1 KORIN 13 - Cho Bible Common Language 2016

M’hni Nak

¹ Kei cu m’dek chang ah thu a hlü hlü la khanchang ah thu ah ka ng’thu thei ung phi, m’hni nak kä a om ung, tum bä ung ng’ging ciah k’bei la ng’sheei ah mäih ah ka kyak ci.

² Kei cu kümbe ciah thu ka pyein hning ung phi; thuuk ne ng’kau ci hmuhmat nak la langkha nak a om ung phi; khom’htung ng’nawn sak hning ciah yum nak a om ung phi-kei ung m’hni nak kä a om ung, kei cu a kholä ah kyak ci.

³ Kei ung om ciah khawh avan pe ne, ka pumsa mei ung m’khih hning ne Khähghah nak hlü vai ah ka ap ung phi, kei ung m’hni nak kä a om ung, kei ung bä nak kä om ci.

⁴ M’Hni nak cu hniimgei nak, ng’awi ng’gi nak ah kyak ci; m’thüi m’khang nak, khähghah nak, chang ah ng’shei nak kä om ci.

⁵ M’Hni nak cu ak she kä shui ci, mät ah chaw ah kä k’hman ci, kä m’lung k’she ci, chang ah katnak kä m’kat ci:

⁶ M’Hni nak cu ak she ah hmawk ah yei nak kä om ci, düng nak ah hmawk ah yei nak om ci.

⁷ M’Hni nak ung hnu ng’hlah nak kä om ci; m’hni nak ung yum nak, ngaih ü nak la hniimgei nak cu kä ng’chei phung ci.

⁸ M’Hni nak cu langtäi ci. Kümbe ciah thu thei nak, küikyang ciah thu a hlü hlü pyein nak, thuuk ciah hmuhmat nak gui cu maih yawp khai nei.

⁹ Thuuk ciah mi hmuhmat nak, kümbe ciah mi ng’thu thei nak gui cu, kä kümbe ci;

¹⁰ Cun ung phi kümbe nak a gawk law hnüüp ung kä kümbe nak gui cu ng’kawn yawp khai nei.

¹¹ Kei cu ka k’hmaw yah ung ka ng’thu htau, ka om ih, ka m’lung ngaih cu ak hmaw ah mäih ah kyak ci; tuhbäi ka ng’vai law kawn ah ak hmaw ah mäih ah kä ka kyak ba ci.

¹² Tuhbäi mikmi ah hmuh nak cu müi m’dang ci ung müi teng ah mäih ah kyak ci; cun kawn ah mik hmai ng’chum sei mi ng’hmu lawk khai. Tuhbäi kei ah hmuhmat nak cu kä kümbe ci, cun kawn ah, Khanpughi naw kei cu kümbe sei a na hmuhmat ah mäih ah, kei naw kümbe sei ka hmuhhmat lawk khai.

¹³ Ak tung ah pyein ung yum nak, ngaih u nak, m’hni nak ciah ng’täi ci mawng thum om ci; cun gui ung m’hni nak cu ak hlüngtai pi ah kyak ci.