1 PETER 3 - Cho Bible Common Language 2016

Chu La Cei

¹ Acun ah mäih ah, hnumi gui, nami cei ah pyein ah nami om vai nei. Cun ung vah nami cei naw Khanpughi kä ah yum tu te ah a kiak ung phi, nami om ih hnünthawh naw thu m’kha ät kä nami pyein ung phi, yum law tu sak khai nei.

² A i ah kyasei ci ung nami m’lung ah theing nak la nami chang m’sui nak cu ngami naw hmu lawk khai gui.

³ Pumsa ah kiomsang nak ah kyak ciah, luhmai nak, äh awi nak, suisak nak düt awn kä ng’bi ng’lawh u ne;

⁴ nami m’lung kyong ung akcang ah ng’awi ng’gi nak la hniphnoi nak cu om sä, cun cu Khanpughi ah ma ah ak küikyang ah kyak ci nei.

⁵ Cau Khanpughi ung ng’ap u ne, Khanpughi yum ciah hnumi gui cu, a cun ah mäih ah ng’bi lawh u ne, ami cei ah thu cu ngai ci gui nei.

⁶ Sarah cu Abraham ah ng’thu ngai ne, a cei cu, “Ka bawi yoi,” ci ne khü ci. Nangmi cu kyihkyawk nak kä om sei, ak ni ah nami om ah a kyak ung, ani ah hta gui ah nami kyak khai.

⁷ Acun ah mäih ah nangmi pami gui naw phi nami chu gui cu, ami thagui ken ci kyasei, ami m’lung ngaih hmat ne nami k’dük gui vai. Ngami cu Khanpughi ah nam shumphyuk gui ah ghin nak, nangmi awn a täng ah gah tuk khai gui ah kyasei, chang m’sui ne nami om püi gui vai nei. Cun ah nami bi ung vah nami taigü nak hnaihnawk nak a i kä om khai.

Düng Ci Bi Nak awn Geinvai Nak

⁸ Ak hnu ah ka pyein hlü cu, nangmi cu m’lung ät, ngaih ät ne nami om vai; phäi nau ah mäih ah ng’yumhni tu u ne, m’lung neim nak la chimgein nak awn nami om vai.

⁹ Akshe cu akshe awn kä thung ne, ak kaa cu ak kaa awn kä nami sah vai, cun nak vai sü ung m’shumphyuk nak nami peit vai, a i ah kyasei ci ung, m’shumphyuk nak cu, Khanpughi naw a ning khü gui yah ung a ning peit gui vai ah a shaitaak ah kyak ci.

¹⁰ Cacim theing ung, “Ak ding ak gei ah ghing ne, akni ak kyom ah om hlük ciah chang naw, ang thu m’gawng cu a khäm vai, am leidang ung hleeihlak nak kä a om men vai.

¹¹ Ani cu akshe ng’hlah tah ne akni a bi vai: Dimdeeih nak a om vai ah am lung kiong avan nawn Ak tha nak vai.

¹² A i ah kyasei ci ung Bawipa naw chang k’ni chang k’veih gui cu, Ngäng gui ne, ami taigü cu ngai gui ci. Cun ung phi akshe bik ci gui cu ng’hlah ta gui ci.

¹³ Akni nami bi ung a u naw nangmi cu kä ning kawng gaa na gui khai nei.

¹⁴ Cun ung phi akni nami bi ah hmawk ah ning shedam nah gui ci a om ung, yeikyai vä, kä kyikyawk en vä, kä ng’ä ng’ai en vä.

¹⁵ Nami m’lung kyong ung Bawi Khrit cu kyih aa u ne, Bawipa nei ci ne m’tamkhah vä, Ani yum ne nami ngaih u ah mawng ning shi gui ci a om ung, nami m’thein tu ge thei vai ah nami om vai nei.

¹⁶ Cunung phi ng’awi ng’gi nak la chang m’sui nak awn nami bi vai nei. Nami m’lung cu theing sak vä, cun ung bawi Khrit ah chang ah kia ne, akni nami bi lawh, ning päipih gui ciah chang gui cu, thui ng’aa khai gui nei.

¹⁷ Khanpughi naw ang yak hlü a om ung, akni bi netah gein vai nak cu, akshe bi netah geinvai nak ah mä bä tu ba ci.

¹⁸ A i ah kyasei ci ung chang khli van ah hmawk ah Bawi Khrit naw ang bäng ah a sih nak cu, changshe gui ah hnün ung chang k’ni naw ak chaw ah kyak ci. Cun cu Khanpughi ah lam a ning m’shüm nak gui ah kyak ci. Bawipa cu pumsa awn sih nak a gah ung phi, Mumcha awn ghing ne tho ba ci.

¹⁹ Mumcha awn a ghin nak awn thawng kyum ci gui ah mümcha ah hteit ne thu pyein ci.

²⁰ Cun ah mümcha gui cu Noah naw hteinpaw im a cawh yah ung, hnimgein nak awn ngäng gui ciah Khanpughi ah ng’thu cu kä läk ci gui ah kyak ci. Cun ah tui ung hteinpaw kyong ah om ciah chang sing cheit htabäng cu hun nak gah ci gui.

²¹ Tui cicu tuhbäi nangmi ning hun gui ciah tuihniim nak ah kiak ci. Tuiniim nak cicu pumsa alelawi m’sipyou ah kä kyak ci, m’lung ngaih ni awn Khanpughi ah shaitaak nak bi ah kyak ci. Bawipa Jesuh Khrit sih nak ungka a thawh nak ba awn, tuiniim nak awn hun nak nami gah ci.

²² Ani cu Khan mawpi ah hteit ba ne, Khanpughi ah k’patlam ah om ne, khanchang gui la khankho ah huham la hlüngtai nak gui cu avan uk ne om ci.