1 GHANGPUGHANG GUI 5 - Cho Bible Common Language 2016

Solomon naw Taigüim Co khai ah Pawng ci

¹ Tire ghangpughang Hiram cu ang’täi sei David ah teihpüi ah kyak ci. Ani naw Solomon cu apa David ah hnün ung ghangpughang ah kya ne a ngoh ba cu ng’ya neta, ng’khawt nak ng’shä tüi lawk ci.

² Solomon naw phi Hiram am ng’shä tüi tuba ci:

³ “Na hmat pyi ah mäih ah ng’tuk nak ang’täi ah om sei, ani avan ung koi ciah ga gui ah khawpäng gui cu tu gui ciah kya ne, a ga gui avan ah khan ah näng nak Bawipa naw a pek güt ung, ani naw Bawipa ak Khanpughi khawihnah nak vai ah Taigüim cu kä co hlawt ci.

⁴ Cun ung phi tuhbäi Bawipa ka Khanpughi naw ka khawgi chang gui avan awn dimdeeih nak cu na pek ci. Kei ung ga kä om ba ci, na tu lawk khai phi kä om ci.

⁵ Bawipa naw, kapa David am shaitak nak pek ci, nang ah kawn ah kei naw ghangpughang ah ka hmoh vai ah na hta naw, kei ah phäh ah Taigüim cu co khai.’ Bawipa ka Khanpughi khawihnah nak vai ah Taigüim cawh vai ah kei naw ka k’bäi pyi ci.

⁶ Cun ah kyasei kei ah hmawk ah cedar sing gui chuk khai ah na chang gui cu lebanon ah tüi gui ä. Ka chang gui cu ngami awn a täng ah ng’bik khai gui, nang naw na k’bäi ah mäih ah, a i hawkcha ah sing chuk vai cicu kei ah ka chang gui naw nang ah chang gui hlawk ah kä hmat ci gui.”

⁷ Hiram naw Solomon ah thumkhäh ng’ya ne, yei aih neta apyen cu, “Cun ah dämduh ciah khaw ung, cüivai ciah htapa ah kya ne a hnün ung ngo ba khai ah David am pek ciah Bawipa cu tuhngawi m’tamkhah nei!”

⁸ Cun kawn ah Hiram naw Solomon am shikcha ah ng’thumkhä lawk ci, “Kei naw na ng’thumkhäh cu ka gah ci, nang naw nak thäh cun phi be ge vai ah ka yum ci. Kei naw cedar sing la m’htai ghing gui cu ka ning pek khai.

⁹ Kei ah ka chang gui naw singtung gui cu Lebanon ah ka naw tuinu ung, khit ne m’kaih ne pyang neta na ghü nak ah tuikem hmun ung law püi khai gui. A cu ah kei ah chang gui naw k’phian ba khai gui, nang ah chang gui naw lak khai gui. Nang naw kei ah chang gui am na tui ei nak gui vai ka m’hni ci nei.”

¹⁰ Cun ah kyasei Hiram naw Solomon naw ang yak hlü ah cedar sing gui la m’htai tung gui cu pe tak ci.

¹¹ Solomon naw Hiram am akum tä sei htang tang phia m’ku la olive situi liter, 400,000 cu akchang gui ah ei vai ah pek ci.

¹² Bawipa naw a shaitak cu k’pang ne Solomon am cüivai nak cu pek ci. Hiram la Solomon ah ng’lak ung dimdeeih nak om sei, ngani cu tumat la tumat sumlei ci goi.

¹³ Ghangpughang Solomon naw chang 30,000 cu bi abi sak gui vai ah ghüh gui ci,

¹⁴ Cun gui khawngmang gui khai ah Adoniram cu tha ci. Ani naw bum ät ung 10, 000 ciah bum thum ah k’pai gui neta, ang bum päng cu Lebanon ah cha ät om sak ne, ami im ah law ba ne cha goi ci om sak gui ci.

¹⁵ Solomon naw phi khaw gui ah lung m’thoot khai ah chang 80, 000 lah cun gui m’kawn khai ah chang 70, 000 cu tha gui ci,

¹⁶ chang 3, 300 cu ami bi nak ung täng pang khai gui ah tha gui ci.

¹⁷ Ghangpughang ah ng’thumkhän ah Taigüim ung phah vai ah lung phahlap akni gui cu ngami naw m’thoot ci gui.

¹⁸ Solomon la Hiram ah bik’bi chang gui la Biblos mang gaw ungka chang gui naw lung gui la sing gui cu Taigüim cawh nak vai ah pyang ci gui.