1 KORIN 5 - Cho Bible Common Language 2016

Khrithabum kyong ah Pletbeng Nak

¹ Khritha ah kä kyak ci gui hngaw naw shetkat ciah ami ngaih ah ng’yaw ng’pawm pletbeng nak cu nang mi ung om ciah ka ng’yak ci. Chang tumat cu anu chui awn ng’yaw ne ip ci goi ciah ka ng’yak ci nei.

² Cun hlawk ah shetkat nak om sei phi a i ah kya sei nami khähghah lä ang! A i ah kya sei cun ah hmawk ah kä nami thui ng’aa ang! A i ah kya sei cun ah mäih ah chang cu nami bum nak ungka kä nami k’täm ang!

³ Kei cu nangmi ah, pumsa awn kä ka gawk law ung phi, Mumcha awn a täng ah ka om ci nei. Kei ka mät nangmi ah om nak ah ka gawk lawk ciah mäih ah, shetkat nak bik ciah chang cu Bawi Jesuh ah ming awn, m’khoichaa nak ka bik ci nei.

⁴ Kei cu nangmi awn a täng ah ka om ciah mäih ah, mi Bawipa Jesuh ah hlüngtai nak ung nami van ng’hmuh ne ng’bum ba yawp va.

⁵ Bawipa a law hnüüp ung cun ah chang ah mümcha cu hun nak a gah tu vai ah hmawk ah, a pumsa cu, am di vai ah Satan nam nami ap vai nei.

⁶ Nangmi cu chang ah kä nami ng’shei vai. “K’caw api hta naw m’htut den avan cu thawh sak ci” ciah thu thuuk cu nami hmat ci.

⁷ K’caw k’phyim ah kyak ciah katnak cu nami nawng shüt vai, cun ung vah nangmi cu nami theingcim lawk khai. Cun ung nangmi cu k’caw kä shum ah m’htut den k’thai ah mäih ah nami kyak khai. Cun ah nangmi akcang ah nami kyak cu kei naw ka hmat ci. Mikmi ah phiawnnak Htome ah kyak ciah Bawi Khrih awn ng’küikyan pyi ah kya sei, phiawnnak pawi cu bige vai kyak ci nei.

⁸ Cun ah kya sei katnak la cheishoh nak ah kyak ciah k’caw ak pyim shumah m’htut awn ah kä kyak ciah ng’cim nak la ng’düng nak ah kyak ciah k’caw kä shum ah m’htut awn phiawn nak pawi cu mi bik khai nei.

⁹ Ayan ka guk law nak ah ca ung pletbeng ciah chang gui awn kä nami m’gu ng’pawng vai ah ka ning m’cäi gui ci.

¹⁰ Cun ah ka pyein nak ung pletbeng ci gui, ng’yak hlü nak da aih ci gui, m’guk ci gui, a gup khawihnah ci gui phung kä nami m’gu pawng püi gui vai ah ka pyein ah kä kayk ci. Ngami cuhlawi gui vai a kyak ung nangmi cu shin ah khomdek khan ung kä nami om tu ba ciah kyak khai.

¹¹ Kei naw ka pyein hlü cu kei khritha nei ci netah pletbeng ci gui, ng’yak hlü nak aih om ci gui, a gup hkawihnah ci gui, m’thüikhang ci gui, awktat ci gui, la m’guk ci gui awn kä nami kawng ät vai ah ka pyein ah kyak ci. Cun ah chang gui awn atäng ah ei awk vai ah ngoh ah phi kä nami ngoh en tu vai.

^12-13 Chang hei gui nüng m’khoichaa vai cu kei ah bi ah kä kyak ci. Ngami cu Khanpughi naw m’khoichaa gui khai. Cun ung phi nangmi naw nami mät ah chang bum ungka nami ng’thumcha hning ciah kä kya ne ang! Cacim naw, “Nami changbum ung kaa, chang she cu k’täm vä” cine pyein ci.