1 KORIN 8 - Cho Bible Common Language 2016

Agup am Sonkiang Vawihpeh ah Ei ah Mawng

¹ Tuhbäi ung agup am sonkian ah ei ah mawng nami na ng’shi cu ka ning m’hlan gui khai. Mikmi mi van ung hmuhmat nak om ci cicu akcang ah kyak ci, cung phi hmuhmat nak naw chang cu lämaa sak ci; m’hni nak naw vah chang cu m’küi m’khän ci.

² Kei ka hmuhmat ci cik ciah chang cu akcang ah a i kä hmuhmat ciah kyak ci.

³ Cun ung phi Khanpughi m’hni ciah chang cu Khanpughi naw hmuhmat ci.

⁴ Cun ah kya sei a gup am sonkian ah ei cu ei ah mawng pyein ah a kyak ung, a gup cu akcang ah ghing om ciah a gup ah kä kyak ci, cicu mi hmat ci; Khanpughi tumat bäng om ci, ci cun phi mi hmat ci.

⁵ Kho ah kaa m’dek ah khan ung “Khanpughi” ah ming ci, “Bawi” ah ming ci, akda a om ung phi;

⁶ Mikmi ung mi Pa Khanpughi tumat bäng om ci, ani cu avan tüisho ciah Pushihpi ah kyak ci, ani ah hmawk ah mikmi cu mi ghing ci: Mik mi ung Bawipa tumat bäng om ci, cun cu Jesuh Khrit ah kyak ci, ani naw a päng avan cu tüisho sei, ani ung mi ghing ci.

⁷ Cun ung phi chang van naw shin ah düng nak cu kä hmat ci. Chang amshah gui cu a gup khawihnah te ci gui ah kya netah, tuhngawi güt ung ami ei ei cu agup am sonkian ah ei ah ngai ne ei awk ci gui. Cun ah kya sei ngami cu ami m’lung kä ng’cim sei, cun ah ei ei naw m’shet gui ciah ngai ci gui.

⁸ Ei cu Khanpughi lam ah ak tung ah kä kyak ci; ei kä ei ung phi dishum nak vai kä om ci, ei ei ung phi näng m’khüt nak vai kä om ci.

⁹ Cun ung phi nangmi naw ng’päiye ne nami ei awk nak tu awn, ayum nak ken ci gui ah cheishoh nak vai ah kä kya-en khai ah nami geing nak vai.

¹⁰ Shin ah a mawng ung am lung kä ng’cim veih ciah chang tumat naw, sonkian ne pui m’ghu nak, pui m’ghu im ung nami ei awk tu a ning hmuh gui ah a kyak ung; cun ah m’ghu nak cu ani naw phi ei law tuk khai ah kä kya ne ang?

¹¹ Cun ah kya sei ak thagui ken ciah na phäinau ah hmawk ah Bawi Jesuh si pyi ciah a kyak pang ung phi, nang ah “hmuhmat” nak awn ani cu dimaih ciah kyak ci.

¹² Ashikchaa ah nangmi cu nami khritha phäinau cheishoh na u ne, Bawi Khrih phi nami cheishoh nak ci, aktha ken ciah m’lung phi nami sheit sak ci nei.

¹³ Cun ah kya sei sa ka ei naw ka phäinau a cheishoh sak ah a kyak läi ung, ka phäinau ah kä cheishoh nak vai ah, a i sa phi kä ei ne ka om khai nei.