹ Cumü Saul naw achang gui cu thum ah k’pai gui ci. Kho thaih ung ngami naw ga ah phung cu buuk u ne, Ammonit gui cu hnim gui ci gui. Kho hnüüp law sei ami khli ngawn gui ci gui. Ak pawih gui cu püi ci gui, achang sing ami mät phäh phäh dawng ci gui.

¹² Israel chang gui naw Samuela am, “Saulu cu mi ghangpughang ah kä kyak khai ah pyen ciah chang a u ang a om ba? Keimi am na ap gui vä, keimi naw kami ngawn gui khai nei!

¹³ Cun ung phi Saul naw, “Tuhngawi hnüüp ung a u phi kä ngawn vai nei, tuhngawi cu Bawipa naw Israel gui a hun nak ah ka kyak ci nei.”

¹⁴ Saul naw ngami am, “Gilgal ah mi van mi hteit khai nei, Saul cu mi ghangpughang ah mi ng’shäu ba mä khai nei,” cik ci.

¹⁵ Cun ah kyasei ami van Gilgal ah hteit u ne, a cu ah theing ciah hmun ung Saul cu ghangpughang ah ng’shäu ba ci gui. Ngami naw hmuh chum-khawihnah nak cu dou thak u ne, Saul la Israel chang avan naw cun ah mawng cu bik ci gui.