1 SAMUEL 1 - Cho Bible Common Language 2016

Shilon ah ka Elkanah la Akyongkhui

¹ Elkanah ming nak ciah chang tumat om ci, ani cu Ephraim pakhui ah kyak ci, Ephraim kho m’htung nawi Ramah gawnu ah om ci. Ani cu Jeroham ah hta Elihu ah tu ah kyak ci, Tohu kyong khui, Zuph pa ng’pai ung ka ah kyak ci.

² Elkanah naw hnih chu nak ci, Hannah la Peninnah ah kyak ci. Peninnah cu a hta om ci, Hannah cu a hta kä om ci.

³ Akum tä sei Elkanah cu Ramah ah ka naw Shilon ah hteit ne, Bawipa a hlüngtai cu khawihnah ne khawihnah nak phi douthak ci. Acu ah Eli ah hta goi, Hophni la Phinehas cu Bawipa ah taigüpa ah

⁴ kyak ci goi. Elkanah naw a hteh päng ung khawihnah nak cu dou thak ci, ani naw meh k’büm ät cu Peninnah am pe ne, bum ät cu a hta gui am tei gui ci.

⁵ Ani naw Hannah cu m’hni aih ne, bum ät a pek pang ung phi, Bawipa naw ani cu kä hta sak ci.

⁶ Peninnah, ani ng’längna püi ci naw, cümbawng sak ne, lü ng’a sak ci, a i ah kyasei ci ung Bawipa naw ani cu kä ah hta sak ah phäh ah kyak ci.

⁷ Kum law ba kum law ba sei acun ah kyak ci; ngami Bawipa ah im ah ami hteh päng ung, Peninnah naw Hannah cu tüihtok ci, cun ah kyasei, ani cu kyap ne, ei noi ci.

⁸ A cei Elkanah naw ng’shuk ci, “Hannah, a i ah kyasei na kyah? A i ah kyasei ei kä na ei? A i ah kyasei angtäi sei na thüi? Htapami sing gha ah ta, kei ka kuikyang pi ciah kä kya ne ang?

Hannah la Eli

^9-10 Hnüüp ät ung Shilon ah Bawipa ah im ung ngami cu ei ami ei kawn ah, Hannah cu tho lawk ci. Ani cu thüi aih neta, akha ah kyap ne, Bawipa ah taigü ci. Cun yah ung, Taigüpa Eli cu m’kawt pei ah, a ngoh nak ung ngok ci.

¹¹ Hannah naw akthuuk ah shaitak ci: “Ak hlüngtai Bawipa, na teng ä, na changshäm! Ka khüikha nak cu na hmuh pe ne, na shüm ä! Kä na m’hnih ä! Htapa na na pek ah a kyak ung, a ghin nak avan cu nang am ka ning ap khai ah shai ka tak ci nei, ani naw a lusam cu kä at phung khai nei.

¹² Hannah cu k’täi ne aksho Bawipa ah taigü ci, Eli naw ani ah m’gawng cu teng ci.

¹³ Ani cu adüm ah taigü lä ci; am ni cu hnün ci, cun ung phi ak aw kä lut lawk ci. Cun ah kyasei Eli naw ani cu awktat ciah ngai neta,

¹⁴ ani am, “Namät awktat ne na kyak nak cu ng’düm ä! Na awk cu ng’dü ä, ng’htei ä!”

¹⁵ “Ka, Saza, kei kä ka awktat ci nei, a i kä ka awk ci nei! Kei ka geinvai ci, ka taigü ci, ka khüikha nak cu Bawipa ung ka lawn ci nei.

¹⁶ Hnumi i baw düt ah kä na ngai en ä. Kei shin ah mäih ah ka taigü ci, a i ah kyasei ci ung, kei ka thüi aih ci.

¹⁷ Eli naw, “Dimdeeih nak awn hteit ä, nang naw na k’thäh cu Israel Khanpughi naw ning pe sä,” cine m’shang ci.

¹⁸ Ani naw, “Nang naw ak phlüt ah kei cu na m’gein ä” cik ci. Cun kawn ah ani cu a hei ah hteit ne buh ei ci, kä thüi ba ci.

Samuel ah Ng’Tüi la Ng’Apnak

¹⁹ A ngawi ung kho ngawi Elkanah la akyong ung ka gui cu hang kai ngawi u ne, Bawipa ami khawihnah kawn ah, Ramah, ami im ah hteit ci gui Elkanah cu akchu Hannah awn ng’yaw ni neta, Bawipa naw ani ah k’taigü cu m’shang ci.

²⁰ Cun ah kyasei ani cu käu mah ne pami hta ah hta lawk ci. Aming cu Samuel ah sui ci, a mawng cu, “Ani ah phäh ah Bawipa ah ka taigü ci.”

²¹ Akhin gawk law ba ci, Elkanah la akyong ung ka gui cu, Shilon ah hteit ne, khokum khawihnah nak cu Bawipa am douthak u ne, ani naw shai a tak ah abä pi ah khawihnah nak phi ap ci gui.

²² Cun ung phi cun ung Hannah kä hteit tuk ci. Ani naw a cei am, “Ak hmaw tui tui kä a awk ba vai am, ani cu Bawipa ah im ah ka hteh püi khai, a ghin ah chuih a ca om khai,” cik ci.

²³ Elkanah naw, “Bä khai, ni pi khai ah na ngaih ah na bi vai nei; Tui tui na tu ah chuih im ah na om püi vai nei. Bawipa naw na shaitak cu bä khai ah bik khai nei. Na shaitak cu akcang ah bä khai ah Bawipa naw bi sä,” cik ci. Cun ah kyasei Hannah cu im ah om ne ak hmaw m’htei ci.

²⁴ Ani naw tui tui kä a tu ba kawn ah Shilon ah hteh püi ci, kum thum lawk ciah seipat, m’htut den phawi gha la yu tui um ät phi hteh püi ci. Ani naw ak hmaw hta Samuel cu Shilon ah Bawipa ah im ung hteh püi ci.

²⁵ Ngami naw seipat ami ngawn kawn ah ak hmaw cu Eli ah hteh püi ci gui.

²⁶ Hannah naw ani am, “Saya, na ngaih pe ä. Kei cu na na shüm ba ne ang? Kei cu shin ung düi ne Bawipa ah taigü ngä sei, na na hmuh ah hnumi nei.

²⁷ Kei naw shin ah hmaw ah phäh ah ka ng’zoi thäh ci, ani naw ka yoi thäh cu na pek ci.

²⁸ Cun ah kyasei kei naw Bawipa am ka ap ci. Ani a ghin ah chuih, ani cu Bawipa naw khäm khai” cik ci. Cun kawn ah ngami naw a cu ah Bawipa cu khawihnah ci gui.