1 KORIN 12 - Cho Bible Common Language 2016

Mumcha Theing ah M’cümhnah Nak

¹ Tuhbäi ca guh ne nami na ng’shi ah Mumcha Theing ah m’cümhnah nak ah mawng, ka ning m’thein gui khai. Phäinau gui aw, cun ah a mawng cu akcang ah nami hmat vai ah ka ng’ya hlük ci nei.

² Nangmi cu khritha ah kä nami kyak pha ung lam hma u ne, kä ghing ciah a gup gui a hlü hlü ah nami khawihnah man cu nami hmat pyi ah kyak ci.

³ A u chang phi Khanpughi ah Mumcha ah lam shüm nak kä gah ci naw Bawipa Jesuh cu kä k’she na hning khai; a chang phi Mumcha Theing naw lam kä am shüm naw ‘Jesuh cu Bawi Nei’ cine kä ng’kyaa hlawt khai, cicu ka ning hmat sak gui hlük ci.

⁴ Mumcha m’cümhnah nak a hlü hlü om ci, cun ung phi cun gui avan cu Mumcha tumat bäng naw pek ci.

⁵ Khuut bi nak a hlü hlü a om ung phi, akhuut bi peit ah Bawipa tumat bäng om ci.

⁶ Khuut bi nak vai k’thagui a hlü hlü a om ung phi, chang a phäh phäh am, thagui a hlü hlü pek cicu Khanpughi tumat bäng ah kyak ci.

⁷ Chang van ah nikyom nak vai ah, chang päng päng naw, a mawng tumatmat awn, Mumcha ah om püi nak cu ng’dang phäh phäh ci.

⁸ Mumcha Bawi naw chang tumat am kümbe ciah cüivai nak awn pyeinsak nak cu pek ci, acun ah Mumchabawi bä naw, a hei chang tumat am kümbe ci hmuhmat nak awn thuuk ne ng’kau ci pyeinsak nak thei cu pek ci.

⁹ Acun ah Mumchabawi tumat bä naw chang tumat am, yum nak ah hlüngtai nak cu pe ne, a hei chang tumat am, gawpai ci gai sak nak ah hlüngtai nak cu pek ci.

¹⁰ Mumchabawi naw chang tumat am cäi aih vai bi nak ah hlüngtai nak, a hei tumat am Khanpughi ah Thu thuuk pyein nak; a hei tumat am Mumchabawi ah peit ah thagui ah kyak ci la kä kyak ciah m’khoichaa nak, cu pe ne; chang tumat am Ng’thu a hlü hlü pyein thei nak, a hei tumat am, cun ah thu a hlü hlü cu k’phlan ne pyein nak ah k’thagui cu pek ci.

¹¹ Cun ung phi cun gui avan pek cicu Mumchabawi tumat bäng ah kyak ci: Mumchabawi naw, a mät ah ng’yak hlü ah, chang tumat ci am, m’cümhnah nak a hnga hnga cu yuk m’kyum law gui ci.

Akda ah Ng’phyeekpai Ciah Pumsa Tumat

¹² Bawi Khrih cu akda ah ng’phyeekpai ciah pumsa tumat awn täng ci; ang phyeekpai a hnga hnga a om ung phi pumsa cu tumat bäng ah kyak ci.

¹³ Acun ah mäih ah, Jew chang, khui hei chang, chang khleihtein, chang ng’päi om, chang mi van cu Mumchabawi tumat ung tui mi ng’hniim u ne, pumsa tumat ah mi kya lawk ci. Acun ah Mumcha cu chang mi van naw mi gah ah kyak ci.

¹⁴ Pumsa ung ang phyeekpai tumat bäng om ciah kä kyak ci, akda om ci.

¹⁵ Kho naw, “Kei cu kut ah kä ka kyak ci, pum awn kä ka ng’phaa ci” a ci ung cun a ci nak awn ani cu pum ung kä ng’phaa tuk ciah kya ne ang?

¹⁶ Hnga naw, “Kei cu mik ah kä ka kyak ci, pum awn kä ka ng’phaa ci” a ci ung cun a ci nak awn ani cu pum ung kä ng’phaa tuk ciah kya ne ang?

¹⁷ Pumsa avan cu mik ah a kyak ung a i chaa mi ng’yak khai ang? Pumsa avan cu hnga ah a kyak ung a i chaa ah mi ng’ghi khai ang?

¹⁸ Khanpughi naw amät ah ng’yak hlü ah pumsa ung ang phyeekpai gui cu a tüi m’hnüt ah kyak ci.

¹⁹ Ang phyeekpai tumat bäng a om ung pumsa ah kä küm hlawt khai.

²⁰ Cun ah kyasei ang phyeekpai akda a om ung phi pumsa cu tumat bäng ah kyak ci.

²¹ Cun ah kyasei, mik naw kut am, “Nang kä ka ning ya hlük ci” ci ne kä pyein hning ci. Lu naw phi kho am, “Nang kä ka ning ya hlük ci” cine kä pyein hning ci.

²² Pumsa ung yoken tu ba ciah mi ngaih cu kä a om ung kä bä ci;

²³ Kä müisa ngai ciah mi ngaih nak yah ah ang phyeekpai cu mi geingbawi nak pi vai ah kyak ci, pumsa ung kä teng k’phyaa ngai ciah mi ngaih nak yah cu, ak tung pi ah mi pyamtham ah kyak ci,

²⁴ a kyom ei nak yah läi cu pyamtham vai kä hlü ci. Khanpughi naw pyamtham vai hlü ci gui cu, m’tamkhah nak pi vai ah, a täng ah m’dawn ne tüi sho gui ci.

²⁵ Cun ah kyasei pumsa tumat ung hngi hnga nak kä om ci, ang phyeekpai gui a van cu ng’gui ng’phaa yawp ci gui.

²⁶ Pumsa ah ang phyeekpai tumat a yaica ah a kyak ung, a hei gui ami van yaica yawp ci gui; pumsa ang phyeek pai tumat m’hlüngtai nak a om ah a kyak ung, a hei gui ami van yei kyai yawp ci gui.

²⁷ Nangmi nami van cu Bawi Khrih ah pumsa ah nami kyak ci, nangmi ak chang sing cu, apumsa ah ng’phyeekpai ah nami kyak ci.

²⁸ Khanpughi naw khrithabum ah kyong ung, ak htük bäih ah ang düih püi gui, ak hnih nak ah purofet gui, ak thum nak ah saya gui; cun kawn ah cäi aih vai m’dang ci gui, cun ah hnu ah gawpai ci gai sak nak ah hlüngtai nak om ci gui, pawchang m’hteihtang hning ci gui, m’shüm thein hning ci gui, kä hmat ah ng’thu ah thu nak thei gui a phäh phäh ah tüi m’hnüt gui ci.

²⁹ Ngahmi cu ami van ang düihpüi gui, purofet gui, saya gui ah kä kyak ci gui. Ngami ami van ung cäi aih nak vai ah hlüngtai nak phi kä om ci.

³⁰ Ngahmi ami van cu gawpai ci gai sak ci, kä hmat ah thu ah thu pyein hning ci, acun ah ng’thu k’phlan ne pyein hning ciah kä kyak ci gui nei.

³¹ Cun ah kyasei nangmi naw küikyang pi ciah m’cümhnah nak cu nami m’lung ung khän sak vä. Cun ah küikyang pi ciah m’cümhnah nak cu ka ning m’dang gui khai nei: