1 GHANGPUGHANG GUI 7 - Cho Bible Common Language 2016

Solomon ah Mangim

¹ Solomon naw amät ah phäh ah mangim tumat phi co ci, cun a cawh cu kum gha lei thum lüng ci.

^2-3 Lebanon Bung ng’ming nak ciah imkyong nu cu a yun täng dawng 100, akdang täng dawng 50, a hlüng dawng 30 lawk ci. Acun ung cedar tung gui thum ah ng’tän ci, ang tän tumat ung gha lei hma ci lawk ci. Cun gui ah khan ah cedar ng’lawng gui dawn ci gui. Ceiling cun phi cedar k’pen awn pyang ne, store khaangui phi pyang ne k’tung awn ami m’düh gui ah kyak ci.

⁴ K’pang vang goi vei ung m’kawt gui thum ciah ng’tän ci.

⁵ M’kawt hta gui la m’kawt nu gui ung phli kit nak ciah shohpang gui om ci. K’pang vang goi vei ung thum ciah ng’tän ciah m’kawt gui cu ng’hnu tuk ci gui.

⁶ Mäktung gui awn düh ah akhaan cu ayun dawng 50, akdang 30 lawk ci. Cun cu akcih phi om ci, mäktung gui awn düh ah kyak ci.

⁷ Mangkiang akhaan, ng’thumcha nak ah khan ah phi ami pyen cu, Solomon naw amawngma a pyen nak ah kyak ci, cun ah phah ungka naw ng’lawng ung khüt khai ah cedar k’peen awn pyan ah kyak ci.

⁸ Solomon amät ah om nak vai cu ng’thumcha nak ah akhan nu ah a hnu täng ah a hei cawhkyan gui ah mäih ah co ci. Ani naw acun ah mäih ah im cu Egypt ghangpughang ah htahnumi akchu nak ah phäh ah phi co ci.

⁹ Shin ah cawhkyan gui avan la dämduh ciah ng’vong cu ang nei ungka naw kheipyaai ung khüt khai ah lung k’ni gui awn pyang ci gui. Lung gui cu lung m’ken nak ah ami pyan pyi, nüt ne ami ah pyi, akyong täng la akpungtäng hlawh awn ami m’hmi ah kyak ci.

¹⁰ Angnei cu lung m’ken nak ah ami pyan ah lung amkawm nu gui awn pyang ci gui, amshah cu dawng cheit sau ci, amshah cu dawng gha sau ci.

¹¹ Acun gui ah khan ah nüt ne ami ah gui ah a hei lung gui la cedar ng’lawng gui om ci.

¹² Mangim yungkyong, Taigüim ah yungkyong la Taigüim ung valuh nak ah akhaan ung ak’paang gui cu, lung ah awn pyan ah that thum ung, that ät ung cedar lawng tumat ciah pyan ah kyak ci.

Huram ah Bi gui

¹³ Ghangpughang Solomon naw kyeishep Huram cu chang tüi ne k’thäh ci, ani cu mang gaw ung om ci, kyeibi nak ung anghtei ah tat ci.

¹⁴ Apa cu kä ghing ci, Tire ung ka ah kyak ci, anghtei ah kyei shep thei ci, anu cu Naphtali pakhui ah kyak ci. Huram cu lunglang ci, bilaw thei ciah kyeishep ah kyak ci. Ani naw Solomon ghangpughang ah a khü cu yum ne kyei bilawh nak avan ung tängpang ci.

Kyei Tung Hnih

¹⁵ Huram naw kyei tungnu hnih cu lawi ci, tumat cu dawng gha lei cheit ng’sau ne, apum cu dawng gha lei goi ci lawk ci, cun cu Taigüim vahluh nak ung tha ci gui.

¹⁶ Ani naw uknak vai kyeikoi hnih ah lawi ci, tumat cu dawng hma la khap ciah ng’sau ci, cun cu k’tung mawng yuk uknak ah kyak ci.

¹⁷ Tung a mawng päng cu kyei gui gui la kyei htale theih

¹⁸ M’ghuh shawi goi ci awn cüiche ah kyak ci.

¹⁹ Tung mawng uknak gui cu lili cheipai ah mäih ah ami pyan, dawng phli ah sau ci,

²⁰ cun cu kyei gui ah khan ung ng’veing khai ah ami tha ah kyak ci. Tung mawng patnak ah kyei htale shawi goi ung htale theih phia goi lawk ci.

²¹ Huram naw cun ah kyeitung hnih cu Taigüim ah valuh nak ah ama ung tha ci: a htumtäng ah ka tumat cu Jachin ah aming sui ne, a siiptäng ah ka cu Boaz aming sui ci.

²² Tung gui ah a mawng gui cu lik-chei kyeikoi gui awn yuk uk ci gui. Cun ah kya sei tung gui bilawh nak cu kümbe ci. Cun ah kya sei tung gui bilawh cu kümbe ci.

Kyei Tuikan

²³ Huram naw kyei awn tuikan pyang ci. Cun cu dawng hma ah thuuk ci, akdang dawng gha lawk ci, ang shawng dawng thum kip lawk ci.

²⁴ Tuikan ah ang veing akit avan ung kyei um shawi goi cu tuikan awn ng’cak khai ah lawi ne pyang ci gui.

²⁵ Tuikan cu kyei vantang gha lei goi ah k’paang ung ngok ci, cun gui cu akpung täng ah mang ci gui, vangtäng ah thum ci mang ci gui.

²⁶ Tuikan cu 75 millimetre ah shah ne a mawng cu khap ah mäih ah kya ne lik cheipai ah mäih lawk ci. Cun ah tuikan cu kalan phia gha gha (täm) lut ci.

Kyei ng’Hle gui

²⁷ Huram naw kyei ng’hle gha ah pyang ci; Tumat cu ang sau dawng phli, ang shawng dawng phli, a hlüng dawng goi la khap lawk ci.

²⁸ Cun gui cu phli ki nak ciah akawt gui pyang ne, kong ne ami pyan gui ah kyak ci,

²⁹ akawt gui ung phongkawng, vantang la cherubim ah gup gui pyang ci gui; akong ah akhan la aka ung phongkong gui la vantang gui ah a gup gui geei ne a gup gui dang khai ah ami pyan ah kyak ci.

³⁰ Ng’hle päng ung kyei aping phli ci law ne, ang phiui nak ah pingtung om bäng bäng ci. Akit phli ung kawbei hmoh nak vai ah dühnak kyei tung gui om ci; tung gui ung a gup gui dang khai ah ami cüiche ah kyak ci.

³¹ Khawbei hmoh nak vai ah tung gui ah mawng ung kulum khai ah kong ne pyang ci gui. Cun cu ng’hle ah a mawng ungka naw dawng hang kiawi ci, akyong ah khap valut ci. Acun veing ne a gup gui gei ne pyang ci gui.

³² Ping gui ci dawng la khap ah hlüng ci, cun gui cu akawt gui ah ka ah om ci gui, ping tung gui cu ng’hle awn ng’däih khai ah pyang ci gui.

³³ Ping gui cu yatha ah ping ah mäih ah kyak ci; pingtung gui, pingkhoi gui, pingdühnak gui, pingsüh nak gui avan cu kyei ah kyak ci.

³⁴ Hle im ah aka päng ung dühnak tung phli om ci, cun gui cu ng’hle awn ng’däih khai ah pyan ah kyak ci.

³⁵ Hle päng ah a mawng cu khap ah ng’pat ci; cun ah düh nak gui la akawt gui cu Hle awn ng’däih khai ah pyang ci gui.

³⁶ Dühnak tung gui la akawt gui cu Cherubim, phawngkawng gui la m’chum ghing gui ah gup gui awn a awngnak päng ung cüiche u ne a veing avan ung a gup gui ng’dang khai ah gei ci gui.

³⁷ Shin cu hle gui ami pyan ah mawng ah kyak ci; cun gui cu ami van täng yawp ci gui, ami yundang ami müi phi täng ci gui.

³⁸ Huram naw kawbei gha ah pyang ci, hle tumat ah phäh ah tumat ciah kyak ci. Kawbei tumat cu dawng phlei ah ng’kau ne, kalan phia goi yuk ci.

³⁹ Ani naw Taigüim ah a htumtäng ah hle hma, a siiptäng ah hle hma, ciah tha ne, tuikan cu a htum-kiang täng ah tha ci.

Taigüim ung Khawheham gui ah Aming gui

^40-45 Huram naw hlüng gui, khap gui la khawk gui phi pyang ci. Ani naw Ghangpughang Solomon ah bi sak avan m’khüüp ne, Bawipa ah Taigüim ah phäh ah bik ci. Shin cu ani ah pyan gui ah kyak ci: Tungnu hnih khawk ah mäih tung mawng uknak hnih Tung mawng ung m’awi ah phia ci lawk ciah shawi goi ciah phäh ah htale theih phia phli Hle gha kawbei gha Tuikan hmoh nak vai ah vantang gup gha lei goi. Taigüim ah phäh ah khawkcham gui avan, Huran naw Ghangpughang Solomon ah phäh ah a pyan pek gui cu kyei m’tui pyi gui awn pyan ah kyak ci.

⁴⁶ Ghangpughang naw shin gui avan cu Jordan khongnawi Sukkoth la Zarethan ah anglak m’si shep nak ung a pyan ah kyak ci.

⁴⁷ Shin ah kyei gui cu da aih khätah Solomon naw khin ne kä bäi ci, cun ah kyasei cun gui pit i chü law ciah kä hmat hlawt nei.

⁴⁸ Solomon naw Taigüim ah hmawk ah ghui khawhcham gui phi pyang ci; sonkiang, Khanpughi am douthak ah m’htut tha nak ah tawnglawng,

⁴⁹ Atheingcim Pikbäih Hmun ah ma ung ami m’düih ah mei-im ng’düi gha, a htumtäng ah hma, a siiptäng ah hma; cheipai gui, mei-im gui, la mei k’ceh gui;

⁵⁰ khop gui, mei k’ceh gui, khawk gui, ang ui tha nak ah bei gui, meicak tha nak ah k’am gui; Atheingcim Pikbäih Hmun ung m’kawt gui la Taigüim ah akpung ah m’kawt gui ah phäh ah patta gui ah kyak ci. Shin ah khawhcham gui avan cu ghui awn pyan ah kyak ci.

⁵¹ Ghangpughang Solomon naw Taigüim ung bilawh gui avan pyi neta, apa David naw Bawipa am a ap gui avan ngui ni, ghui ni, a hei khawh gui avan cu Taigüim khawh tha nak ah akhaan ung tha ci.