1 PETER 5 - Cho Bible Common Language 2016

Khanpughi ah Htomebum

¹ Kei ka mät ah mäih ah khrithabum ung ang vaihta gui cu ka ning m’cäi gui ci nei. Bawi Khrit ah geinvai nak ah mawng saksi ci la dang lawk khai ah abämang nak ng’pai tuk ciah chang ah ka kiak nak awn ka ning m’cäi gui ci nei.

² Khanpughi naw a ning ap gui ah htomebum cu, htomeshäm ah kya ne nami ngäng vai nei. Bi vai kyasei bi ah kä kyak ciah, Khanpughi ah khuut ah kyasei ng’yak hlü nak awn nami bi vai nei. Nami bi cu ng’cheng gah hlü ah m’lung awn kä kyak ciah, bi nak hlü ah m’lung cang awn nami bi vai nei.

³ Nami kut ung ng’ap ci gui uk vai ah kä nami tha nak vai, htomebum ah thei tu vai ah nami om vai.

⁴ Ang vaipi säih Htome uk ciah Bawipa ang dang law ung, angtäi ah pyü ne ng’shü ciah abämang nak ah ghui lukhu cu nami gah khai nei.

⁵ Acun ah mäih ah nang ak hmawk chang gui naw phi ang vai gui ah thu cu nami ngaih vai. Tumat la tumat nami ng’hteihtang nak tu ung, nami van naw m’lung neim nak ah sui cu nami sui vai. Cacim theing naw, “Khanpughi naw chang ah ng’shei cicu hnu nah ne, am lung neim sak ci cu, chang m’sui ci nei,” ciah om ci.

⁶ Khanpughi ah hlüngtai säih ciah a kut kaa ah nami mät naw nami mät ng’neim sak ne om vä, cun ung Khanpughi naw ni pi ciah akhin ung ning yu chang gui khai nei.

⁷ Nami cäicat ng’ä ai nak phung avan ap vä, Khanpughi naw ngaih nah ne ning m’htei gui ci nei.

⁸ Cüivai vä, geing nah ne ngai vä! Na mi gaa, Khoshe cu, m’ngawk ciah kawnghlui ah mäih ah, a u ka bai khai ang cine ng’shui shüi shüi ci nei.

⁹ Nami yum nak khänhtek sak ne khüighaat ne om vä, a i ah kia sei ci ung, na mi hmat pyi ah mäih ah, m’dek ah khan ung khritha gui cu, geinvai nak ung ami yaica ah hmawk ah kiak ci.

¹⁰ Cun ung phi nangmi cu cun ah geinvai nak a shänghta nami aut kawn ah, M’Gein nak ah Khanpughi, Bawi Khrit ung ning kawng ät sak gui ne, ng’täi ciah abämang nak ning k’pai tu gui khai ah ning khü gui ciah Bawipa naw, nangmi cu ning kümbe sak gui ne, ng’khäntaang nak, k’thamah nak la khüighaat nak ung ning khanhtek sak gui khai nei.

¹¹ Ani ah khan ah hlüngtai nak angtäi ah om sä! Amen.

Ak Hnubäih ah Yavaih Nak

¹² Shin ah ca k’tawi hta cu Silas ah nak khüi vong nak awn ka ning guk law gui nei. Ani cu bekhüt ciah khritha phäunau ah, kei naw ka yum ah kyak ci nei. Shin ah ca cu kei naw k’tha gui ka ning peit nak gui hlü la, shin cu Khanpughi ah m’gein nak akcang ah kiak ci, cicu ka saksi nak ah kyak ci nei. Cun ah m’gein nak ung khäng sei ng’düi vä.

¹³ Nangmi ah mäih ah Khanpughi naw a ghü gui ah Babilon khrithabum gui naw phi ning yavaih nah gui ci gui nei, ka hta Makuh naw phi ning khaih na gui ci nei.

¹⁴ Tumat la tumat khritha yumhni nak awn ng’ui hnam tu ne, ng’khaih na tu vä. Bawi Khrit ah chang ah nami kyak ciah, nami van ah khan ah dimdeeih nak om sä.