1 KORIN 15 - Cho Bible Common Language 2016

Bawi Khrih Sih Nak ung Kaa A Thawh Ba ah Mawng

¹ Phäinau gui aw, kei naw ka ning m’thein gui ah Thu Ni cu ka ning shüm ba sak gui hlük ci, cun cu nangmi naw gah ne, nami yum nak ah ng’düih nak ah kyak ci.

² Cun ah Thu Ni cu kei naw nangmi ah maa ah ka pyein ah ng’thu ah kyak ci. Cun ah Thu Ni cu khäng khai ah nami k’pan ah a kyak ung nangmi cu hun nak nami gah khai, Kä cun ung nangmi ah yum cu a kholä ah kyak khai.

³ Kei naw ka mät ah gah ah küikyang aih ciah a mawng cu m’dou ne ka ning pe gui ci: cun cu cacim ung om ciah mäih ah Bawi Khrih cu mikmi ah katnak ah hmawk ah a sih ah mawng;

⁴ Cacim ung om ciah mäih ah ami k’phuh a mawng, ak hnüüp thum hnüüp sih nak ungka a thawh ba ah mawng;

⁵ Peter ah maa ah ang dang ba ah mawng la ang düihpüi gha-lei-goi ah maa ah ang dang ba ah mawng gui ah kyak ci.

⁶ Cun kawn ah a hnu ah läk ciah chang phya hma naw a täng ah ami hmuh vai ah ng’dang ba ci. Cun ah chang gui ungka amshah a sih ung phi akda pi cu tuh güt ghing ci gui.

⁷ Cun kawn ah James ah maa ah dang ba ne, ang düihpüi ami van ah maa ah phi ng’dang ba ci.

⁸ Ak hnu ah yawih nah ne ami hta nak ah mäih ah kyak ciah kei ah maa ah phi dang ba ci.

⁹ Kei cu ang düihpüi gui ung ak chui pi k’bäih ah ka kyak ci — Khanpughi ah Khrithabum kak dukdeiu nak ci kya sei, ang düihpüi ah khü vai ah phi kä ka khin ci.

¹⁰ Cun ung phi Khanpughi ah m’gein nak awn kei ah ka kyak ci, kei am a na peit ah cun ah m’gein nak cun phi a kholä ah kä kyak ci. Kei cu a hei ang düihpüi gui ah ta k’tha nah pi ne khuut ka bik ci. Cun ah ka bi cu ka mät ah k’tha gui awn ah kä kyak ci, kei ung om ciah Khanpughi ah m’gein nak awn ah kyak ci.

¹¹ Cun ah kyasei, kei naw phi bäi, a hei ang düihpüi gui naw phi bäi, cun ah Thu Ni cu kami pyeinsak ci, nangmi naw phiyum ne nami dou ci.

Sih Nak ung Kaa Mik Mi ah Thawh Ba Nak

¹² Tuhbäi keimi naw Bawi Khrih sih nak ungka a thawh ba ah mawng thu cu kami pyein ci, a i ah kyasei nangmi ungka amshah naw ‘Sih nak ungka thawh ba nak kä om ci’ cine nami pyein ang?

¹³ Cun cu akcang ah a kyak ung, Bawi Khrih cu sih nak ungka kä tho ba ciah kyak khai;

¹⁴ Bawi Khrih cu sih nak ungka kä tho ba ciah a kyak ung, keimi ah ng’thu pyein cu akholä ah kyak ci, nangmi ah yum cun phi a kholä ah kyak ci.

¹⁵ Sik ci gui ah thawh ba nak kä om ci, cicu akcang ah a kyak ung Khanpughi naw Bawi Khrih cu kä thawh ba sak khai sü te — Keimi naw, “Khanpughi naw Bawi Khrih cu sih nak ungka thawh ba sak ci nei” cine ng’thu kami pyein cun phi Khanpughi lam ah kami hleeihlak ah kyak ai.

¹⁶ Sik ci gui ah thawh ba nak kä a om ung Bawi Khrih phi kä tho ba khai süte.

¹⁷ Bawi Khrih kä a thwah ba vai sü ung, nangmi cu nami yum nak ung lam hma u ne, shetkat nak ung nami chük maih lä khai sü te.

¹⁸ Cun bäng ah kä kyak ciah Bawi Khrih yum ne sik ciah chang gui cun phi mäih yawp khai gui sü te.

¹⁹ Bawi Khrih ung mi ngaih u nak cu tuhbäi mi ghin nak bäng ah phäh ah kyak ci, kä lawn ci, ah a kyak vai sü ung, m’dek ah khan ah mikmi ah kawn ah m’gein vai ci a u kä om ba khai nei.

²⁰ Cun ung phi akcang cu Bawi Khrih cu sih nak ungka tho ba pyi ci, cun cu sih nak ung ip ciah chang gui ami thawh ba vai ah mawng ang kyän nak ah kyak ci.

²¹ M’dek ah khan ung chang tumat awn sih nak a gawk law ah mäih ah chang tumat awn sih nak ungka thawh ba nak phi gawk lawk ci.

²² Chang gui cu Adam ung ami kawng ät nak awn sik ci gui, acun ah mäih ah Bawi Khrih ung ami kawng ät nak ung, tho ba ne ghing khai gui.

²³ Cun ah kyasei chang gui cu akhüimai angkäkhtäng ah tho ba khai gui: ak htük bäih ah Bawi Khrih tho ba ci, cun kawn ah ani a kyum law ba ung, ani khäm ciah chang gui cu tho ba khai gui.

²⁴ Cun kawn ah kho ah ng’pyi nak gawk lawk khai; Cun kawn ah Bawi Khrih naw, mümcha uk ci gui a van, huham nak gui avan, hlüngtai nak gui a van cu näng ne khäm netah, Uknak kho cu Pa Khanpughi ah kut ung ap khai.

²⁵ Khanpughi naw gaa gui avan tu ne m’shiu ne, a kho kaa ah a gawk sak ung khüt sei Bawi Khrih naw a van uk khai.

²⁶ Ak hnu ah a tuk vai ah gaa cu sih nak ah kyak ci.

²⁷ Cacim ung, “Khanpughi naw a päng avan cu a kho kaa ah gawk sak ci” ciah om ci.” Apän avan” ci nak ung Khanpughi kä boi tuk ci, a i ah kyasei ci ung a päng avan Bawi Khrih ah kho kaa ah gawk sak cicu Khanpughi ah kyak ci.

²⁸ Apäng avan cu Bawi Khrih ah uknak ka ah a gawk awn ah, amät A Htapa cun phi, a päng avan a kho kaa ah gawk sak ciah Khanpughi ah kaa ah gawk khai; cun kawn ah Khanpughi naw a päng avan cu kümbe khai ah uk yawp khai.

²⁹ Sik ci gui ah k’chaw ah tuihniim ci gui cu, a i ah hmawk ah, a i ngaih u ne ami bi ang? Sik ci gui tho ne ami ghin nak ba kä om ci cicu akcang ah a kyak ung, a i ah kyasei sik cun gui ah k’chaw ah, chang gui naw tui ami hniim ang?

³⁰ A i ah kyasei mikmi mä a khin päng sei, kyihkyawk vai mi bui aut laih laih ang?

³¹ Phäi nau gui aw, kei cu ak hnüüp tä sei sih nak ka aut ci nei! Kei cu nangmi ah hmawk ah ka yeikyai ci, mi Bawipa Jesuh Khrih awn kawng ät ne mi ghin nak awn shin ah ka pyein ah kyak ci.

³² Kei cu hnicim chang ah ng’yak hlü düt yum ne Ephesus gawnu ah “kawng khawm” gui awn kami ng’toh vai sü ung, kei naw a i ka cik khai sü ang? Sik ci gui tho ne ghing ba khai gui ah kä ah kyak ung läi “Ngawi ung mi si lawk khai kya sei, ei ne aw ne mi om düt kaw.”

³³ Ang lih lat ah kä ngai en vä. “Ang khawt püi a shet ung chang k’ni shek ci.”

³⁴ Ng’düng nak awn law vä, nami katnak phung nawng shüt vä. Nangmi ungka amshah naw Khanpughi kä hmat ci, cun ah ka pyein cu nami lü ng’aa nak vai ah hmawk ah kyak ci.

Tho Ne Ghing Ba Ciah Pumsa

³⁵ Chang tumatmat naw, “Ak si cu a i chaa ah tho ne ghing ba khai ang? Cun cun naw a i ah mäih pumsa nak khai ang? Ci ne ang shi law ung;

³⁶ Cun cu chang k’ang ah ng’shi ah kyak ci! M’dek ung han geit ah m’shi cu kä a thu ce ung kä ng’lih pyo hlawt ci.

³⁷ M’Dek ung nami han geit cu, htang m’shi, kä cun ung m’shi tumatmat ah kyak ci, a ngawi ah däm lawk khai ah a phung ghing lüng nami geit ah kä kyak ci.

³⁸ Khanpughi naw amät ah ng’yak hlü ah cun ah geit m’shi cu ghing gong sak ci; geit m’shi phung am amät awn ng’nän ciah ghing gong cu pek ci.

³⁹ A ghing gui avan ah ami sa cu kä täng ci gui; chang ah sa a hei, khisa ah sa a hei, khaa ah sa a hei, nga ah sa a hei ah kyak ci.

⁴⁰ Khankho pumsa la khodek pumsa ciah om ci; khankho pumsa ah ni kyom nak cu khodek pumsa ah ni kyom nak awn kä täng ci.

⁴¹ Hni ung a kyom nak om hnga ci, chaa ung a kyom nak om hnga ci, aisi gui ung phi ami kyom nak om hnga ci; aisi gui tumat la tumat phi ami kyom nak a hlü hlü ah kyak ci.

⁴² Sik ci gui tho ne ami ghin ba ah mawng cu ka ning m’thein gui khai. Pumsa cu m’ciim yah ung thuka thei ciah kyak ci; a thawh law ba ung kä thuka thei ciah kyak ci.

⁴³ M’ciim yah ung sheka ne k’thagui maih ci, a thawh law ba ung kyom sang ne k’thagui be ci.

⁴⁴ M’ciim yah ung m’dek chang pumsa ah kyak ci, a thawh law ba ung mumcha pumsa ah kyak ci. M’dek-chang pumsa om ci kyasei mümcha pumsa phi om ci.

⁴⁵ Cacim ung, “Ak htük ah chang Adam cu, a hnun ghing ah a tüi ah kyak ci, ak hnu bäih ah Adam cu Mumcha ghin sak ciah kyak ci.

⁴⁶ Mumcha pumsa ng’tüi law htük ciah kä kyak ci, khodek pumsa a om kawn ah Mumcha pumsa om lawk ci.

⁴⁷ Ak htük bäih Adam cu khodek a pyan ah kya ne, khodek ungka lawk ciah kyak ci; Ak hnih nak Adam cu Khankho ah kaa lawk ciah kyak ci.

⁴⁸ Khodek khäm ciah chang gui cu, khodek pyan ah mäih lawk ci gui; Khankho khäm ciah chang gui cu khankho ah kaa kyum lawk ciah mäih lawk ci gui.

⁴⁹ Mikmi cu khodek pyan ah chang ah müi, mi müisa nak ah mäih ah, khankho ah kaa kyum lawk ciah chang ah müi, mi müisa nak khai nei.

⁵⁰ Phäinau gui aw, kei naw ka pyein hlü cu, si la sa awn pyan ah chang naw Khanpughi ah uknak kho kä khäm hlawt khai. Thuka thei cicu käthuka thei ciah kä kya hlawt khai.

⁵¹ Ngai vä, thuuk ne ng’düng ciah mawng cu ka ning m’thein gui khai.

⁵² Mikmi mi van cu kä mi sik khai, cun ung phi pyungheng ami tum law ung mikmi cu mik m’chip ah mäih ah a shänghta ung mi ng’thang yawp khai. Ak hnu ah k’phyungheng ami tum law ung sik ci gui cu tho ba u ne, sih nak cu angtäi ah phyawng nak khai gui. Mikmi mi van cun phi mi ng’thong yawp khai.

⁵³ Thuka thei cicu kä thuka thei ciah ng’thong khai; si thei cicu kä si hlawt ciah ng’thong khai.

⁵⁴ Thuka thei cicu kä thuka thei ciah phi bäi, si thei cicu kä si thei ciah phi bäi, ang thon kawn ah, “Sih nak cu m’shiu ne m’di pyi nei, khütnäng nak cu kümbe pyi ci nei” ciah cacim cu akcang ah khüm khai.

⁵⁵ “Sih nak, nang ah k’sam mei cu a hawi ang? Sih nak nang ah m’khütnäng nak cu a hawi ang?

⁵⁶ Sih nak ah k’sam mei cu katnak ah kyak ci, katnak ng’huuk nak cu thukhän ah kyak ci.

⁵⁷ Cun ung phi mi Bawipa Jesuh Khrih ung, sih nak m’khütnäng nak na pe gui ciah Khanpughi cu kam hlüngtai aih ci nei.

⁵⁸ Cun ah kyasei phäinau gui aw, khüi ne ng’düi ne ghaat ne ng’bi vä. Khanpughi ah khuut bi cu a i yah ung phi a kholä ah kä kyak ci, cicu hmuhmat u ne, angtäi sei khüighaat vä.