1 KORIN 2 - Cho Bible Common Language 2016

Bawi Khrih Tai Ne Ami Ngawn ah Mawng Thu Shäu

¹ Phäinau gui aw, kei naw nangmi ah law ne, Khanpughi ah ng’düngcim ciah hmuhmat nak awn kä ka pyein ci.

² Nangmi awn a täng ah ka om yah ung kei cu Bawi Zesuh Khrih ah mawng la kutlam tung ung a sih ah mawng ah kawn ah a i phi avan m’hnih ne nawng shüt vai ah ka k’bäi pyi ci nei.

³ Cun ah kya sei kei cu nangmi ah ka law yah ung ka k’tha ken sei, kyikyawk ne,

⁴ ka pyeinsak m’theithang nak ung, hnicim chang ah hmuhmat nak ah thulung cu kä ka pyein ci, Khanpughi ah Mumcha hlüngtai nak awn be ciah ng’thulung bäng awn ka pyein ci.

⁵ Cun ah kyasei nangmi ah yun nak cu hnicim chang ah hmuhmat nak ung kä phung ci, Khanpughi ah hlüngtai nak ung phung ci.

Khanpughi ah Cüivai Nak

⁶ Cun ung phi kei naw cüivai nak ah ng’thu cu mümcha ng’bühbei pyi ci gui ah maa ah ka pyein ci. Cun ah cüivai nak cu khodek khan awn kä ng’phaa ci, khodek khan bawi gui ah hlüngtai nak awn phi kä ng’phaa ci, khodek khan bawi gui ah hlüngtai nak cu ken law pipi ci nei.

⁷ Kei naw ka ng’shäu ah Khanpughi ah ng’cim ciah cüivai nak cu, hnicim chang ah maa ah ng’yih ciah cüivai nak ah kyak ci. Cun cu khodek kä a tüisho pha ung mikmi ah bämang nak vai ah a güi pyi ah kyak ci.

⁸ Khodek khan bawi gui naw cun ah cüivai nak ah mawng cu a u naw kä hmat ci. Ngahmi naw ami hmat vai sü ung bämang ciah Bawipa cu kutlam tung ung kä ngawn khai sü gui te.

⁹ Cun ung phi cacim ung; ‘Chang naw kä a hmuh man, kä a ng’yak man, Cun ah kya lawk khai ciah chang naw kä a ngaih-tüh man, gui cu, Khanpughi naw ani m’hni ciah chang gui ah hmawk ah pyamtham pyi ci” ciah om ci.

¹⁰ Khanpughi naw mikmi am amät ah m’yih gui cu, Mumcha awn nam dang gui ci. Mumcha naw a päng avan bäng ah kä kyak ciah, Khanpughi ah thuuk ne ng’yih ciah ang bü nak gui cun phi shuilei ci.

¹¹ Chang tumat ah a mawng avan cu ani ah kyong ung om ciah ang mümcha naw vah hmat yawp ci; acun ah mäih ah Khanpughi ah mawngma avan cu Khanpughi ah Mumcha naw vah hmat yawp ci.

¹² Mikmi cu shin ah khodek khan ung mümcha mi gah ciah kä kyak ci; Khanpughi naw a tüih law ah Mumcha cu mi gah ciah kya ci. Cun ah kyasei mikmi naw Khanpughi ah na peit gui phung cu mi hmat ci.

¹³ Cun ah kyasei Mumcha gah ci gui am, Mumcha düng nak ah mawng m’dang ne m’thein nak gui ung, keimi naw hnicim chang ah m’theithang hmuhmat nak ah ng’thu cu kä kami pyein ci, Mumcha ah m’theithang nak ah ng’thu cu kami pyein ci. Keimi naw Mumcha düng nak kami m’theithang nak ung Mumcha om pyi ciah chang-am vah kami m’thei ci.

¹⁴ Mumcha kä gah ciah chang naw Khanpughi ah Mumcha ung ka lawk ciah m’gein nak cu kä gah hlawt khai. Mumcha ung phung pawng ci naw vah acun ah a phu cu m’khoicha hlawt ci kyasei, Mumcha kä gah ciah chang naw, Mumcha ah m’gein nak ah mawng cu akcang ah kä hmat ci, ani ah phäh ah cun gui cu akholä ah kyak ci.

¹⁵ Mumcha gah ciah chang naw a päng avan na a phu cu ng’thumcha hlawt ci, cun ung phi ani cu a u naw käm khoichaa hlawt.

¹⁶ Cacim theing ung; “Bawipa ah m’lung ngaih cu a u naw hmat ci-ang? Bawipa cu a u naw m’cumcäi hning ci-ang?” ciah om ci. Cun ung phi mikmi cu Bawi Khrih ah m’lung ngaih mi gah pyi ciah kyak ci.