1 GHANGPUGHANG GUI 3 - Cho Bible Common Language 2016

Cüivai nak a Gah vai ah Solomon Taigü ci

¹ Solomon naw Egypt ghangpughang ah hta hnumi chu na ne, ng’khawtsheng nak bik ci. Ani naw achu cu David mang gaw ah law püi ne, amang im, Taigüim la Jerusalem gaw k’pang kä ah cawh pha yawp ah chuih acun ung om sak ci.

² Bawipa ah phäh ah Taigüim kä cawh pha ah kyasei, chang gui naw sonkiang akda ung khawihnah ne dothak ci gui.

³ Solomon naw Bawipa m’hni ne, apa David ng’thumcäi gui cu läk ci, cun ung phi ani naw phi seime gui ngawn ne, sonkiang akda khawihnah ne douthak ci.

⁴ Hnüät ung ani cu khawihnah douthak khai ah Kibeon ah hteit ci, acu ah cun cu mingthang ciah sonkiang ah kyak ci. A yanä ani naw a cu ah m’khih-ne douthak nak akda bi man ci.

⁵ A cu mü ang mang ung Bawipa cu ng’dang law neta ani cu ng’shik ci, “Kei naw a i ka ning pek vai ang na ng’yak hlü?”

⁶ Solomon naw, “Nang naw angtäi sei, na changshäm kapa David ung dämduh ciah m’hni nak cu na m’dang ci. Ani cu nang ung ang mätyah nak awn ni ne, bekhüt ne, düng ciah kyak ci. Nang naw k’täi ne, amät ah hnün ung tuhngawi uk ba khai ah htapa pe ne, dämduh ci la ng’täi ciah na m’hni nak cu na m’dang ci.

⁷ O Bawipa, Khanpughi, kei cu hmaw aih ne, a i cha ah uk vai kä ka hmat ung phi, kapa ah hnün ung ghangpughang ah na na kyak ba sak ci.

⁸ Shin ung na chang ah na ghü gui ah chang gui ah ng’lung ah kei ka om ci nei, cun ah chang gui cu da aih u sei kä khei gui hlawt vai kyak ci.

⁹ Cun ah kyasei cüivai nak cu na peä, kei naw na chang gui taga khai ah ka uk vai hlü ci nei, akni la akshe ah ng’lakmah nak ka hmat vai hlü ci nei. Kä cunung, shin ah dämduh ciah na chang gui cu a i hawk cha ah kei naw ka uk thei khai aw?”

¹⁰ Solomon naw shikcha ah akthäh ah phäh ah Bawipa cu yeikyai ci,

¹¹ cun ah kyasei ani naw a pyen nak cu, “Akshou ghinnak, bühmang nak, na ga gui ah sih nak vai kä k’thäh ne, nang naw taga sei uknak ah cüivai nak, na k’thäh ci,

¹² nang naw na k’thäh cu kei naw ka bik khai. Ayanä ka man phung la ngawi ah ka vai phung ah ta bä pi ciah cüivai nak la hmuhmat nak cu nang am ka ning pek khai.

¹³ Nang naw kä na k’thäh cun phi kei naw ka ning pek khai: a hei ghangpughang gui ah ta bä pi ciah bämang nak la m’tamkhah nak cu na ghin nak chuih nang ung om khai.

¹⁴ Kei na ng’ngai ne ka thukhän gui la ka thumkhän gui cu na pa David ah mäih ah na k’pan ah a kyak ung kei naw ghin nak ang sau ka ning pek khai.”

¹⁵ Solomon cu ng’shüm law neta Khanpughi naw ang mang ung ng’htau püi ciah hmat ci. Cun kawn ah ani cu Jerusalem ah hteit ne, Bawipa ah Thukhän M’küm ah ma ah ng’düi neta, m’khih ne douthak nak la khawtsheng douthak nak cu Bawipa am douthak ci. Cun kawn ah ani naw a yungbawi gui avan cu tumbei gui ci.

Khak ciah Amawng cu Solomon naw M’khoi M’chak ci

¹⁶ Hnüüp ät ung pawmya ciah hnumi hnih cu law nine Solomon ghangpughang ah ma ng’thu pyen lawk ci goi.

¹⁷ Tumat naw pyen ne, “Bawi awi, shin ah hnumi la kei cu im tumat ung kani om ci, ani acun ung a om sang ung kei cu pami hta ah ka hta ci.

¹⁸ Kei naw ak hmaw ka hta nak hnüüp goi lüng sei, ani phi pami hta ah hta lawk ci. Keini hnih bäng cun ah im ung kani om ci — a hei a u phi kä om tuk ci.

¹⁹ Mü ät ung ani naw kä ngaih-tüh ah a hta ah khan ah ng’taih neta geih käläk ci.

²⁰ Ani cu mü ah tho law neta, kei ka ih yah ung ka pei ah ka, ka hta cu la ne a ih nak ung hteh püi ne, sik ciah ak hmaw cu kei ah ih nak ung tha ci.

²¹ A ngawi ung khawngawi kei ng’shüm law ne, ka tuihta ka tu law vai ung, ak hmaw cu aksi ah kyasei ka hmuk ci. Kei naw m’htei ne teng neta ka hta ah kä kyak ciah ka hmu lawk ci.”

²² Cun ung phi a hei hnumi naw pyen ne, “Ka nei! Sik cicu nang ah hta, ghing cicu kei ah hta nei!” cik ci. Cun ah kya ne ngani naw ghangpughang ah ma ah ng’cuh lawk ci goi.

²³ Solomon ghangpughang naw pyen ci, “Nangni nani nik hnih ghing cicu tumat ah hta, sik cicu tumat ah hta ah nani pyen ci,” ci neta,

²⁴ Ani naw khimsem k’thäh sei law püi u khäta,

²⁵ ani naw, “A hmaw cu hnih ah kyak khai ah tupit neta hnumi am avang ci pe vä,” cik ci.

²⁶ Anu akcang, a hta akbe ah m’hni ciah hnumi naw, ghangpughang ah ma ah pyen ci,” na bä ni, ka bawi, ak hmaw cu kä ngawn ä! Cän ah hnumi am pen ä! cik ci. Cun ung phi a hei hnumi naw, “A u am phi kä na pen en goi vä, hnih ah m’chün vä” cik ci.

²⁷ Solomon naw pyen ci, “Ak hmaw cu kä ngawn vä! Ak htük ah hnumi am pe vä — ani cu anu akcang ah kyak ci nei” cik ci.

²⁸ Israel chang gui naw Solomon ah ng’thumcha cu ng’ya u neta, ani cu anghtei ah chang m’sui ci gui, a i ah kyasei ci ung, Khanpughi naw ani am taga khai ah ng’thumcha nak ah cüivai nak a pek cu ami hmat ah phäh ah kyak ci.