1 JOHAN 5 - Cho Bible Common Language 2016

M’Dek Khan M’Khüt Näng Nak

¹ Bawi Jesuh cu Messiah nei cine yum ciah chang phung cu, Khanpughi ah hta ah kyak ci. Pa Khanpughi m’hni ciah chang naw ani ah a hta cun phi m’hni ci.

² Mikmi naw Khanpughi cu mi m’hni ne, ang thukhän cu mi läk nak awn, Khanpughi ah hta gui mi m’hni nak cu mi hmat ci.

³ Khanpughi m’hni nak cicu ang thu khän läk nak ah kyak ci. Ang thu khän läk cu mikmi ah phäh ah phuih gih ah kä kyak ci.

⁴ A i ah kyasei ci ung Khanpughi ah hta phung cun naw khomdek khan cu m’khüt näng ci. M’dek khan ung m’khüt näng nak mi gah cu mi yum nak awn ah kyak ci.

⁵ Khomdek khan cu a u naw m’khüt näng khai ang? Bawi Jesuh cu Khanpughi ah Htapa ah yum ciah chang bäng naw m’dekkhan cu m’khüt näng ci.

Bawi Jesuh Khrit ah Mawng Saksi Nak

⁶ Bawi Jesuh Khrit cu tui awn ang hnim nak la asi huk ne asih nak awn kyum lawk ciah Bawipa ah kyak ci. Ani cu tui bäng awn kyum lawk ciah kä kyak ci, tui la si awn kyum lawk ciah kyak ci. Cun ah düng ciah a mawng cu düng ciah Mumcha naw damg sak ci.

⁷ Saksi thum om ci;

⁸ Cun gui cu Mumcha, tui la Si ah kyak ci: cun ah thum naw tumat ah saksi dang sak ci gui.

⁹ Mikmi naw chang ah saksi cu mi yum ci, cun ung phi Khanpughi ah saksi cu m’khungpang pi bäih ci. Ani naw saksi nak ana peit gui cu A Htapa ah mawnglam ah kyak ci.

¹⁰ Khanpughi ah Htapa yum ciah chang phung naw shin ah saksi cu am lung kyong ung shum ci. Cun ung phi Khanpughi kä yum ci läi cu, Khanpughi naw A Htapa ah mawng a pyeinsak cu kä yum ci kya ne, Khanpughi hleeihlak ciah mäih ah ng’lat sak ciah chang ah kiak ci.

¹¹ Saksi ah ang dang nak ah mawng cu; Khanpughi naw angtäi ghin nak cu na pe gui ci, cun ah ghin nak cu A Htapa ung phung ci.

¹² Antapa gah ciah chang cu ghin nak gah ci; Khanpughi ah Ahtapa kä gah ciah chang cu, ghin nak kä gah ci.

Angtäi Ghin Nak

¹³ Kei naw shin ah ca ka ning guk law gui ah mawng cu, nangmi cu Khanpughi ah Htapa nami yum ci kyasei, angtäi ghin nak nami gah ah mawng cu, nami hmat vai ah hmawk ah kyak ci nei.

¹⁴ Amät ah ng’yak hlü ah mi ng’yoih thäh phung cu na ngaih pe gui ciah ngaih gep nak om sei, mikmi cu Khanpughi ah ma ah mi k’thamah ci.

¹⁵ Mi ng’yoih thäh phung cu Khanpughi naw na ngaih pe gui ci; cun cu düng sei mi hmat ah a kyak ung, mi ng’yoih thäh phung na pe gui ciah phi mi hmat ci.

¹⁶ Na phäi nau tumat cu a cheishoh ung phi sih nak ah katnak ah kä ah kyak ah khoi ung, Khanpughi ah nak taigü peit vai, Khanpughi naw ani am ghin nak cu pek khai nei. Cun cu sih nak ung kä gawk nak hnga vai ah cheishoh ciah chang gui ah mawng ah kiak ci. Cun ung phi sih nak ung gawk nak ah cheishoh nak om ci, cun ah hmawk ah nami taigü vai ah ka pyein ah kä kyak ci.

¹⁷ Shetkat nak nüng nüng cu cheishoh nak ah kyak ci, cun ung phi sih nak ah kä gawk nak ah cheishoh nak om ci.

¹⁸ Khanpughi ah htacun naw cheishoh nak kä bi ba ciah mi hmat ci, ani cu Khanpughi ah Htapa naw ngaih gep vai ah a shungvawng pyi ah kyasei, khoshe naw api ah phi kä tawklaih hlawt ci.

¹⁹ Khomdek khan avan cu khoshe ah uknak kaa ah om pang sei phi, mik mi cu, Khanpughi ah chang gui ah mi kyak cu, mi hmat ci.

²⁰ Khanpughi ah Htapa cu kyum law ne, Lulang nak cu na pe gui sei, Khanpughi akcang mi hmat tu cun phi, mikmi naw mi hmat ci. Mikmi cu A Htapa Bawi Jesuh Khrit awn mi kawng ät nak awn, Khanpughi akcang awn phi kawng ät ne mi ghing ci. Shin cu Khanpughi akcang ah kyak ci, ani ung mi gah cu angtäi ghin nak ah kyak ci.

²¹ Ka hta gui aw, Khanpughi kä akcang cu nami phiawn nak vai a nami om vai nei!