1 KORIN 7 - Cho Bible Common Language 2016

Ng’chula Nak ah Mawng

¹ Tuhbäi ca nami guk law gui ah mawng cu m’hlan ne ka ning m’thein gui khai. Pami cu kä chumah ne a om ung nik ci.

² Cun ung phi pletbeng nak ada aih ah hmawk ah pami päng ak chu om ne hnumi päng a cei om sä.

³ K’pami naw cei ah bilawh vai bi sä, hnumi naw chu ah bilawh vai bi sä, tumat ah ng’yak hlü cu tumat naw kümbe sak sä.

⁴ Ak chu naw amät ah pumsa cu kä khäm ci, acei naw khäm ci; acun ah mäih ah acei naw amät ah pumsa cu kä khäm ci, ak chu naw khäm ci.

⁵ Nangmi naw k’taigü nak vai ah ng’dawt ne nami k’bäi ah akhin nami peit ah kawn ah, ng’chula goi ah ng’yak hlü cu kä nami ng’chei en sak vai nei. K’Taigü nak ang pyi kawn ah nami om man ah nami om ba vai nei. Cun ung vah nami m’lung cu htingling sak hlawt u ne Satan ah tüihtok nak cu nami m’khüt näng khai.

⁶ Cun cu kei naw ka ning khäntam gui ah kä kyak ci, ka ning bilawh sak gui ah kyak ci.

⁷ Akcang ah chang avan cu ka mät ah mäih ah ka kyak sak hlük ci: cun ung phi Khanpughi naw chang tumat ci am m’cümhnah nak a phäh phäh cu na pek gui ci.

⁸ Cun ah kya sei kä ceimah ci gui la hmeinu gui cu, kei ah so ah k’täi ne ami mät ami om ung nik ci.

⁹ Cun ung phi nami ng’yak hlü nak ah m’lung kä nami k’üüp hlawt läi ung nami ng’chula vai nei. M’lung so ne ling sei om ah mä ng’chula ne om cu bä tu ba ci nei.

¹⁰ Ng’chula ci gui am ng’thu ka khän hlük ci, cun cu kei ah thukhän ah kä kyak ci. Bawipa ah thukhän ah kyak ci: ak chu naw acei cu kä ang ng’chaa püi vai.

¹¹ Ang chaa püi ah a kyak ung phi kä ceimah tu ba ne a om vai, kä cun ung, a cei te ah baw ang dawn ba vai. A cei naw phi ak chu cu kä a ng’chaa en püi vai.

¹² Ahei chang gui am kei naw (Bawipa ah kä kyak ci, kei ka mät) thu ka khän hlü cu, khritha pami tumat naw kä khritha hnumi tumat cu ak chu nak ung, cun ah hnumi naw ng’khap ne om vai a yum ah khoi ung kä a ng’chaa en püi vai.

¹³ Acun ah mäih ah ah khritha hnumi tumat naw kä khritha pami tumat cu a cei nak ung, cun ah pami naw ng’khap ne om vai a yum ah khoi ung kä a ng’chaa en püi vai.

¹⁴ Kä yum tuk ciah a cei cu yum ciah ak chu awn ani ng’khap ah hmawk ah, ani cu Khanpughi naw dou ci, kä yum tuk ciah ak chu cun phi yum ciah a cei awn ani ng’khap ah hmawk ah ani cu Khanpughi naw dou ci. Cun ah kä a kyak ung cun ah chang gui ah ami hta gui cu khoshe ah hta ah kyak khai gui. Cun ung phi cun ah hta gui cu Khanpughi naw yei ne a dou gui ah kyak ci gui.

¹⁵ Khritha ah kä kyak ciah chang tumat naw, khritha tumat cu ang chaa püi hlü ah a kyak ung ng’chaa püi sä. Cun ah a mawng ung chu ah phi kya, cei ah phi kya, khritha apaw ah khan ah amät ah m’hni ah hnüntho hning ci. Khanpughi naw nangmi cu dimdeeih sei nami om vai ah ghü ne ning khü gui ci.

¹⁶ Khritha hnumi, na cei hun nak kä na gah sak ung, na mät naw a i cha na gah khai ang? khritha pami, nak chu hun nak kä na gah sak ung na mät naw a i cha na gah khai ang?

Khanpughi Naw Khü Ne Aning Ghü ah Mäih ah Nami Ghin Vai Nei

¹⁷ Chang avan cu Khanpughi naw am shum k’phyuk awn ng’mü khai ah Khanpughi naw a khü yah ung a om ah mäih ah a om vai ah kyak ci. Cun cu khrithabum päng ung kam theithang ah thukhän ah kyak ci.

¹⁸ Vun-ah nak gah pyi ciah chang tumat cu Khanpughi ah khü a äi ah a kyak ung vun-ah nak ah ak hma cu am shet vai ah ak tha nak vai kä hlü ci; vun-ah nak kä gah phak ciah chang cu Khanpughi ah khü aw a ä ah a kyak ung, vun-ah nak abi ba vai kä hlü ci.

¹⁹ Vun-ah la kä ah cu ak tung ah kä kyak ci, Khanpughi ah thukhän läk cu ak tung ah kyak ci.

²⁰ Ak chang sing cun naw Khanpughi ah ng’khü a äi yah ung abi cu abi gäkgäk vai kyak ci.

²¹ Khanpughi naw a ning khü yah ung nang cu khleihtein ah na kyak ung, phi, a i ah kä kyak khai; nang cu ng’päi om chang ah na kyak nak vai akhin a om ung acun cu na mang vai.

²² Khleihteih tumat cu Bawipa naw a khü ah a kyak ung ani cu ng’päi om chang ah kya lawk ci; acun ah mäih ah ng’päi om chang tumat cu Bawi Khrih naw a khü ah a kyak ung, ani cu Bawi Khrih ah khleihtein ah kya lawk ci.

²³ Nangmi cu Khanpughi naw a phu pe ne a ning khleih gui pyi ah kya sei, chang ah khleihtein ah kä nami kyak ken vai.

²⁴ Phäinau gui aw, nangmi cu Khanpughi naw a ning khü gui yah ung nami om te ah mäih ah Khanpughi awn pui m’ca ne nami om vai nei.

Kä Chucei mah Ci Gui La Hmeinu Gui ah Mawng

²⁵ Ca guh ne nami na ng’shi nak ah kä chucei mah ci gui ah mawng ung; Kei naw ka pyein vai cu Bawipa ah thukhän ah kä kyak ci, cun ung phi Bawipa ah nam gein nak awn, ng’ap ne khin ciah chang tumat ah ka kyak nak awn, ka mät ah ngaih cu ka ning m’thein gui nei.

²⁶ Tuhbäichü a khin cu teng nak awn pami tumat cu amät ah om te khläm ah a om ung bä tuba ci.

²⁷ Nang cu na chumah pyi ci a kyak ung, na chu na nawng vai ah kä na k’tha nak vai. Kä na chumah phak ciah a kyak ung na k’chu vai kä na shui ling vai.

²⁸ Na chumah ah a kyak ung phi, nang cu katnak na bik ciah kä kyak ci; kä ceimah phak ciah hnumi hta a ceimah cun phi katnak bik ciah kä kyak ci. Cun ung phi chuceimah ciah chang gui naw ak hnüüp tä ami bui awt ah yaica nak gui cu nami phiawn nak vai ng’ya hlü ne ka pyein na kyak ci nei.

²⁹ Phäinau gui aw, kei naw ka pyein hlü cu; akhin kä om ba ci, Tuhbäi ung tün ne chumah ciah pami gui cu kä chumah ciah mäih ah om u sä.

³⁰ Kyap ci gui cu kä thüi ci gui ah mäih ah om u sä; gaih ci gui cu kä yei ci gui ah mäih ah om u sä; khleih gah ci gui cu a i kä om ciah mäih ah om u sä;

³¹ M’dek khan khawhchaam ei mang ci gui cu, kä ng’bühbei ci gui ah mäih ah om u sä. A i ah kya sei ci ung tuhbäi shin ah m’dek ah khan cu, kä shou pha sei ng’pyi lawk khai ah a kyak ah hmawk ah kyak ci.

³² Kei naw nangmi cu ng’ä ai nak ung ka ning phiawn sak gui hlük ci. Kä chumah ciah pami naw Khanpughi ah khuut cu ak tung ah tha ci, ani naw Bawipa ah ng’yak hlü cu k’tha na ne bik ci.

³³ Chumah ciah pami naw ak chu ah m’hni vai ng’ya hlü netah amät ah hmawk ah m’dek khan mawngma gui cu ak tung ah tha ci.

³⁴ Cun ah kya sei ani ah m’lung naw hnih mawng nak ci. Kä ceimah ciah hnumi kä cun ung ng’lami hta cu, Khanpughi am a pumsa, ang mumcha avan ap hlük ci kya ne, Bawipa ah khuut cu ak tung ah tha ci. Cun ung phi ceimah ciah hnumi läi cu, a cei ah m’hni vai ng’ya hlük ci kya ne, amät ah hmawk ah m’dek khan mawngma gui cuak tung ah tha ci.

³⁵ Kei naw shin ah ka pyein cu nangmi ka ning khüivawng nak gui hlü ah kyak ci. Nangmi ka ning shum gui khai ah ka k’tha nak ah kä kyak ci. Nangmi ng’düng ne nami bä vai la Bawipa ah khuut cu kä ng’yu ng’yawn ne ng’ap ne nami bi vai ah ka ng’yak hlü ah hmawk ah kyak ci.

³⁶ Hta be ne gah pyi kawn ah ngahni ani mät naw kä ng’chula ling vai ah ani k’bäi ung phi; Pami naw hnumi ah khan ah a om ih kä nik ciah a hmat law ung phi bäi, am lung kä k’üüp hlawt ne ng’chula kung ung bä khai ah a ngaih ung phi bäi, ang yak hlü ah mäih (kä) Pami tumat la a hta hnumi: ani naw hnumi ah khan ah a om ih kä nik ciah a hmat law ung, (kä) Cun ah hnumi cu ceimah khin ciah a kyak ung, ani naw a mät ah ng’yak hlü ah chu na sä. Ah ng’chula ni sä. Cun ah bi nak ung katnak kä om ci.

³⁷ Cun ung phi pami naw amät ah m’hni ah kä chumah (kä) A hta hnumi kä ceimah sak ne, om khai ah ak pit ah ak bäi ah a kyak ung, cun kawn ah amät ah m’lung phi akcang ah k’üüp hlawt ne amaa law nak gui vai cu am khüt ah a kyak ung, cun ah hnumi (kä) kä ceimah sak ne. Cu kä chu na ne phi om sä.

³⁸ Cun ah kya sei beit pyi ah ng’lami chunak (kä) A hta hnumi ceimah sak ci. Ciah ng’pyangmi cu nik ci, cun ung phi kä chumah ling (kä) Kä ceimah sak ling. Cicu bä pi ci.

³⁹ Ceimah ciah hnumi cu acei a ghin yah ah chuih khihpawn nak om ci; Cun ung phi acei a sih kawn ah a u pami phi amät ah m’hni cei na tuba hning ci, acei tuba cu khriatian bäbä ah a kyak nai.

⁴⁰ Cun ung phi cun ah hnumi cu kä ceimah tuba ah a om ung ni pi k’bäih ci. Cun cu ka mät ah ngaih ah kyak ci, kei cun phi Khanpughi ah Mumcha ka gah ciah ka yum ci nei.