1 GHANGPUGHANG GUI 9 - Cho Bible Common Language 2016

Khanpughi cu Solomon ah Ma ah Ng’dang Ba mä ci

¹ Ghangpughang Solomon naw Taigüim, mangim la ang yak hlü ah cawh kyan gui vai phung phung a cawh kawn ah,

² Kibeon ung ang dang ah mäih ah Bawipa cu ani ah ma ah ng’dang law ba ci.

³ Bawipa naw ani cu pyen nak ci, “Kei naw nang ah taigü ka ng’yak ci. Ngawi yä kei na khawihnah nak vai ah nang naw na cawh ah shin ah Taigüim cu kei naw ka k’bäi ci. Kei naw shin cu a khokphlüt ung ngäng ne ka shungvong khai.

⁴ Nang cu napa David ah mäih ah düng ne bä ne, kei ah bii bi ne, kei ah ka thukhän gui la ka ng’thumkhän phung cu na läk ah a kyak ung,

⁵ Kei naw napa David am ka shaitak cu ka k’pang khai, kei naw ka pyen nak cu Israel cu ani ah hta ng’shon naw angtäi sei uk khai ciah kyak ci.

⁶ Cun ung phi nang, käcung na hta ng’shon gui naw kei kä na läk ba u ne, kei naw ka ning pek gui ah thukhän gui la thumkhän gui cu kä läk ba u ne, a hei khanpughi gui ami khawihnah ah a kyak ung,

⁷ Kei naw ka chang Israel gui cu kei naw ka pek gui ah khaw ungka kak plon gui khai. Kei ami na khawihnah nak vai ah kei naw ka k’bäi pyi ah shin ah Taigüim cun phi kei naw ka nawng khai. Khaw nü ung chang gui naw Israel cu gaih tu u ne päipih khai gui.

⁸ Shin ah Taigüim cu ng’phye ne ng’phluk khai, acun ah pei ah hteit ciah chang phung cu cat ne cäi khai. ‘A i ah kyasei Bawipa naw shin ah khaw la shin ah Taigüim ah khan ah shin ah a bi ang?’ cine ng’shik khai gui.

⁹ Chang gui naw m’shang ba u ne, “A i ah kyasei shin ah kyak ci, ci ung ami pupa gui Egypt khaw ah ka law püi ba gui ciah Bawipa ami Khanpughi cu ami nawng ah phäh ah kyak ci. Ngami naw ami yumnak cu a hei khanpughi gui am pe u ne, acun gui khawihnah ci gui. Cun ah kyasei Bawipa naw leigai cu ami khan ah a law püi ah kyak ci.

Solomon la Hiram ah Ngüm äi nak

¹⁰ Solomon naw Taigüim la a mang im a cawh nak cu khawkum m’ku lüng ci.

¹¹ Tire Ghangpughang Hiram naw cedar sing, m’htai sing avan la abi nak ung ang’yak hlü ah ghui avan cu ani am pek ci. Cun angpyi kawn ah Kalile khaw ung gawnu m’ku cu Ghangpughang Solomon naw Hiram am pek ci.

¹² Hiram naw hteit ne teng gui ne kä yum gui ci.

¹³ Cun ah kyasei ani naw Solomon pyen nak ci, “Ka phäi aw, nang naw na na pek ah shin ah gawnu gui cu a i ah mäih gui ang!” cik ci. Cun ah kyasei cun ah area cu tu ä Kabula ah pyen ci gui.

¹⁴ Hiram naw Solomon am ghui 4, 000 kilokram däm ci m’khäh ci.

Solomon ah Ahei Abilawh gui

¹⁵ Ghangpughang Solomon naw Taigüim la mangim cawh nak ung, mang gaw ah a kiangtäng ung m’dek be nak ung, mang gaw k’pang cawh nak ung chang gui akghat ah ghüh gui ne bi sak gui ci. Ani naw ngami cu Hazor, Mekiddo la Keyera mang gaw gui cawh nak ung phi mang gui ci.

¹⁶ (Egypt ghangpughang naw Keyera cu tu ne khäm ci, pigaw chang gui ngawn gui ne, mang gaw phi mei awn m’khih ci, Ani naw cun cu a hta hnumi la Solomon ani ng’chungla yah ung ng’chungla them ah a pek goi ah kyak ci.

¹⁷ Cun kawn ah Solomon naw a cawh ba ah kyak ci.) Solomon naw a chang ghüh gui mang ne A htumtäng Beth Horon,

¹⁸ Baalath, Judah khongau ung Tamar,

¹⁹ Ei khei cawh nak ah mang gaw gui, ang sela gui la a yatha gui tha nak ah mang gaw gui la cawh vai ah ang yak hlü phung cu Jurusalem, Lebanon la a uknak ah khaw avan ung co ci.

^20-21 Solomon naw ghüh ne amang ah chang gui cu Israel gui naw Kaanan khaw ami khäm ba sang ung kä ngawn ne ami pawih nak gui ah Kaanan chang gui ah kyak ci. Cun gui ung Amorit gui, Hittit gui, Perizzit gui, Hivit gui la Jebusit gui ah kyak ci, cun gui ah hta ng’shon gui cu a tu-ä changshäm ah kya ne om ci gui.

²² Solomon naw Israel gui cu changshäm ah kä tha gui ci; ngami cu gakap gui, bawi gui, gakap bawi, yatha khawng gui, ng’se ng’cum ci gui ah bii bik ci gui.

²³ Solomon naw a cawh nak phung phung bii bik ciah chang ghüh gui khawngmang ciah bawi gui 550 lawk ci.

²⁴ Solomon naw akchu, Egypt ghangpughang ah a tha hnumi cu David ah mang im ungka naw Solomon naw a cawh pek ah mang im ung akplon kawn ah, mang gaw ah a kiangtäng ah m’dek cu k’be ci.

²⁵ Solomon naw kum ät ung thum vei ci, m’khih ne douthak nak la khawtsheng-douthak nak cu Bawipa ah phäh ah a cawh ah sonkiang ung douthak ci. Ani naw ang ui gui cun phi Bawipa am m’khih pek ci. Cun ah kyasei ani naw Taigüim cawh nak cu pyi phleh ci.

²⁶ Ghangpughang Solomon naw Edom khaw, Akaba tuikhep ah kem Elath ah pei, Ezionkeber ung htingpaw gui phi co ci.

²⁷ Ghangpughang Hiram naw htinpaw ung bii bi thei ciah chang gui cu Solomon ah chang gui awn bii bi ghawm khai gui ah tüi lawk ci.

²⁸ Ngami cu Ophira khawkawng ah hteit u neta ghui phi gha lei phli kilokram cu Solomon am thak law ci gui.