1 JOHAN 1 - Cho Bible Common Language 2016

Ghin Nak ah Thu

¹ Ghin nak ah Thu ah mawng ca kami ning guk lawk ci, cun ah Thu cu ak htük ge ung om ciah kyak ci. Cun ah Thu cu mi ng’yak ci, mi mik awn mi hmuk ci, mi kut awn mi tawn ci.

² Cun ah ghin nak mik awn hmuh vai ah a om yah ung mi hmuk ci, ani ah mawng phi mi pyein sak ci. Pa Khanpughi awn a täng ah om ciah ang täi ghin nak cu keimi ah khan ah dang sei, acun ah mawng cu kami pyein ci.

³ Keimi naw kami hmuh la kami ng’yak cu nangmi am kami ning shäu gui ci. Cun ah kyasei keimi cu Pa Khanpughi la A Htapa Bawi Jesuh Khrit awn kami pui m’ca ah mäih ah nangmi cu kei mi awn a täng ah nami pui m’ca tuk khai nei.

⁴ Keimi naw yeikyai nak kümbe sei kami gah nak vai ah shin ah ca kami guk law nei.

Khanpughi Cu Akdei

⁵ Tuhbäi keimi naw A Htapa ung hmu ng’ya ne kami ng’shäu ba ah thu cu, “Khanpughi cu akdei ah kyak ci, ani ung hmüp nak api phi kä om ci,” ciah kyak ci.

⁶ Bawipa awn kami pui m’ca ci nei, ci netah hmüp khui ung mi om ah a kyak ung, mi om ih la mi thu m’gawng van awn mi hleeihlak ciah kiak khai.

⁷ Cun ung phi ani cu akdei ung a om ah mäih ah, mikmi cu ak dei ung mi om ah a kyak ung, mikmi cu tumat la tumat pui m’ca nak om ci. Khanpughi ah Htapa Bawi Jesuh naw asi ng’hlui awn mi kat nak nüng cu m’si ne ana theing sak gui pyi ah kyak ci.

⁸ Kei ung shetkat nak kä om ci mi ciah kyak ung, mi mät naw mi mät mi m’hleei ciah kyak ci, mikmi ung düng nak la cang nak cu kä om ci.

⁹ Khanpughi cu a shaitaak küm sak ne, düng nak bäng bik ci, mik mi cu mi katnak ng’kiaa ne, mi ng’paa ah a kyak ung, mi kat nak nam gein gui ne, mi cheishoh nak nüng phi theingcim sak ci.

¹⁰ Kei shetkat nak kä ka bik ci, mi ciah a kyak ung, Khanpughi cu hleeihlak thei ciah mi pyan ah kyak ci, mikmi ung ani ah thu cu kä om ciah kyak ci.