1 KORIN 1 - Cho Bible Common Language 2016

¹ Khanpughi ah ang yak hlü ah khü ne, Bawi Khrit Jesuh ah ang düihpüi ah am düih ah kei Paul la mi nau Sosthenes naw:

² Korin gawnu ung Khanpughi ung ng’bum ciah chang gui la, a kho päng ungka mi Bawi la ami Bawi ah Bawipa Jesuh Khrit khawihnah ciah chang avan la, Bawi Khrit Jesuh ung kawngät nak awn Khanpughi ah chang avan la, Bawi Khrit Jesuh ung kawngät nak awn Khanpughi ah chang theing ah a khü gui ah chang gui am ca ning guk law gui nei.

³ Mipa Khanpughi la Bawipa Jesuh Khrit ah m’geinsei nak la dimdeeih nak cu nami van ah khan ah om sä.

Bawi Khrit ung Kaa Hrilham Gui

⁴ Nangmi am Bawi Khrit Jesuh ung geinsei nak a ning pek gui ah hmawk ah Khanpughi cu angtäi sei kam hlüngtai ci.

⁵ Nang mi cu Bawi Khrit ung nami kawng ät nak awn, thu m’gawng thei nak la hmuhmat nak mah mah ah bühmang nak cu nami gah ci.

⁶ Keimi naw kami pyeinsak ah Bawi Khrit ah mawng cu nami m’lung kyong ung phung ghing ne khäng pym ci.

⁷ Cun ah kya sei nangmi naw Bawi Khrit Jesuh a kyum law vai cu nami gin yah ung, nangmi naw kä nami gah tu ah hriham cu a i kä om khai.

⁸ Ani naw nangmi cu kho a khütunggawk sei ning düng sak gui khai. Cun ah kyasei Bawipa Jesuh Khrit naw ng’thu am chaa hnüüp ung nangmi cu kat nami phiawn nak khai.

⁹ Khanpughi cu düngnak apnak ah kyak ci. Ani naw nangmi cu A Htapa mi Bawipa Jesuh Khrit ung nami ng’awi gei vai ah a ning khü gui ah kyak ci.

Khrithabum Kyong ah Ami Ng’phyeekpai Nak

¹⁰ Phäinau gui aw, Mi Bawipa Jesuh Khrit ah huham awn kei naw nangmi cu ka ning m’cumcäi gui ci nei. Nami thu m’gawng ung nami kawng ät vai, cun ung nami ng’phyeekpai nak kä om khai. M’lung ngaih tumat, bü nak tumat ung nami kawng ät yawp vai.

¹¹ Phäinau gui aw, nangmi nami ng’gen tu ah mawng cu Chloe ah kyongkhui chang gui naw nam thein u sei ka ng’yak ci nei.

¹² Nangmi ungka chang amshah naw kei cu Paul ah nak chang cik ci, amshah naw Apollos ah nak chang cik ci, amshah naw Peter ah nak chang cik ci, amshah naw Bawi Khrit ah nak chang ci sei a heihei ah nami thu om cu ka pyein na kyak ci.

¹³ Bawi Khrit cu a phäh phäh ah ng’pyeekpai ne ang! Nangmi ah hmawk ah kutlam tung khan ah sik cicu Paul ah kya ne-ang? Nangmi cu Paul ah ming awn tui nami ng’hniim ne-ang?

¹⁴ Crispus la Kaius ah kawn ah nangmi a u phi, tui kä ka ning hniim sak gui ci kyasei Khanpughi kam hlüngtai ci.

¹⁵ Cun ah kyasei nangmi cu kei ah ming ung tui nami hniim ciah a u naw kä pyein hlawt khai.

¹⁶ (Stephanas la akyong ungka gui cu tui ka ng’hniim sak gui ci, cun kawn ah a u tui ka ng’hniim sak kä ka shüm ba ci.)

¹⁷ Bawi Khrit naw tuihniim nak ka pek khai ah ana tüih ah kä kyak ci. Thu Ni ka pyein khai ah ana tüih ah kyak ci. Cun ah kya sei hnicim chang ah hmuhmat nak ah thu kä pyein ne, kutlam tung ung Bawi Khrih ah sih nak ah hlüngtai nak kä a häu vai ah cun ah Thu Ni bäng pyein vai ah kyak ci.

Khanpughi ah Hlüngtai nak La cüi vai Nak awn Be Ciah Bawi Khrih

¹⁸ Kutlam tung ung Bawi Khrih ah sih nak ah mawng cu, dimaih khai ah chang gui ah hmawk ah akholä ah a kyak ung phi, hun nak gah ci gui ah mikmi ah hmawk ah, Khanpughi ah hlüngtai nak ah kyak ci.

¹⁹ Cacim ung; “Cüi vai ci gui ah lunglang nak cu di sak ne, Langkhaa ci gui ah hmuhmat nak cu ka heng khai ne!” ciah om ci.

²⁰ Cun ah kyasei hmuhmat ciah chang a hawi-ang a om, Cacim hmat ciah chang ahawi ang a om, ng’thu m’gawng thei ciah chang a hawi-ang a om! Khomdek khan ah hmuhmat nak phung cu Khanpughi naw gu-aang sak pyi ci nei!

²¹ Khomdek chang ah hmuhmat nak awn Khanpughi a u naw kä a hmat hlawt vai ah, Khanpughi naw ak cüikhai nak awn pyang ci nei. Chang gui naw gu-aang nak ah ami ngaih ah, keimi ah pyein ah thu awn yum ciah chang gui cu hun gui vei ah Khanpughi naw k’bäi ci nei.

²² Jew chang gui naw cäi aih vai gui cu k’thäh ci gui, Karikchang gui naw hmuhmat nak cu shum ci gui.

²³ Keimi läi cu kutlam tung ung ami ngawn ah Bawi Khrih ah mawng ng’shäu ne kami pyein ci. Cun cu Jew chang gui ah kä ng’ak hlü, clang khum hei gum ah hmawk ah akholä ah kyak ci.

²⁴ Cun ung phi Jew chang phi bäi, khui hei chang phi bäi, Khanpughi naw a khüpi ah chang phung ah hmawk ah Bawi Khrih cu Khanpughi ah hlüngtai nak la k’cüikhai nak ah kyak ci.

²⁵ Khanpughi ah shuhghawi nak ah ngaih cu hnicim chang ah hmuhmat nak ah tah bä pi ci, Khanpughi ah k’tha m’yu nak ah ngaih cu, hnicim chang ah k’thamah nak katah bä pi ci.

²⁶ Phäinau gui aw, nami mät Khanpughi naw a ning khü gui ah mawng cu nami ngaih-tüh ba vai nei. Hnicim chang ah hmuh nak ung, nang mi cu, hmulmatciah chang, hlüngtai ciah chang, a pakhui küikyang ciah chang kä nami da ci.

²⁷ Cun ung phi Khanpughi nawhmuhmat ciah chang gui ah ng’aa nak vai ah chang k’shekha gui cu ghü gui ci; Thamah ciah chang gui ah lü nak vai ah ak tha m’yu gui cu ghü gui ci.

²⁸ Khanpughi naw khomdek khan ung chang naw bä ciah ang ngaih gui m’shet nak vai ah, chang ah yaw k’she nak, chang ah päipih gui cu ghü gui ci.

²⁹ Cun ah kyasei Khanpughi ah maa ah a u chang phi a khähghah vai amawng kä om ci.

³⁰ Khanpughi naw nang cu Bawi Khrih Jesuh ung ning kawng ät sak gui ci, Khanpughi naw Bawi Khrih cu mik ah Lulang nak ah kyak sak ci. Bawipa awn mikmi cu Khanpughi ung mi ng’düng ci; mikmi cu Khanpughi ah chang theing ah mi kya law ne, phiawn nak mi gah ci.

³¹ Cun ah kyasei cacim ung om ciah mäih ah, “A u chang phi khähgha hlük ciah chang phung cu, Bawipa ah bi nak ah khan ung khänghah sä.”