1 GHANGPUGHANG GUI 22 - Cho Bible Common Language 2016

Prophet Mikaiah Naw Ahab M’Cäi Ci

¹ Israel la Siria ah ng’lak ung a hengkum kum goi güt ung dimdeeih nak om ci.

² Cun ung phi akum thum kum ung Judah ghangpughang Jehoshaphat naw Israel ghangpughang Ahab cu hteit ne hmuk ci.

³ Ahab naw a bawi gui ng’shi gui ci, “A i ah kyasei Kilead khaw Ramoth gawnu cu Siria ghangpughang ah kut ungka kä mi gah ba ang? Cän cu mikmi ah ka nei!”

⁴ Cun kawn ah Ahab naw Jehoshaphat cu k’thäh ne, “Ramoth tuk vai ah kei awn a täng ah na hteit tuk khai aw?” cik ci. Jeshoshaphat naw, “Nang na hteh vai ah khoi ung kei ka hteit ge khai nei, ka gakap gui la ng’se cum gakap gui phi om ge ci gui nei.

⁵ Cun ung phi ak htük ah Bawipa mi shithäk cang khai nei” cik ci.

⁶ Ahab naw prophet phia phli cu khü gui ne, ng’shi gui ci, “Kei naw Ramoth cu hteit ne ka tuk vai aw, kä ka tuk vai aw?” Ngami naw, “Na tuk vai nei, Bawipa naw näng nak ning pek khai nei.”

⁷ Cun ung phi Jehoshaphat naw, “Bawipa mi ng’shi thäh nak vai ah a hei prophet om ba ne ang?” cine ng’shik ci.

⁸ Ahab naw, “Tumat om ba ci nei, Imlah ah hta Mikaiah. Cun ung phi ani cu ka thüi nak ci, kei ah phäh ah a i phi akni ah kä ng’cäbang man ci; akshe ah va ang’täi sei pyen ci” cik ci. Jehoshaphat naw, “Cun ah kä na pyen vai” ciah pyen nak ci.

⁹ Ahab naw yungbawi tumat khü neta Mikaiah cu ang ghit ah a law püi vai ah pyen nak ci.

¹⁰ Ghangpughang hnih cu ani mangsui sui ni ne, Samaria gawnu m’kawt ah akpung täng htang m’häi khlawng ani mangkiang ung ngok ci goi, prophet gui ami van cu ngani ah ma ung om ne ng’cängbang ci gui.

¹¹ Ngami ungka tumat, Chenaanah ah hta Zedekiah naw m’si puuk pyang neta Ahab cu pyen nak ci, “Shin cu Bawipa pyen nei; “Shin awn nang naw Sirian gui na tuk ah a kyak ung na hnim gui yawp khai nei.”

¹² Ahei prophet gui ami van naw acun ah mäih pyen ci gui. Ngami naw, “Ramoth cu na tuk vai nei, na näng khai nei. Bawipa naw näng nak ning pek khai nei” cik ci gui.

¹³ Cun sang ung Mikaiah va khü ciah bawi naw ani am, “A hei prophet gui ami van naw ghangpughang ah näng nak vai ah ng’cängbang ci gui, nang naw phi acun ah mäih na bi ung bä pi khai” ciah pyen nak ci.

¹⁴ Cun ung phi Mikaiah naw, “Ghing ciah Bawipa ung kei naw shai ka tak cu, ani naw ana pyen sak cun vah kei naw ka pyen khai nei!” cik ci.

¹⁵ Ani cu ghangpughang Ahab ah ma ah ng’dang law khäta, ghangpughang naw ng’shik ci, “Mikaiah aw, Ghangpughang Jehoshaphat la kei naw Ramoth cu kani tuk vai ang? Kä kani tuk vai ang? Makaiah naw, “Tu ni ä! Nani näng khai nei. Bawipa naw näng nak ning pe goi khai nei” cik ci.

¹⁶ Cun ung phi Ahab naw, “Bawipa ah ming ung kei ung ng’thu na pyen ung, akcang na pyen vai! Acun ah na bi vai ah kei naw a i güt ka ning pyen nak vai ang?

¹⁷ Mikaiah naw, “Israel gakap gui cu khomhtung yung ah htoshäm kä om ciah htome gui ah mäih ah püi u sei kei naw ka hmuk ci nei. Cun ung Bawipa naw, “Shin ah chang gui cu ami ng’vai kä om ci nei, akding gei ah ami im ah hteh ba sak gui vä” cik ci.

¹⁸ Ahab naw Jehoshaphat pyen nak ci, “Kei naw ka ning m’thein pyi ci, ani naw kei ah phäh ah a i ah ung phi akni ah kä ng’cängbang man ci. Akshe laih laih ah va pyen ci.”

¹⁹ Makaiah naw hteit neta, “Tuhbäi Bawipa naw a i a pyen cu ngai ä! Bawipa cu khankho amang kiang ung ngo sei, a khanchang gui ami van a pei ah ng’düi u sei ka hmuk ci.

²⁰ Bawipa naw ng’shik ci, “Ahab cu Ramoth ung hteit khäta ami ngawn vai ah a u naw m’hleei khai ang? Khanchang amshah gui naw a hei ah pyen ci gui, a hei amshah gui naw a hei ah pyen ci gui,

²¹ cun kawn ah mümcha cu Bawipa ah pei ah m’khan ne ng’et law neta, “Kei naw ka m’hleei khai nei” cik ci.

²² Bawipa naw, “A i hawcha ah ang?” ci sei; Mümcha naw m’shang ne, “Kei naw hteit ne, Ahab ah prophet gui avan cu hleei ne ka m’thein gui khai nei” cik ci. Bawipa naw “Hteit ne ani m’hleei ä, na näng khai nei” cik ci.

²³ Makaiah naw a hnu ah, “A kyak ah mawng cu shikcha nei. Shin ah na prophet gui naw ami ning m’hleei vai ah Bawipa naw abi nei. Cun ung phi nang naw na awt vai ah leigai cu amät naw abi nei.

²⁴ Cun kawn ah prophet Zedekiah naw Mikaiah ah hteit ne a hmai ung k’beeih neta, “A i yah ung nei Bawipa ah Mümcha naw kei na hteh ta neta nang a ning thu püi?” cik ci.

²⁵ Mikaiah naw, “Nang cu a hnu täng a khan kyong ah na ng’thup khai ah na hteh law ung na hmuk khai nei” cik ci.

²⁶ Cun kawn ah Ghangpughang Ahab naw a bawi tumat cu k’bäi ne, “Mikaiah cu pha ne, mang gaw uktu Amon la Joash manghta ah hteh püi ä.

²⁷ Ani cu pang ne chum ne, kei phyawng gai ne ka gawk law ba güt ung m’htut m’bei ne tui nami tu vai nei” cik ci.

²⁸ Mikaiah naw pyen ne, “Nang phyawng ne na law ba ah a kyak ung, kei ung Bawipa naw ng’thu kä pyen ciah kyak khai!” Ani naw m’khah ba ne, “Chang päng naw kei ah ng’thu cu ngai vä!” cik ci.

Ahab ah Sih ah Mawng

²⁹ Cun kawn ah Israel ghangpughang Ahab la Judah ghangpughang Jehoshaphat naw Kilead ung Ramoth mang gaw cu tuk ci goi.

³⁰ Ahab naw Jehoshaphat pyen nak ci, “Ng’tuk nak ung mi gawk law ung kei cu ka müi ng’khukhlat khai, cun ung phi nang läi mang ah suinu na sui vai” cik ci. Cun ah kyasei Israel ghangpughang cu amui ng’khukhlat ne ng’tuk nak ung hteit ci.

³¹ Siria ghangpughang naw yatha thum kip lei goi ah gabawi gui cu thumkhän ne, Israel ghangpughang ah kawn ah a u phi kä ami tuk vai ah pyen ci.

³² Cun ah kyasei ngami naw Ghangpughang Jehoshaphat cu hmu u neta, ngami ami van naw ani cu Israel ghangpughang ah ngai u ne, ani cu ng’hlah shi ne tuk ci gui. Cun ung phi ani m’lau law khäta,

³³ ani cu Israel ghangpughang ah kä kyak ciah hmat law neta, ngami naw kä tu ba ci gui.

³⁴ Cun ung phi Sirian gakap tumat naw kä ngaih-tüh ah m’la awn kap sei Ghangpughang Ahab ah shawiphaw suinu anglak ung valut khäta, “Kei ka leim ci nei, ng’tuk nak ungka ng’hlat ba ä” cine a yatha mawng ciam pyen nak ci.

³⁵ Aktung ah ami ng’tuk yah ung Ghangpughang Ahab cu a yatha khan ah Sirian gui täng ah mang ne ng’hngang ne ngok ci. A leim ungka si cu long ne, yatha khan ah li ci, acun ah mühun ung ani cu sik ci.

³⁶ Khohni sip law hlü khäta Israel gakap phung ung ng’thu ng’shäu gawk lawk ci, “Achang päng cu amät ah kho la amät ah mang gaw ung hteit ba sä!”

³⁷ Ghangpughang Ahab cu sik ci. A gook cu Samaria ah hteh püi ba ne, k’phuh ci gui.

³⁸ Ani ah yatha cu Samaria tuihta ung m’si ci gui, a cu ah a si cu ui gui naw m’leek ci gui, cun cu pawmyau chang gui ah tuisi nak ah kyak ci, cun gui cu Bawipa naw a pyen ah mäih ah kya lawk ciah kyak ci.

³⁹ Ghangpughang Ahab naw abi phung avan, m’vuiha awn a pyan ah mang im la ani naw a cawh phung ah mang gaw gui cu Israel Ghangpughang gui ah a mawng ung ami guk ah kyak ci.

⁴⁰ Ani a sih kawn ah a hta Ahaziah cu ani ah hnün ung ghangpughang ah kya ba ci.

Judah Ghangpughang Jehoshaphat

⁴¹ Israel ghangpughang Ahab ah uknak akum phli nak ung Asa ah hta Jehoshaphat cu Judah ghangpughang ah kya lawk ci,

⁴² ani cu cun yah ung a khokum thum kip lei hma lawk ci. Ani naw Jerusalem ung om ne kum m’ku lei hma uk ci. Ani ah nu cu Shilhi ah hta Azubah ah kyak ci.

⁴³ Asa naw apa naw abi man ah mäih ah, Bawipa täng ah ng’düng khai ah bik ci; cun ung phi khogam khawihnah nak ah hmun gui cu kä m’di ci, chang gui naw khawihnah nak cu douthak lä u ne, tui ng’ui phi m’khih lä ci gui.

⁴⁴ Jehoshaphat naw Israel ghangpughang awn dimdeeih nak cu bik ci.

⁴⁵ Jehoshaphat naw abi phung phung, ani ah m’gäi nak avan la ng’tuk abi nak, gui cu Judah ghangpughang gui ah mawng ca uk ung guk ah kyak ci.

⁴⁶ Apa Asa ah khin ung k’pawi shüt ciah khogam ah sonkiang ung bi bik ciah pawmya ciah hnumi pami gui avan cu ani naw heeng gui yawp ci.

⁴⁷ Edom kho ung ghangpughang kä om ci; acun cu Judah ghangpughang naw am düih ah uktu naw uk ci.

⁴⁸ Ghangpughang Jehoshaphat naw tuinu-ung hteit ciah htinpaw cu Ophira kho ah hteit ne ghui gui lak khai ah pyang ci; cun ung phi cun gui cu Ezionkeber she sei kä hteit hlawk ci gui.

⁴⁹ Israel ghangpughang Ahaziah naw ak chang gui cu Jehoshaphat ah chang gui awn a täng ah ami hteh vai ah pyen lawk ci, cun ung Jehoshaphat naw maa nak ci.

⁵⁰ Jehoshaphat cu si sei, David ah mang gaw, mang gui ng’phu hmun ung phuh ci gui, a hta Jehoram cu ghangpughang ah ngo ba ci.

Israel Ghangpughang Ahaziah

⁵¹ Judah ghangpughang Jehoshaphat ah a uknak akum gha lei chih nak ung, Ahab ah hta Ahaziah cu Israel ghangpughang ah kya lawk ci, ani naw Samaria ung kum goi uk ci.

⁵² Ani naw Bawipa hnungtuk püi ne katnak bik ci, ani cu apa Ahab, anu Jezebela la Israel gui katnak ung hteh püi gui ciah ghangpughang Jeroboam ah mäih ah kyak ci.

⁵³ Ani naw ama ung apa ah mäih ah Baala cu khawihnah ne abi bik ci, ani naw Bawipa, Israel Khanpughi cu m’lungshe sak ci.