1 KORIN 6 - Cho Bible Common Language 2016

Khritha Gui Ami Mät ah Ng’chaak Tu Nak

¹ Khritha gui nami mät ah kyong ung ng’cuhcan nak a om ung, Khanpughi ah chang gui ah ng’gepai nak awn nami pyi phleh vai sü te, a i ah kya sei khritha ah kä kyak ciah chang ng’vai gui ah nami ng’chaak tu ang!

² Khanpughi ah chang gui naw khomdek khan m’khoichak khai gui cicu kä nami hmat ci maa! Khomdek khan m’khoichak khai ah nangmi cu, amawngma apihta hngaw kä nami ng’thumcha hlawt ci maa!

³ Mikmi naw khankho chang gui phi mi ng’thumcha gui khai cicu kä nami hmat ci maa! Cun ah kya sei khomdek khan ung a mawng gui läi cu mi ng’thumcha pui khai ah kyak ci nei.

⁴ Ng’cuhcan nak gui a om law ung Khritha ah kä kyak ciah chang gui am kä nami m’khoichaa en sak vai.

⁵ Nangmi cu lü ng’aa vai ah nami kyak ci nei. Khritha gui nami mät ng’cuhcan nak a om law ung, ng’gepai ng’thumcha hning khai, nami mät ah kyong ung hmuhmat ci a u kä om ne maa!

⁶ Bawi Jesuh kä yum ciah chang gui ah maa ah khritha gui nami mät, nami ng’shawkcha tu aih ciah kya ci nei.

⁷ Nami mät gui nami ng’shawkchak tu nak naw khritha ah kyak nak ah mingthang cu shet sak leng leng ci nei. Cun ah k’dam cheishoh nak nami awt ung kä bä tu ba khai ang! M’gukplet nak nami bui ung kä ni tu ba khai ang!

⁸ Cun ah nami kyak nak vai sü ung nami mät gui nami ng’tu ng’tai ci, ng’phäinau goi nami ng’guhtep tu pek ci!

⁹ Khanpughi ah uknak kho cu chang shekha naw kä khäm khai cicu akcang ah nami hmat ci nei. Ang lat ah kä nami ngaih en vai nei; Pletbeng ci gui, a gup khawihnah ci gui, chang ah chu hta kat püi ci gui, pami goi ng’yawpawm ci gui;

¹⁰ M’guk ei gui, ng’yak hlü nak aih om ci gui, awktat ci gui, ng’plahtang ci gui, la chang ah khawh guttep ci gui cu, a u naw phi Khanpughi ah uknak kho kä khäm tuk khai gui nei.

¹¹ Nangmi amshah gui cu a cu k’chaa ah nami kya man ci, cun ung phi nami katnak cu ning theing cim sak gui pyi ci: Nangmi cu Khanpughi ung nami ng’ap pyi ci; Bawipa Jesuh Khrih ah ming awn la mi Khanpughi ah Mumcha awn nangmi cu Khanpughi ung düng nak nami gah pyi ci.

Khanpughi ah Bämang nak ah Hmawk ah Nami Pumsa cu Nami Mang Vai Nei

¹² Chang atumat naw, “Kei cu i phi ka bi hning ci” cine kyak ciah chang om khai. Cun ung phi, a päng avan cu nangmi ah hmawk ah kä nik khai. Kei naw a i phi ka bi hning ciah ka pyein ung phi, a i naw phi kei cu ani ah khleihtein ah kä na k’hmoh hlawt khai.

¹³ Chang atumat naw, “Ei cu chi ah phäh ah kyak ci, chi cun phi ei ah phäh ah kyak ci” cine pyein ci om khai. Acun ah kyak ci, cun ung phi Khanpughi naw acun goi ani nik hnih cu dimaih sak khai. Pumsa cu ng’yawpawm pletbeng nak düt vai ah kä kyak ci, Khanpughi ah bi bi nak vai ah kyak ci; Khanpughi naw phi pumsa ung hlü ci gui cu yuk m’kyum lawk ci.

¹⁴ Khanpughi naw Bawipa cu sih nak ungka thawh ba sak ci, acun ah mäih ah mikmi cun phi a hlüngtai nak awn sih nak ungka na thawh ba sak gui khai.

¹⁵ Nami pumsa cu Bawi Khrih ah pumsa ah ng’phyeekpai ah kyak ciah nami hmat ci. Kei naw Bawi Khrih ah pumsa ng’pai cu la netah, chang hlawhlangnu ah pumsa ng’pai ah ka pyan ung bä khai ang! Kä bä khai nei!

¹⁶ Chang thuiplet awn ng’yaw ng’pawm ci goi ah chang cu, acun ah chang awn pumsa tumat ah kyak ci goi cicu kä nami hmat ci maa! Cacim naw ang dang ah a pyein cu, “Cun ah chang hnih cu pumsa tumat ah kyak khai goi nei” ciah kyak ci.

¹⁷ Cun ung phi Bawipa ung ng’dou pyi ciah chang cu mümcha awn ani ung pumsa tumat ah kya lawk ci.

¹⁸ Pletbeng nak cu nami hlawi vai. A hei katnak naw chang tumat ah pumsa cu kä di sak ci; cun ung phi ng’yawpawm pletbeng nak bik ciah chang cu amät ah pumsa m’di ciah kyak ci.

¹⁹ Nami pumsa cu Mumcha Theing ah pum im ah kyak ciah kä nami hmat ci maa! Cun ah nangmi ung om ciah Mumcha Theing cu Khanpughi ah ning peit gui ah kyak ci. Nami mät naw nami mät kä nami khäm ci, Khanpughi naw vah khäm ci.

²⁰ Khanpughi naw a phu pe ne a ning khleih gui ah kyak ci, cun ah kya sei, Khanpughi ah bämang nak ah hmawk ah nami pumsa cu nami mang vai nei.