1 KORIN 16 - Cho Bible Common Language 2016

Yum Ciah Pawchang Gui ah Hmawk ah Peit Taak Nak

¹ Ca nami guk law ah, Judea kho ah Khanpughi ah chang gui m’htei nak gui vai ah ngui ah mawng ung, Kalatia kho ah Khtihtabum gui kam cäi gui ah mäih ah nami bi vai nei.

² Kei ka gawk law ung ngui loh vai kä hlü khai ah, pum hnüüp päng ung, ak chang sing naw nami mät ah khawh gah a ciah, pe u ne, nami na m’cun vai nei.

³ Kei ka gawk law ah a kyak ung, nami ghü ah chang am, ca guh ne m’khah ne, cun ah ngui cu Jerusalem ah vah peit sak vai nei.

⁴ Kei ka hteit khai a kyak ung phi cun ah chang gui cu kei ung ami ng’gui tu ung bäi khai nei.

Paul ah Ng’shei Ng’tawn Nak

⁵ Kei cu Macedonia kho lam ah ka lawk khai kya sei, Macedonia kho ung ka hteh yawp kawn ah, nangmi ah om nak ah ka lawk khai nei.

⁶ Nangmi awn a täng ah ak sho hta ka om hngaw khai, khoksik yah pum ung a cä ah ka om tu hman khai nei Cun kawn ah ka hteh nak hlü ah ka hteh hning vai ah nami nam hteihtang khai ah ka ngai ci nei.

⁷ Kei cu nangmi ah ka ng’düm tu pah düt ah kä kyak ciah, Khanpughi naw a yum ung nangmi awn ak shou ka om hlük ci nei.

⁸ Pentekos hnüüp ung khüt sei, Ephesus gawnu ah ka om khai nei.

⁹ A cu ah kei na hnu ng’tuk püi ci akda om pang sei phi, a khuut bi nak vai a khin akni om ci nei.

¹⁰ Nangmi ah Timothi a gawk law ah a kyak ung akni ah dou ne nami khinchah nak vai nei, a i ah kyasei ci ung ani cu kei ah mäih ah Khanpughi ah khuut bik ciah kyak ci.

¹¹ Ani cu a u naw phi kä ak shedam men nak vai nei. Kei cu khritha phäinau gui awn a täng ah ani kami ging ci kya sei, keimi ah om nak ah akni ah a gawk law vai ah nami m’htei htang vai nei.

¹² Ka nau Apollos cu, khritha phäi nau gui awn a täng ah, nangmi ah om nak ah a law vai ah, angtäi sei kam cäi ci nei. Cun ung phi a law nak vai ah khin cu ak pit ah kä k’bäi phak ci nei. Akhin a gah law ung, a i ah a kyak ung phi lawk khai nei.

Ak Hnu ah M’cäi Nak Gui

¹³ Nami cüivai vai, nami yum nak ung khäng htek sei nami ng’düih vai, nami hlui cang vai, nami k’thamah vai.

¹⁴ Nami bi phung m’hni nak awn nami bi vai.

¹⁵ Nangmi naw Stephanas la ak kyong ungka gui cu nami hmat ci. Ngami cu Achaia kho ung khritha ah kya law ma ci gui ah kya ne, Khanpughi ah chang gui ah hmawk ah bi bi vai ah ng’ap ci gui ah kyak ci.

¹⁶ Phäinau gui aw, a shin ah mäih ah chang gui ah lam shüm nak la, ngami awn a täng ah k’tha na ne khuut bik ci gui ah lam shüm nak cu nami läk vai ah ka ning m’cäi gui ci nei.

¹⁷ Kei cu Stephanas ni, Fortunatus ni la Achaikus ni gawk law u sei ka yei ci nei, ngami naw nangmi ah hnün ung kei cu nam hteihtang ci gui nei.

¹⁸ Ngami naw nangmi ah m’lung ami ning yei sak gui ah mäih ah kei phi na yei sak ci gui nei. Cun ah mäih gui cu chang m’sui nak gah khin ci gui nei.

¹⁹ Asia kho ah Khrithabum gui naw phi ning yavaih gui ci gui nei; Akuila la Priscilla ni, ami im ah nami pum nak gui ah khritha gui naw phi ning yavaih gui ci gui nei.

²⁰ Shi ah om ciah khritha phäi nau gui ami van naw ning yavaih gui ci gui nei. Theingthap ciah ng’ui ng’hnam nak awn tumat la tumat ng’yavaih na tu vä.

²¹ Ka mät ah kut awn, “Paul ah yavaih nak” cine ka hei guk nei.

²² A u chang phi Bawipa kä m’hni ci phung cu — kyuk sä! Marana tha — Kami Bawipa Kyum law ä!

²³ Bawi Jesuh ah m’gein nak cu nami khan ah om sä.

²⁴ Bawi Khrih Jesuh ung kei ah m’hni nak cu nami van ah khan ah om sä. Amen.