1 GHANGPUGHANG GUI 6 - Cho Bible Common Language 2016

Solomon naw Taigüim Co ci

¹ Israel chang gui naw Egypt khaw ami hteh tak nak khokum phiaphli la cheit-kip nak, Solomon naw Israel a uknak akum phli nak ah, a cha goi nak, Ziv cha ung Solomon naw Taigüim cawh vai cu tün ci.

² Cun ah Taigüim cu akyong täng ah ayun dawng kawkip, akdang dawng m’ku, a hlüng dawng thumkip lawk ci.

³ A hmai lam ah valuh nak ah kyong cu a thuuk täng dawng gha, akdang dawng m’ku lawk ci, Taigüim ah mäih ah ng’shawng ci.

⁴ Taigüim ah k’pang gui ung m’kawt gui om ci, cun gui cu akyong täng ah ta akpung täng cu ng’khiip tuba ci.

⁵ Akpung täng k’pang hnungtuk püi ne, Taigüim ah ang leng la a hnu täng ung, that thum ci lawk ciah im hta gui ak m’dün ne co ci gui, that ät ung dawng phli la khap ciah hlüng ci.

⁶ Akhan päng, aka pikbäih athat cu dawng phli la khap ah ng’shawng ci, ang lung ung athat ci dawng chuk, akhan bäih cu dawng chuk la khap ah ng’shawng ci. Taigüim ah athat päng ung akpang cu aka ah ta akhan ung ana ng’pam lawk khai ah pyan ah kya ne, akhan gui cu k’pang ung khoh ne, ng’lawng kä dawn ling ah cawh ah kyak ci.

⁷ Taigüim cawh nak ah lung gui cu lungkhui aha ami pyan pyi ah kya ne Taigüim cawh nak ung ng’ki ni, ghei ni, a hei m’si awn bi ah ak aw cu a i kä om ci.

⁸ Aka pikbäih akhan hta ung valuh nak cu Taigüim ah a htumtäng ung om ci, ak hnih nak la akthum nak ah athat gui ung kai nak vai cu hlaak m’dawn ah kyak ci.

⁹ Cun ah kyasei ghangpughang Solomon naw Taigüim cu pyi ne co ci. Ani naw ceiling cu lawng gui dawn ne cedar k’pen gui awn pyang ci.

¹⁰ That thum lawk ciah akhan hta gui, tumat cu dawng phli la khap ciah hlüng ci, Taigüim ah akpung täng k’pang hei hnu na ne cedar ng’lawng gui awn hei m’dün ne cawh ah kyak ci.

¹¹ Bawipa naw Solomon cu pyen nak ci,

¹² nang naw ka thukhän gui la ka ng’thumkhän gui avan na läk ah a kyak ung, napa David am shaitak ka pek cu nang ah phäh ah ka bik khai.

¹³ Nang naw na cawh ah shin ah Taigüim ung ka chang gui Israel ah ng’lung ah kei cu ka om khai, kei naw kä ka nawng gui phung khai.”

¹⁴ Cun ah kyasei Solomon naw Taigüim cu m’üp ne co ci.

Taigüim ah Akyong Pyantham nak

¹⁵ Akyong täng k’pang gui cu phah ungka naw ceiling ung khüt khai ah cedar k’pen awn k’pang ne, m’htai k’pen gui phah ah kyak ci.

¹⁶ Akyong akhan, Atheingcim Pikbäih Hmun cu Taigüim ah a hnu täng ung co ci gui. Cun cu dawng m’ku ng’shäi ci, phah ungka naw ceiling ung khüt khai ah cedar k’pen awn akhan pyan ah kyak ci.

¹⁷ Atheingcim Pikbäih Hmun ah ama lam ah akhan cu dawng phlikip lawk ci.

¹⁸ Cedar k’pen gui cu am theih apai gui awn cüiche ci gui; akyong täng avan cu cedar k’pen awn k’pang ci gui, cun ah kyasei lung awn k’pang cu kä ng’dang ci.

¹⁹ Taigüim a hnu täng ah akyong ah akhan pyang ci gui, cun cu Bawipa ah Thukhän M’küm tha nak vai ah kyak ci.

²⁰ Cun ah akyong täng akhan cu ang ng’shäi dawng m’ku, ang shawng dawng m’ku, a hlüng dawng m’ku lawk ci, ghui bäng awn avan ami vook ah kyak ci. Sonkiang cu cedar k’pen awn pyang ci gui.

²¹ Taigüim ah akyong täng avan cu ghui awn vook u ne, akyong akhan ah valuh nak ung ghui-gui gui k’shäng ci gui, cun ah akhan cun phi ghui awn vook ci gui.

²² Taigüim ah akyong täng avan la Atheingcim Pikbäih Hmun ung sonkiang cun phi ghui awn vook ci gui.

²³ Olive sing awn pyan ah Cherubim hnih cu Atheingcim Pikbäih Hmun ung tha ci gui, tumat cu dawng gha ciah ng’sau ci.

^24-26 Cun goi cu ani pum la ani müi täng ci. Tumat ung ang phia hnih ci om ci, ang phia vang cu dawng hma ci lawk ci, cun ah hnih ci om ci, ang phia vang mawng ungka naw vang mawng ah khüt ciah dawng gha lawk ci.

²⁷ Cun goi cu Atheingcim Pikbäih Hmun ung tän ne hmoh ci gui, cun ah kya ne akhan ah ang lung ung ani ng’phia mawng goi cu ng’tawn tuk ci, vangtäng ng’phia mawng goi naw k’pang gui tawn ci.

²⁸ Cherubim goi cu ghui awn vook ci gui.

²⁹ Akhan nu la akyong akhan ah k’pang gui avan cu cherubim gui ah a gup gui la m’chum ghing gui la cheipai gui awn cüiche ci gui.

³⁰ A phah cun phi ghui awn vook ci gui.

³¹ Atheingcim Pikbäih Hmun valuh nak ung Olive sing awn pyan ah shohpang hnih cu k’phoh ne pyan ci gui; m’kawt ah akhan a mawng cu yuk khum ah kyak ci.

³² M’kawt gui cu Cherubim gui la m’chum ghing gui, cheipai gui awn cüiche ci gui. M’kawt gui, Cherubim gui, m’chum ghing gui cu ghui awn ami vook ah kyak ci.

³³ Akhan nu ah luh nak ah m’kawt ung k’phli ki nak ciah shohpang cu olive sing awn pyang ci gui.

³⁴ Hnih ah m’khep ah shohpang hnih cu m’htai pen awn pyang ne,

³⁵ Cherubim gui m’chum ghing gui la cheipai gui awn cüiche ne, ghui awn phi ami vook ah kyak ci.

³⁶ Taigüim ah a hmai täng ah yungkhan ah co ci gui, acun ung k’pang gui om ci, lung athat thum ung pen cedar lawng tumat ciah pyan ci gui.

³⁷ Taigüim ah angnei cu akcha goi nak, Ziv cha, Solomon uknak akum phli nak ung phah ci gui.

³⁸ Acha cheit nak Bul cha, Solomon ah uknak akum gha lei ät nak ung Taigüim cu akni ah pyi ci gui, cun cu pawng püi ah mäih ah pyi ne bi ah kyak ci. Cun ah Solomon naw a cawh cu kum chih lüng ci.