1 SAMUEL 10 - Cho Bible Common Language 2016

¹ Cun kawn ah Samuela naw, Olive situi um cu la ne, Saul ah alu shawi ne, ani cu ng’ui neta, “Bawipa naw nang cu ak chang Israel gui uktu ah ning phyuh theh ci nei. Nang naw ani ah chang gui cu uk gui ne, ami ga avan ung na shung vong gui vai. Shin cu Bawipa naw ak chang gui uktu ah a ning ghü ah mawng sak si m’dang nak ah kyak ci nei.

² Tuhngawi kei na hteh ta ne, na hteh law ba ung, Benjamin khaw, Zelzah pigaw, Rachel ng’cim hmun pei ah chang hnih na hmuk khai. Ngami naw nani shui ba ah la gui hmuh ba pyi ah mawng ning m’thein khai gui, cun ah kyasei, cun gui ah phäh ah na pa kä ng’ä ba khai. Cun ung phi nang ah phäh ah ng’ä khai, ani naw, “Ka hta ah phäh ah a i ka bik khai ang?” cik khai.

³ Nang cu cun ungka naw na hteit khai, theing ciah sing ghing ah om nak Tabor ah kä na law pha ah chuih, cun ah lam ung, Bethela pigaw ah Khanpughi am khawihnah nak douthak khai ah ana lawk ciah chang thum cu na hmuk khai. Chang tumat naw me nong thum so khai, tumat naw m’htut pum thum kawt khai, tumat naw sapyit tui be ciah ng’ip k’bah khai.

⁴ Ngami naw ning yavaih nak khai gui, m’htut pum goi ning pek khai gui, cun cu nang naw na dou vai.

⁵ Cun kawn ah nang cu Gibeah ah Khanpughi ah khaw gui ah ni hteh vai, acu ah Philistin gui ah phung om ci. Gawnu ah luh nak m’kawt ung, khaw gui ah sonkyang ah ka kyum law ba ciah prophet bum ät awn nami ng’hmuk khai, ngami cu tingtäng ni, k’hting ni, phyung lawi ni, tingtangnu ni tum ci gui. Ngami cu ng’lam khai gui, m’lau khai gui.

⁶ Ang ghit ah Bawipa ah mümcha naw ning pang khai, nang cu yum nak ung lam nak la m’lau nak ung na ng’pawng tuk khai, nang cu hnga ciah chang ah na kyak khai.

⁷ Shin gui a kyak law ung Khanpughi naw na bi vai a ning m’shüm phung cu na bi vai.

⁸ Nang cu Gilgal ah ma ne na na hteh vai, a cu ah ning hmuk khai, m’khih ne khawihnah nak la ng’gei-chum nak khawihnah mi bik khai. A cu ah kei kä ka law pha ah chuih hnüüp chih na na ngäng vai, a i bi vai ka ning m’theing khai.

⁹ Saul naw Samuel hteh tak khai ah ang hlah law yah ung Khanpughi naw Saul am ng’nei an nak akthai pek ci. Samuel naw am thein gui phung cu a cu hnüüp kya yawp ci.

¹⁰ Saul la achangshäm cu Gibeah ah ani gawk law yah ung prophet bum naw hmu lawk ci gui. Ang ghit ah Khanpughi ah mümcha naw ani cu k’pang ne m’lau tuk ci.

¹¹ Ani hmat pyi man ciah chang gui naw shin ah a kyak tu cu hmuh u neta, ami mät ng’shi tuk ci gui. “Kish ah hta cu a i ah ang a kyak law? Saul cu prophet ah kya law ne ang?” cik ci gui.

¹² Acun ung om tuk ciah chang tumat naw ang shi cu, “Shin ah a hei prophet gui mä, a i hawkcha ah ang ngami ah ami pa gui cu a u gui ah nami ngai ne ang?” Shin ah ami ng’thu ah aphung cu, “Saul phi prophet ah kya law tu ne ang?” cik ci gui.

¹³ Saul cu ng’lamtu yawp ne, m’lau tu yawp neta, khogui ah sonkyang ah om nak ah hteit ba ci.

¹⁴ Saul ah a pukho naw Saul la a changshäm cu hmu goi neta, “A hawi nani kyak ciang?” cine ng’shi goi ci. Saul naw, “La gui kami shui ba ci” cik ci. Shui ne kä hmu ba hlawt neta, hteit ne Samuel ka ni hmuk ci” cik ci.

¹⁵ Saul ah a pukho naw, “A i ang a ning m’thein goi” cine ng’shik ci.

¹⁶ Saul naw, “Ani naw, la gui hmuh ba pyi ne” cine na m’thein gui ci, cun ung phi ani ghangpughang ah a kyak law ah mawng Samuel naw a pyen nak cu Saul naw a pukho am kä m’thein ci.

Saul Cu Ghangpughang ah M’tam ne Dou ci Gui

¹⁷ Samuela naw chang gui cu a täng ah khü gui ne, yum na tängaw Mizpah ung ng’bum sak gui ci.

¹⁸ Ani naw ngami am, “Bawipa Israel gui ah Khanpughi naw pyen ci, “Kei naw Egypt ah ka, ka ning law püi ba gui ci, Egypt chang gui la, ning shedam na gui ciah a hei chang gui ah kut ung ka, ka ning phyawn gui ci.

¹⁹ Kei cu nami na Khanpughi, nami khüikha nak la nami geinvai nak avan ung ka ning hun gui ci, cun ung phi tuhngawi nangmi naw na hnu ng’tuk püi u ne, ghangpughang ka ning pek gui vai ah nami na k’thäh ci. Cun ung bä aih khai, nami van a täng ah pakhui ah si, pa ng’pai ah si ah, Bawipa ah ma ah nami ng’bum vai” cik ci.

²⁰ Samuel naw apakhui päng cu ma lam ah law sak gui ci, Bawipa naw Benjamin pakhui cu khui gui ci.

²¹ Cun kawn ah Samuel naw Benjamin pakhui ung kyongkhui gui cu malam ah law sak gui ci, cun ung ka Matri kyong cu khui ci. Cun kawn ah Matri kyong pami gui cu malam ah lawk ci gui, cun kawn ah Kish ah hta Saul cu khui ci. Ngami naw ani cu Shui ci gui, kä hmu u neta,

²² Bawipa cu ng’shik ci gui, “A hei chang kä om ba ne ma?” Bawipa naw, “Saul cu ca om ci, i baw gui ah hnu ah ng’thup ci nei” cik ci.

²³ Cun ah kyasei Saul cu dawng ne va la ne chang gui ah ng’lung ah law püi ci gui, ani cu chang avan ah ta alu ak phleing awn ng’sau pi sei hmuk ci gui.

²⁴ Samuel naw chang gui am “Shin ah chang cu Bawipa naw a ghü nei! Ani ah mäih mikmi ung a u kä om ci nei” cik ci. Chang avan naw m’lau ne, “Ghangpughang ghi ne ghing sä” cik ci gui.

²⁵ Samuel naw ghangpughang ah chaw vai la abi van gui cu chang gui am, m’thein gui ci, theing cim ciah hmun ung a phu küi a ap gui cu, ca awn guk ci. Cun kawn ah ak chang sing im ah tüi ba gui ci.

²⁶ Saul cun phih Gibeah a im ah hteit ba ci. Huham ah ciah chang amshah gui cu Khanpughi naw ami m’lung tawn pe gui sei, ani awn atänga hteit tuk ci gui.

²⁷ Cun ung phi chang pyawipye gui naw, “Shin ah mi mät ah mäih chang naw a i hawi ah akni na bi pe gui hning khai aw?” cik ci gui. Ngami naw Saul cu päipih u ne, m’cümhnah nak a i phi kä law püi ci gui.