1 GHANGPUGHANG GUI 8 - Cho Bible Common Language 2016

Thukhän M’küm Cu Taigüim ah Hteh Püi ci gui

¹ Ghangpughang Solomon naw Israel pakhui gui pahta gui ung tängpang ci gui ami van cu ani ah Jerusalem ah ami law vai ah k’thäh gui ci, cun cu David ah mang gaw Zion ungka naw Taigüim ah Bawipa ah Thukhän M’küm hteh püi vai ah kyak ci.

² Ngami ami van cu akcha chih nak, Ethanim cha, ng’yii nak ah Pawi ung ng’bum lawk ci gui.

³ Ami ng’vai gui ami van ng’bum u neta, taigü gui naw Thumkhän M’küm cu chang u neta,

⁴ Taigüim ah hteh püi ci gui. Levit gui la Taigü gui naw phi Bawipa ah om nak ah Phung la cun ung khawcham gui avan cu Bawipa ah om nak ah Phung la cun ung khawcham gui avan cu Taigüim ah hteh püi ci gui.

⁵ Ghangpughang Solomon la Israel chang gui avan cu Thumkhän M’küm ah ma ah ng’bum u neta, htome la vantang akchün akda awn khawihnah ci gui — cun cu khei vai ah da aih ci.

⁶ Cun kawn ah Taigü gui naw Thumkhän M’küm cu Taigüim ah law püi u neta Atheingcim Pikbäih Hmun ung, Cherubim ah ka ah tha ci gui.

⁷ Cun gui ah ami k’phiäih ah ami ng’phia gui naw m’küm la kawh nak gui cu küm ci.

⁸ Kawh nak gui ah a mawng gui cu Atheingcim Pikbäih Hmun ah ama ungka naw a u naw phi hmu hning khai kyak ci, cun ung phi a hei ah ka naw kä hmuh vai kyak ci. (Kawh nak gui cu Tuhngawi güt a cu ah om ci gui.)

⁹ Thukhän M’küm ah kyong ah a hei, a i kä om ci, Sinai M’htung Moses naw a tha ah Lung phahlap hnih bäng om ci, cun cu Egypt ah ka Israel chang gui ami law ba sangung Bawipa naw thukhän abi gui ah kyak ci.

¹⁰ Taigüim ungka taigü gui ami luh law sang ung, Taigüim cu ang ghit ah ng’mei awn be ne,

¹¹ dei ne ng’shü ne Bawipa ah om nak ah kyak ci, ngami cu ami bi mawng bi ba khai gui ah akyong ah kä valut ba hlawt ci gui.

¹² Cun kawn ah Solomon cu taigü ne; “Nang, Bawipa naw khohni cu khomik ung na tha ci, cun ung phi nang naw khomei la hmüp khui ung om vai ah na ghü ci.

¹³ Tuhbäi kei naw bä ciah Taigüim cu nang ah phäh ah ka cik ci, Cun cu nang naw khonglän ung na om nak vai ah hmun ah kyak ci.”

Solomon naw Chang gui ah ma ah Thu pyen ci

¹⁴ Chang gui cun ung ng’düi u khäta, Ghangpughang Solomon cu ngami täng ah ng’hlat neta, Khanpughi ah hriham cu ngami ah khan ah k’thäh pe gui ci.

¹⁵ Ani naw, “Israel Khanpughi Bawipa cu m’tamkhah vä! Ani naw kapa David am shaitak a bi cu k’pang ci nei, ani naw a pyen cu,

¹⁶ ‘Kei naw ka chang gui Egypt ah ka, ka law püi ba gui yah ung, kei na khawihnah nak vai ah Taigüim cawh nak vai ah, Israel khaw avan ung a i mang gaw phi kei naw kä ka ghü ci. Cun ung phi, David aw, ka chang gui na uk vai ah kei naw ka ning ghü ci nei” cik ci.

¹⁷ Solomon naw k’täi ne pyen ne, “Israel gui ah Khanpughi Bawipa khawihnah nak vai ah kapa David naw Taigüim cawh vai ah pawngpüi ci,

¹⁸ Cun ung phi Bawipa naw ani cu pyen nak ci, “Kei ah phäh ah Taigüim cawh vai na ng’yak hlü cu na hman ci,

¹⁹ Cun ung phi nang naw kä na co hlawt khai. Kei ah Taigüim co khai cu, nang ah hta, namät ah hta ah kyak ci!

²⁰ “Tubäi Bawipa naw a shaitak cu k’pang ci. Kei cu Israel ghangpughang ah kya ne kapa ah hnün ung ka ngok ci, Israel Khanpughi Bawipa khawihnah nak vai ah Taigüim cu kei naw ka co ci.

²¹ Taigüim kyong ah Thukhän M’küm tha nak vai ah hmun phi kei naw ka pek ci, acun ung thukhän lung palap gui om ci, cun cu Egypt ah ka a law püi ba gui ah ung Bawipa naw, mi pupa gui awn a bi ah kyak ci.

Solomon ah Taigü

²² Solomon cu chang gui ah om nak ung sonkiang ah ma ah hteit ne ng’düi neta, a kut gui shäng ne,

²³ taigü ci, “Israel gui ah Bawipa Khanpughi khankho ung phi m’dek khan ung phi, nang ah mäih Khanpughi kä om ci nei! Nang naw na chang gui ung na thukhän cu nak pang ci, ami m’lung-ngaih avan awn nang ning ngai ne ami om sangung nang naw na m’hni nak cu na m’dang gui ci.

²⁴ Nang naw kapa David ung na shaitak cu nak pang ci; tuhngawi thulung päng cu küm ci nei.

²⁵ Tuhbäi, Israel Bawipa Khanpughi, kei ka taigü ci, nang naw kapa ung na bi ah a hei shaitak cun phi nak pang khai, nang naw na pyen nak yah ung, ngami naw ani ah mäih ah geing na ne nang thu ami ngaih ah a kyak ung, ani ah hta ng’shon ungka tumat mat naw Israel ghangpughang ah kya ne akphlüt ah uk khai.

²⁶ Cun ah kyasei tuhbäi, Israel Khanpughi, Na changshäm kapa David ung na shaitak gui a päng nü cu na kümbe sak ci nei.

²⁷ “O Khanpughi, khomdek khan ah akcang ah na om hning ci ang? Khankho avan phi nang naw nak pan hmuh vai ah kä ng’shawng ci nei, cun ah kya ne, kei naw ka cawh vai ah shin ah Taigüim cu a i ah ang shawng vai ang?

²⁸ Bawipa ka Khanpughi, kei cu na na changshäm nei. Ka taigü cu na ngaih peä, tuhngawi nang ah ning thäh cu na ngaih peä.

²⁹ Khawihnah nak vai ah nang naw na ghü ah shin ah hmun, shin ah Taigüim cu amü a hnüüp ngäng bom ä. Kei naw shin ah Taigüim täng ah mang ne ka taigü ung na ngai ä.

³⁰ Ka taigü na ngaih peä, na chang gui naw shin ah hmun täng ah mang ne ami taigü ung ngai gui ä, na m’geinsei gui ä.

³¹ “Chang tumat cu ak chang paw ah khan ah katnak bik ci, cine k’bün ne Taigüim na sonkiang ung law püi u khätah, ani cu chang ni ah a kyak ah mawng angtam law ung,

³² O Bawipa, Khankho ah ka naw ngai ne, na changshäm gui cu ng’thumcha gui ä. Katnak bik cicu akat ah mäih ah m’kyuk ne, changni cu phyawn sak ä.

³³ “Na chang Israel gui ami ga gui naw ami hnim gui cu, katnak bi ne ami ning hnungtuk püi ah phäh ah kyak ci, cun kawn ah nang ah ng’hlat law ba ne, shin ah Taigüim ung law ba u ne, nam geinsei gui vai ah m’lung neim ne ami taigü law ung,

³⁴ Khankho ah ka naw ngaih pe gui ä. Na chang gui ah katnak cu m’geinsei gui ä, ami pupa gui am na pek gui ah kho ung law püi ba gui ä.

³⁵ Na chang gui naw ning hnungtuk püi ne hmakat nak ami bi ah phäh ah khaw ah käu sak sang ung, ngami cu ng’yu ba u ne, Taigüim ah ng’hlat law ba ne, m’lung neim ne ami taigü law ung,

³⁶ Khankho ah ka naw ngaih pe gui ä. Ghangpughang la Israel chang gui ah hma nak cu m’geinsei gui ä. Düng cicu ami bi vai ah m’theithang gui ä. Cun kawn ah Bawipa, Na mät ah khaw ung khaw cu yuk aa ba sak ä, cun cu na chang gui am angtäi sei ami ka nak vai ah na pek gui ah kyak ci nei.

³⁷ Kho ng’lei ung ei kho ayaw ung phi kia, leigai acun yah ung phi kia, geitkaw gui cu khawkhi ng’ling naw a plawh ung, Khanpeh naw a ei ung, käcung na chang gui cu ami ga gui naw atuk law gui ung, käcung ami ng’lung ah gawnak nat nak a om law ung,

³⁸ ami taigü cu ngaih pe gui ä. Na chang Israel ungka gui cu ami m’lung thüisei, Taigüim täng ah ami kut shäng ne, ami taigü ung,

³⁹ ami taigü cu ngaih pe gui ä. Khankho na im ah ka naw ngami cu ngai gui ä, m’geinsei gui ä, m’hteihtang gui ä. Nang bäng naw vah hnicim chang ah m’lung ngaih cu na hmat ci. Chang päng cu amät ah om ah ciah om püi ä,

⁴⁰ Cun ung nang naw kami pupa gui am na pek gui ah khaw ung ami om ah chuih, na chang gui naw nang thu cu akhin avan ung ngai khai gui.

^41-42 “A shou nak ah khaw ah om ciah a khaw hei chang naw nang mingthangnak la na chang gui ah phäh ah dämduh ci na bi gui cu ng’ya u neta, nang ning khawihnah vai ah law ne, shin ah Taigüim ung a k’taigü law ung,

⁴³ ani ah taigü cu ngaih pe ä. Khankho ah a hawn ung na om ung phi ng’yak peä, na bi pek vai ah a ning thäh phi bi peä, cun ung khaw ah khan ung om ciah a ning thäh phi bi peä, cun ung khaw ah khan ung om ciah chang van naw, na chang Israel gui ah mäih ah, ning hmat khai gui, na ng’thu phi ngai khai gui nei. Cun kawn ah nang ning khawihnah nak vai ah hmun ah kyak khai ah shin ah Taigüim kei naw ka cawh cun phi hmat khai gui nei.

⁴⁴ “Ami ga gui tuk khai ah ng’tuk nak ah hteit khai gui ah na chang gui cu ng’thu nak bäi gui ung, a hawi ami om ung phi, nang naw na ghü ah shin ah mang gaw la nang ah hmawk ah kei naw ka cawh ah shin ah Taigüim cu man na ne, nang ah ami taigü ung,

⁴⁵ ami taigü cu ngaih pe gui ä. Khankho ah ka naw ng’yak pe gui ne, näng nak cu pe gui ä.

⁴⁶ “Na chang gui naw ning hnungtuk ne hma u ne — kä hma ci a u kä a om ba ah a kyak ung — na m’lungshe nak awn ami ga gui am na hnim sak gui ah a kyak ung, ngami cu pha gui ne thawngcum ah a hei kho ah ami hteh püi ung, cun ah khaw cu shou nu ciah a kyak ungphi,

⁴⁷ na chang gui ah taigü cu ngaih pe gui ä. Cun ah khaw ah ngami cu ng’yuu ba u ne, nang ah ami taigü law ung, a i hlawk ah ami kat ah mawng, akshe ami bi ah mawng cu ami ng’kiaa law ung, O Bawipa, ami taigü cu ng’yak pe gui ä.

⁴⁸ Cun ah khaw ah ngami cu akcang ah m’lung hnip ne, ami ng’yuu ba ung, ngami cu kami pupa ghü ah shin ah mang gaw, nang ah phäh ah kei naw ka cawh ah shin ah Taigüim täng ah mang ne ami taigü ung,

⁴⁹ ngami ah taigü cu ngaih pe gui ä. Khankho na im ah ka naw ng’ya gui ne, chimgein gui ä.

⁵⁰ Ami katnak avan la nang ami ning hnungtuk püi nak cu m’geinsei gui ä, ami ga gui am m’hni nak awn om püi sak gui ä.

⁵¹ Ngami cu namät ah chang ah kyak ci gui, ngami cu mei däi ciah meibuum ah mäih ah kyak ciah Egypt kho ah ka na law püi ba gui ah kyak ci.

⁵² “Uktu Bawipa, Israel gui la ami ghangpughang ah khan ah nang naw angtäi sei m’taam nak awn na teng gui ci, ngami naw a i sang ung phi na m’htei gui vai ah ami ng’khü law ung, ami taigü cu na ng’yak pe gui ci.

⁵³ Chang avan ungka, ngami pupa gui Egypt ah ka na law püi ba gui yah ung na changshäm Moses am na pyen nak ah kyak ci.

Ak Hnu ah Taigünak

⁵⁴ Solomon cu Bawipa ah taigü nak ng’pyi khäta, m’khuuk dong ne a kut shäng ne a ngoh ah sonkiang ah ma ungka ng’düi lawk ci.

⁵⁵ Cun ung om ciah chang avan ah chaw ah ani naw m’lau ne, Khanpughi ah hriham cu k’thäh ci. Ani naw a pyen cu,

⁵⁶ “A shaitak ah mäih ah a chang gui am dimdeeih nak pek ciah Bawipa cu m’tamkhah vä. Ani naw a changshäm Moses ung shaitak abi avan cu pang khek ci.

⁵⁷ Bawipa mi Khanpughi naw ami pupa gui a om püi gui ah mäih ah mikmi phi na om püi gui sä; ani naw kä na hteh ta en gui sä, kä na nawng en gui sä;

⁵⁸ ani ah ng’thu mi ngai khai ah na pyang gui sä, cun ung mikmi mi om vai ah angyak hlü ah mäih ah angtäi sei mi om khai, mi pupa gui am a pek ah thukhän gui la thumkhän gui avan mi k’pang khai.

⁵⁹ Kei naw ani ah ma ah ka bi ah taigü nak la ng’paa nak gui Bawipa mi Khanpughi naw angtäi sei shüm ba sä. Ani naw Israel chang gui la ami ghangpughang ah khan ah a hnüüptä ami ng’yak hlü ah ciah angtäi sei chimgein gui sä.

⁶⁰ Khomdek khan chang pakhui avan naw Bawipa bäng cu Khanpughi nei — a hei kä om ci nei, ciah hmat khai gui.

⁶¹ Nang ah na chang gui naw, Bawipa mi Khanpughi ung bekhüt u ne, tuhngawi nang naw na bi ah mäih ah a thukhän gui la ang thumkhän gui avan cu läk u sä.”

Taigüim Apnak

⁶² Cun kawn ah Ghangpughang Solomon la acu ah chang gui avan naw Bawipa am khawihnah douthak ci gui.

⁶³ Ani naw vantang lu 22, 000 la htome 120, 000 cu khawtsheng douthak nak ah khawihnah ci. Cun kawn ah Ghangpughang la chang avan naw Taigüim cu ap ci gui.

⁶⁴ A cu hnüüp ung chan ah, ang lung lai phi ani naw ap ci, cun cu Taigüim ah ma ung om ci, cun kawn ah apum avan m’khih ne khawihnah nak, htang-douthak nak, khawtsheng-douthak nak ah seime gui ah a thau gui cu ani naw douthak ci, A i ah kyasei cun ah abi ci ung shin ah douthak gui avan ah phäh ah kyei sonkiang cu aläm aih ah phäh ah kyak ci.

⁶⁵ Acun ah Taigüim ung Solomon la Israel chang gui ami van naw ng’yii nak ah pawi cu hnüüp chih ung bik ci gui. A cu ah chang akda läpläp cu a siiptäng ungka, Hamath khok’hteng, a i ah kyasei ci ung Bawipa naw a changshäm David la Israel chang gui am a pek gui ah hriham avan ah hmawk ah kyak ci.

⁶⁶ Ak hnüüp cheit hnüüp ung Solomon naw chang gui ami im ah tüi ba gui ci. Bawipa naw akchang David la akchang gui Israel gui am a pek gui ah hriham avan ah phäh ah ngami naw ani cu m’hlümtai u ne im ah zeikia u ne hteit ba ci gui.