1 KORIN 14 - Cho Bible Common Language 2016

Mumcha Theing ah M’cümhnah Nak Ak Tung Ba Gui

¹ Cun ah kyasei m’hni nak nami k’pan vai ah läk vä. Mumcha m’cümhnah nak cu ng’yak hlü nak om sä, Khanpughi ah ng’thu ng’shäu ne pyein nak cu ak tung ah ng’ya hlü pi vä.

² Kä hmat ah ng’thu pyein ci cu, chang ng’thu püi ciah kä kyak ci, Khanpughi ng’thu püi ciah kyak ci, ani ah ng’thu cu a u naw kä hmat ci. Ani cu Mumcha hlüngtai nak awn thuuk ciah ng’thu gui pyein ci.

³ Cun ung phi Khanpughi ah ng’thu ng’shäu ciah chang cun naw, chang gui ng’thu püi gui ne, m’hteihtang nak gui, m’shümthein nak gui, shungvong nak gui ah ng’thu pyein ci.

⁴ Kähmat ah ng’thu pyein ciah chang naw amät küikyan ci, Khanpughi ah ng’thu ng’shäu ne pyein ciah chang naw Khrithabum avan küikyan ci.

⁵ Nangmi nami van cu ng’thu a hlü hlü nami pyein vai ah ka ng’ya hlük ci; cun ung phi Khanpughi ah ng’thu ng’shäu nak ah m’cümhnah nak nami gah vai cu ka ng’ya hlü pi ci. Khanpughi ah ng’thu ng’shäu ne pyein ciah chang cu kä hmat ah ng’thu pyein ciah mä küikyang hlüngtai tu ba ci. Kä hmat ah ng’thu pyein ci cu, m’hlan ne pyein ci a om ung vah Khrithabum ah phäh ah a phu om ci.

⁶ Cun ah kyasei phäinau gui aw, nangmi ah kei ka law ung, ng’thu a hlü hlü awn ng’thu ka pyein ung bä khai ang? Kei ah law püi ah ng’thu cu, Khanpughi ah ng’thu thuuk, hmuhmat nak, kümbe ciah ng’thu la m’theithang nak ah kä a kyak ung, a i ah kä ng’khän khai nei.

⁷ Ghin nak kä om ciah k’pyung la k’pen m’hlui gui cä teng shüm vä, cän gui ah k’aw cu ng’theiu ne kä ang gin ung, a i ng’äi ah mawng ah a u naw kä hmat khai nei.

⁸ K’Phyungheng tum ah k’aw kä a ng’theiu vah a kyak ung, gaa tuk vai ah a u kä pawng m’teim khai nei.

⁹ Acun ah mäih ah kä hmat ah ng’thu awn nami pyein ah thu cu, m’hlan ne a u naw kä a pyein ung a u naw kä hmat khai cun ung nami ng’thu cu khokhi ung a kholä ah maih tu düt khai nei.

¹⁰ Khomdek ah khan ung ng’thu a hlü hlü om ci, cun ung phi chang ah kä hmat a i ng’thu kä om ci.

¹¹ Kei ah kä hmat ah ng’thu ciah chang cu, kei ah hmawk ah, a kho hei chang ah kyak ci, ani ah hmawk ah kei phi a kho hei chang ah ka kyak ci.

¹² Nangmi cu Mumcha m’cümhnah nak nami ng’ya hlü aih ci, cun ah kyasei Khrithabum cawhkyan nak vai ah m’cümhnah nak cu nami mang thei vai ah nami k’tha nak vai nei.

¹³ Kä hmat ah ng’thu pyein ciah chang naw, ang thu cu k’phlah ne a pyein hning vai ah ak taigü vai nei.

¹⁴ Kei naw kä hmat ah ng’thu awn ka k’taigü ung, ka mümcha ak taigü ung phi, kam lung kyong ung a i kä om ci.

¹⁵ Cun ung kei naw a i chaa ka bik khai ang? Ka mümcha awn ka taigü ung kam lung kyong ung phi kak taigü khai; ka mümcha awn ng’äi kam cu ung kam lung kyong ung ng’äi kam cu khai.

¹⁶ Nang cu nang mümcha bäng awn Khanpughi m’hlüngtai ne na k’taigü ah a kyak ung, pum tuk ciah chang tumat naw, nami ng’thu kä hmat ci kya ne, a i hawkchaa ah “Amen” a ci tu vai ang?

¹⁷ Nang naw Khanpughi m’hlüngtai ne na taigü nak cu, a i hlawk ah a ni ung phi, chang hei ah phäh ah a bä nak kä om ci.

¹⁸ Kei cu nangmi ah mä thu a hlü hlü ka pyein thei pi hning ci kya sei Khanpughi kam hlüngtai ci.

¹⁹ Cun ung phi pum ne khawihnah nak läi ung, kähmat ah thu tämkäp phya khak pyein na k’dam, hmat yäi vai ah thu m’kha hma bäng awn kei naw kam theithang pyeinsa hlük ci nei.

²⁰ Phäinau gui aw, ak hmawhta gui ah mäih ah kä nami kyak vai nei; ak hmawhta gui ah mäih ah shetkat nak phiawn tah u ne, ang vai pyi ah mäih ah nami ngaih-tüh vai.

²¹ Cacim ung; Ka chang gui cu, chang ah hta ah thu a heihei awn, ka ng’thu püi gui khai. Akho hei chang gui ah m’gawng awn ka ng’thu püi gui khai, Cun ung phi ka chang gui naw Kei ah ng’thu cu kä ngai khai gui, ci ne Bawipa naw pyein ci” ciah om ci.

²² Cun ah kyasei kä hmat ah ng’thu pyein nak ah m’cümhnah nak cu kä yum ci gui ah hmawk ah cäicat nak ah kyak ci, yum ci gui ah hmawk ah kä kyak ci, Khanpughi ah ng’thu shäu nak ah m’cümhnah nak cu, yum ci gui ah hmawk ah cäicat nak ah kyak ci, kä yum ci gui ah hmawk ah kä kyak ci.

²³ Khritha gui akda a täng ah ng’bum u netah, ami van kä hmat ah ng’thu ah ami ng’thu yah ung kä hmat ciah chang, kä cun ung kä yum tuk ciah chang gui ami law ung, ‘Nangmi ak gu gui nei’ cine kä pyein khai gui ang?

²⁴ Cun ung phi Khanpughi ah ng’thu thuuk ng’shäu ne pyein ci a om yah ung kä yum tuk ciah chang, kä cun ung kä hmat tuk ciah chang, a luh law ah a kyak ung, nami ng’thu pyein ang yak nak tu awn, ani cu katnak bik ciah chang ah a kyak ah mawng hmat lawk khai nei.

²⁵ Acun ah ang yak tu gui naw ani cu ng’thumcha sei, ani ah m’yih ne ang ngaih-tüh gui cu avan ng’dang sei, “Khanpughi cu nami ng’lung ah akcang ah om ci nei” cine ng’kyaa ne, m’khuukdoong ne, Khanpughi cu khawihnah khai nei.

Pum Im Kyong ah Khawihnah Nak ah Mawng

²⁶ Cun ah kyasei phäinau gui aw, nangmi cu khawihnah vai ah nami pum law ah a kyak ung, tumat naw ng’äi m’cu sei, tumat naw m’theithang sei, tumat naw Khanpughi ah ng’thu thuuk pyein sei, tumat naw ng’thu a hlü hlü awn ng’thu pyein sei, a hei tumat naw cun ah ng’thu m’hlan ba sei, nami bi vai. Cun ah nami bi nak phung cu Khrithabum ah bä nak ah kya sä bäi.

²⁷ Kähmat ah ng’thu awn pyein law vai ung, hnih phi bäi, akda pi thum naw phi bäi, tumat täi ah nami pyein vai. Chang tumat naw cun ah pyein phung cu chang ah hmat vai ah m’hlan ne a pyein ba vai.

²⁸ Ng’thu m’hlan ba khai a u kä a om ah a kyak ung, kähmat ah thu awn pyein hlük ciah chang cu pum im kyong ah kä chiu en ah a düm ah a om vai, amät la Khanpughi bäng ang thu püi vai.

²⁹ Khanpughi naw ng’thu a pyein sak ah chang hnih naw baw, thum naw baw, ng’thu pyein khätah k’pawih ba ci gui naw ng’thumcha ne ngaih tüh u sä.

³⁰ Cun ah pum nak ung ngo tuk ciah chang tumat naw Khanpughi ah ng’thu a gah law ah a kyak ung, ng’thu pyein ciah chang cu ng’düm sä.

³¹ Nangmi nami van naw tumat täi ah Khanpughi ah thu cu nami shäu vai, cun ung ngai lawk ciah chang gui cu ng’theithang u ne, k’thamah nak gah khai gui.

³² Khanpughi ah thu ng’shäu nak ah m’cümhnah nak gah ciah chang naw a mät thu a khäm vai;

³³ a i ah kya sei ci ung Khanpughi naw kä ng’khämbawi khai ah bi vai cu kä ng’ya hlük ci, ng’awi ng’gi nak la dimdeeih nak vah ng’ya hlük ci.

³⁴ Khanpughi ah Khrithabum gui ung mi m’tämgan law ah mäih ah ng’bum nak ung hnumi gui cu a düm hta ah om u sä. Ngami cu thu kä pyein tu hning ci gui: Jew chang gui ah thukhän ung, “Hnumi gui cu pum nak ung ang vai ah kä ami kyak en vai” ciah om ci.

³⁵ Ngahmi cu ami hmuhmat tu hlü a om ah a kyak ung im ah hteit ba netah, ami cei ami ng’shi tu ba vai. Khrithabum gui ah pum nak ung hnumi naw ng’thu a pyein tu cu lü ng’aa nak ah kyak ci.

³⁶ Khanpughi ah ng’thu thuuk cu nangmi ungka lawk ciah kya ne ang? Kä cun ung, cun ah ng’thu cu nangmi bäng ung gawk lawk ciah kya ne ang?

³⁷ Amät naw amät Khanpughi ah ng’düihpüi ah ka kyak ci cik ciah chang, mümcha m’cümhnah nak ka gah ci cik ciah chang naw, Khanpughi ah thukhän awn shin ah ca ka guk law ah mawng cu yum ngak sä.

³⁸ Cun ah kä a yum ngak ung ani cu a i ah kä nami tä en vai nei.

³⁹ Cun ah kyasei phäinau gui aw, Khanpughi ah ng’thu ng’shäu ne pyein nak ung nami m’lung khäng htek sä, ng’thu a hlü hlü pyein nak phi kä maa en nah vä.

⁴⁰ A mawng ammaa avan cu a khüimaai ang käkhtäng ah nami bi vai nei.