1 KORIN 10 - Cho Bible Common Language 2016

Agup Hnungtuk Püi Ciah Khäntam Nak

¹ Phäinau gui aw, Moses ng’vaipi ciah mi pupa gui ung dang ciah a mawng gui cu ka ning shüm ba sak gui hlük ci. Ngami cu khawmei naw kphiawn nak gui ah ka ung, Tuisen Tuinu cu ghing phyawng ne kat law ba ci gui.

² Ngahmi cu khawmei la tuinu ung Moses ah chang ah ami kyak nak ah tui-hniim ci gui.

³ Ami van naw täng ciah mümcha m’htut cu ei u ne, täng ciah mumcha tui cu awk ci gui.

⁴ Ngahmi cu, ngami awn a täng ah hteittuk ciah mümcha lungnu ung kaa tui cu awk ci gui; Cun ah Lungnu cu Bawi Khrih amät ah kyak ci.

⁵ Cun ung phi ngami ungka akda pi cu Khanpughi ah kä ng’yak hlü gui ah kya ne, ami gook gui cu bungpuk ah ho shüt ci.

⁶ Shin ah m’tumtäng nak cu mikmi ah phäh ah kya ci, cun ah kia sei, ngami ah bi ah mäih ah akshekha gui cu kä mi ng’yak hlü en vai;

⁷ ngahmi ah mäih ah a gup kämi khawihnah vai ah ana khäntam nak gui ah kyak ci, cacim ung, “Chang gui cu ng’hne ne ei awktat u ne ng’nauknam ci gui” ciah om ci.

⁸ Mikmi naw cun ah chang amshah gui ah mäih ah pletbeng nak cu kä mi läk ken tu vai, ngami ungka chang tämkäp m’ku-lei-thum cu hnüüp ät ung sik ci gui.

⁹ Mikmi naw chang amshah gui ah mäih ah Bawi Khrih cu kämi phawtcam men vai, ngami cu k’phyu naw k’dawk gui sei si yawp ci gui.

¹⁰ Mikmi cu chang amshah gui ah mäih ah kämi ng’nakso tuk khai, ngami cu Sihnak ah khanchang naw m’di gui yawp ci.

¹¹ Ngahmi ung cun ah a kyak gui cu a hei gui ah ng’shümhmuh nak vai ah kyak ci. Mikmi cu kho ah khüt law nak vai ah khin ung mi ghing om ciah kyasei, ami na khäntam nak gui ah shin gui cu ami guk ah kyak ci.

¹² Kei khüi ne kang düi ci cik ciah chang naw kä a kyuktäät vai ah ak tha nak pi vai nei.

¹³ Nangmi naw tuhbäi nami buiaut ah tüihtok nak gui cu, chang ung gawk law man ci bängbäng ah kyak ci nei. Khanpughi cu a shaitaak ah mäih ah om ciah kya ne, nangmi naw kä nami m’khüt vai ah tüihtok nak cu kä ning awt sak gui khai. Tüihtok nak nami awt law ung nami m’khütnäng nak vai ah k’thagui ning pe gui ne, nami phiawn nak vai ah lam ning m’hnuh gui khai.

¹⁴ Cun ah kyasei ka m’hni teihpüi gui aw, a gup nami khawihnah nak cu nawng shüt vä.

¹⁵ Hmuhmat thei ciah chang gui ah k’bäi ne ka ning thu püi gui nei. Kei ah thu cu ngaih-tüh kheng shüm vä.

¹⁶ Mikmi naw Bawipa ah mü ei mi ei ung, Khanpughi cu m’hlüngtai ne khap cu la ne mi awk ung, Bawi Khrih ah si mi ng’pai tu ah kyak ci. M’htut cu k’bo ne la ne mi ei cun phi, Bawi Khrih ah sa mi ng’pai tu ah kyak ci.

¹⁷ M’Htut pum ät bäng om ci, mikmi cu mi da pang ung phi, cun ah m’htut pum ät cu mi ng’pai ci kya sei pumsa tumat ah mi kyak ci.

¹⁸ Jew chang gui cu teng gui shüm vä; ngami cu khawihnah nak ei ci gui ah kya ne, Khanpughi ah mang kyang ung khawihnah tuk ci gui.

¹⁹ Cun ah kyasei a gup kä cung a gup am sonkyan ah ei cu küikyang ciah ka pyein ah kya naw;

²⁰ Cun ah kä kyak ci! Kei naw ka pyein cu, khawyo ah kyang ung sonkyan phung cu, khoshe am vawihpeh ah kyak ci, Khanpughi khawihhnah nak ah kä kyak ci. Kei naw nangmi cu khoshe ah pawchang ah nami kyak vai kä ka m’hni ci.

²¹ Nangmi naw Bawipa ah khap cu aw netah, khoshe ah khap cu kä nami aw hning ci; Bawipa ah tawnglang ung ei netah, khoshe ah tawnglang ung kä nami ei hning ci.

²² Mikmi naw Bawipa cu mi m’thüi m’ khang nak khai ang? Mikmi cu Bawipa ah mä mi khüighaat pi ciah mi ngai ne ang?

²³ Nangmi naw, “Keimi naw a i phi kami bi hning ci” nami ci cu akcang ah a kyak ung phi apängavan cu kä nik ci nei. “Keimi naw a i phi kami bi hning ci” nami ci ung apängavan cu kä bä ci nei.

²⁴ A u naw phi nami mät ah chaw kä nami shui vai, chang ah k’chaw nami shui peit vai.

²⁵ Nami m’lung ah ng’cim nak awn sumlei hmun ung ami yoih ah sa cu, kä awng-aa ling ah khleih ne nami ei vai.

²⁶ Cacim naw, “Khomdek la khomdek khan ung om ci ng’nü cu Khanpughi naw khäm ci” cine pyein ci.

²⁷ Bawi Jesuh kä yum ciah chang tumat naw, ning khin na gui khai ah ning khü gui sei, hteh vai ah nami k’bäi ah a kyak ung, nami m’lung ah ng’cim nak awn, ami ning chaan gui ah ei cu, kä ng’shica gui ling ne nami ei vai.

²⁸ Cun ung phi chang tumatmat naw, “shin ah ei cu m’ghuthaa nak nei” ci ne a pyein ah a kyak ung; cun ah ning m’thein gui ciah chang ah hmawk la m’lung ang cim vai ah hmawk ah, cun ah ei cu kä nami ei tu vai.

²⁹ Nami mät ah m’lung ang cim vai pyein ah kä kyak ci, ning m’thein gui ciah m’lung ang cim vai pyein ah kyak ci. Nangmi ungka chang tumatmat naw, “A i ah kya sei kei ah ng’päiye nak cu, a hei chang tumat ah m’lung ah ng’cim nak naw ana shum ang?

³⁰ Kei naw Khanpughi m’hlüngtai ne ka ei ah a kyak ung, cun ah m’hlüngtai ne ka ei nak ah mawng ung, a i ah kyasei chang hei naw kei, ana täitawk tu vai ang?” cine nami ng’shi nak om khai.

³¹ Nangmi cu nami ei ung phi, nami awk ung phi, a i nami bilawh ung phi, Khanpughi ah bämang nak ah hmawk ah nami bi vai.

³² Jew chang gui, Khui hei chang gui, Khanpughi ah pum im chang gui, a u chang ah hmawk ah phi yaica nak kä om men khai ah nami ghin om vai nei.

³³ Kei cu kabilawh nak phung ung ka mät ah hmawk ah ka ng’ä ne, chang gui ami yei vai ah, chang ah hmawk bäng ah ka bik ci. Cun cu ngami naw hun nak ami gah vai ah kyak ci, nangmi phi kei ah bi ah mäih ah nami bi tu vai.