1 GHANGPUGHANG GUI 4 - Cho Bible Common Language 2016

Solomon ah Bawi gui

¹ Solomon cu Israel avan ah ghangpughang ah kyak ci,

² Shin gui cu ani ah bawi ng’vai gui ah kyak ci: Taigü: Zadok ah hta Azariah

³ Mang Im ung atonvawn gui: Elihoreph la Ahijah, Shisha ah hta goi Caguk ci gui: Ahilud ah hta Jehoshaphat

⁴ Gakap bawi: Jehoiada ah hta Benaiah Taigü gui: Zadok la Abiatha

⁵ Khawpäng uktu gui: Nathan ah hta Azariah Mang Im uktu: Nathan ah hta taigü Zabud

⁶ Mang Im chang gui uktu: Ahishar Bi k’bi gui uktu: Abda ah hta Adoniram

⁷ Solomon naw Israel ung khawpäng uktu gha lei goi m’düih ci. Ngami naw ami khawpäng uknak ungka ei awk vai cu ghangpughang ah mang im ung om ci gui am thak law ci gui, chang tumat naw kum ät ung cha ät ci ma nak ci gui.

⁸ Uktu gha lei goi ah ami ng’ming gui la ami uk ah khawpäng gui cu: Benhur: Ephraim ah khawngyung khaw

⁹ Bendeker: mang gaw gui Makaz, Shaalbim, Beth Seshemesh, Elon, la Beth Hana

¹⁰ Benhesed: Mang gaw gui Arubboth, Sokoh la Hepher khawpäng avan

¹¹ Benabinadab, Solomon ah hta hnumi Taphath chu nak ci: Dor khaw khawpäng avan

¹² Ahilud ah hta Baana: Mang gaw gui: Taanach, Mekiddo, la Beth Shan ah pei ah khawpäng avan, Zarethan gawnu pei, Jezreela gawnu ah a htumtäng Abel Meholah la Jokneam mang gaw ung khüt ci.

¹³ Benkeber: Kilead ung Romoth mang gaw, Menasseh ah hta ng’shon, Jair pahta gui ah päng Kilead ung pigaw gui la Bashan ung Arkob khawpäng, avan gawnu m’kawm chuk kip, cun gui gaw k’pang sa u ne, m’kawt cu kyeei tawn gui awn khai ah kyak ci.

¹⁴ Iddo ah hta Ahinadab: Mahanaim khawpäng

¹⁵ Ahimaaz, Solomon ah hta hnumi tumat Besemath chu nak ci: Naphtali khawpäng

¹⁶ Hushai ah hta Baana: Asher khawpäng la Bealoth gawnu

¹⁷ Paruah ah hta Jehoshaphat: Issakha khawpäng

¹⁸ Ela ah hta Shimei: Benjamin khawpäng

¹⁹ Uri ah hta Keber: Kilead khawpäng, cun cu Amorit ghangpughang Sihon la Bashan ghangpughang Og ah uk man ah kyak ci. Cun ah uktu gha lei goi ah kawn ah khaw avan uk ciah uktu tumat phi om ci.

Solomon ah Bämang ciah Uknak

²⁰ Judah la Israel chang gui cu tuinu kem ah laigin chü ah da lawk ci gui: ngami cu ei ne aw ne yeikyai ci gui.

²¹ Solomon ah uknak khaw ung Euphratis tuinu ungka naw Philistia la Egypt khawgi ung khüt ciah pakhui khaw avan ah kyak ci. Ngami naw ani am khaw phlam pe u ne, ani a ghin ah chuih a uknak ka ah om ci gui.

²² Khaw hnüüp ät ah phäh ah Solomon ung hlü ciah ei awk cu, m’htut den a khui liter phia la k’htang liter phia phia;

²³ üng ne vuh ah seipat gha; chah ne vuh ah seipat m’ku, htome phia, sachuk, kigang, sangya la im ung vuh chah gui ah kyak ci.

²⁴ Solomon naw Tuinu Euphratis akhei täng khaw avan, Tiphsah Euphratis ah khan ungka naw akhei täng Kaza mang gaw ung khüt sei uk ci. Euphratis akhei täng ung ghangpughang gui ami van cu ani ah ka ung lawk ci gui, ani cu a pei leng ung khawpäng gui ami van awn dimdeeih nak bik ci gui.

²⁵ Ani a ghin ah chuih Judah la Israel gui cu phyawn m’htein ne om ci gui, ami kyong khui päng cu amät ah sapyit lo, thei ghing gui phäh phäh awn om ci gui.

²⁶ Solomon ung ng’se yatha kaih ciah ng’se im phia phia phlikip, ng’tuk nak ah ng’se tha nak ng’se im phia phia gha lei goi om ci.

²⁷ A uktu chang gha lei goi naw, tumat naw cha ät ci ung, Ghangpughang Solomon amät ung hlü ci gui la, mang im ung om ne ei ciah chang avan ah phäh ah thak law ci gui; ngami naw hlü ci phung cu angtäi sei thak lawk ci gui.

²⁸ Uktu päng naw ami chaw ah kyak ciah htanghum la htang gong gui cu yatha kaih ciah ng’se gui la la gui ah om nak a hlü nak phung ung law püi ci gui.

²⁹ Khanpughi naw Solomon am thuuk aih ciah cüivai nak la lulang nak, kä nütdawng hlawt vai ah dämduh ciah hmuhmat nak cu pek ci.

³⁰ Akyangtäng ung cüivai chang gui la Egypt khaw ung cüivai chang gui avan nata Slolomon cu cüivai pi ci.

³¹ Ani cu chang avan ung cüivai pi k’bäih ci: Ezrathit chang Ethan, la Heman, Kalkol la Darda, Mahol ah hta gui la ani a pei yung khawpäng avan ung aming thang ci.

³² Ani ah pyan thu k’thuuk phia thum kip la ng’äi phi gha lawk ci.

³³ Ani naw sing ghing khu m’sai gui ah a mawng pyen ni, Lebanon cedar sing ungka naw k’pang ung phung ciah k’pan ung khüt sei pyen ci; khisa gui, kha gui, k’phyu m’khaw gui, nga gui ah mawng phi pyen ci.

³⁴ M’dek ah khan ung om ciah ghangpughang avan naw ani ah cüivai nak cu ng’ya u neta, chang gui tüi law ne ani ah ng’thu ngai lawk ci gui.