1 GHANGPUGHANG GUI 21 - Cho Bible Common Language 2016

Naboth ah Sapyitduum

¹ Jezreelaa kho ghangpughang Ahab ah mang im pei ah Naboth ming nak ciah chang ah sapyitduum om ci.

² Hnüüp ät ung Ahab naw Naboth a pyen nak cu, “Na sapyitduum cu na pe tu ba ä; cun cu kei ah mang im pei ung om ci nei, kei naw thui an geit nak ah duum ah ka ng’ya hlük ci nei. A cän ah phäh ah ni pi ciah duum cu ka ning pek khai nei,

³ Naboth naw, “Shin ah sapyitduum cu ka pupa gui ah pakhui kam düng ah kyak ci, shin nang am kei naw ka ning pek vai cu Bawipa naw na maa nak ci nei!” cik ci.

⁴ Ahab cu a im ah hteit ba ne, Naboth naw cun a ci nak ah phäh ah thüi ne m’lungshe ci. Ani cu a ih phak ung ng’yän ne, k’pang täng ah mang ne, ei kä ei ne om ci.

⁵ Ak chu Jezebela cu ani ah hteit neta ng’shik ci, “A i ah kyasei na thüi ang? A i ah kyasei ei kä na ei ang?”

⁶ Ani naw, “Naboth naw ana pyen nak ah phäh ah nei, kei naw a sapyitduum hleih tuba vai ah ka pyen ci, käcung ani naw a yum ung, a hei duum peit tuba vai, ka pyen ci, cun ung phi kä ka gah khai ah ani naw na pyen nak ci!”

⁷ Jezebela naw, “Nang cu ghangpughang ah kä na kya ne ang? Ih phak ungka tho law ne, yeikyai ne, ei ei ä, Naboth ah sapyitduum cu kei naw ka gah khai nei!” cik ci.

⁸ Cun kawn ah ani naw ca gu neta Ahab ah ming gu ne, a tasik awn k’daih neta bawi gui la Jezreela ng’leimaa ng’vai gui am pe gui ci.

⁹ Cun ah ca ung, “Ei hlawi nak vai ah hnüüp ät k’bäi ne ng’shäu u ne, chang gui a täng ah khü gui neta, Naboth am m’tamkhah nak vai ah hmun pe vä.

¹⁰ Cun kawn ah chang omshe hnih khü goi neta, ngani naw a hmai ung tawk ne, shin ah chang cu khanpughi la ghangpughang yeeihkah nak ci nei, ci ni sä. Cun kawn ah ani cu mang gaw k’pung ah hteh püi ne, lung awn vawi ne ngawn vä” cik ci.

¹¹ Bawi gui la Jezreela angvai gui naw Jezebela ah thumkhän ah mäih ah bik ci gui.

¹² Ngami naw ei hlawi nak ah hnüüp cu ng’shäu u neta, chang gui a täng ah khü gui ne, Naboth am m’tam nak ah hmun cu pek ci gui.

¹³ Chang omshe goi naw chang ah ng’lung ung ani cu tawk ni ne, Khanpughi la ghangpughang yeeihkah nak ci nei, ci ni khäta, ani cu mang gaw k’pung ah hteh püi ne lung awn vawi ne ngawn ci gui.

¹⁴ Naboth ami ngawn ah mawng cu Jezebela am m’thein ba ci gui.

¹⁵ Jezebela naw cun angyak vai am, Ahab a pyen nak cu, “Naboth cu si pyi ci nei. Tuhbäi hteit ne nang am kä a ning yoih nak hlü ah sapyitduum cu na lak vai nei” cik ci.

¹⁶ Acun vai am Ahab cu sapyitduum la ne khäm khai ah hteit ci.

¹⁷ Cun kawn ah Bawipa naw Elijah Tishbe ah prophet am,

¹⁸ Samaria ah Ghangpughang Ahab ah hteit ä. Ani cu Naboth ah sapyitduum ah acun lak khai ah ana om sei na hmuk khai nei.

¹⁹ Kei Bawipa naw ka pyen cu na m’thein vai nei, “Chang ngawn neta ani ah khawcham cu na lak khai ma? Shin ah kei naw ka pyen cu na m’thein vai nei: Naboth ah si ui gui naw ami m’leih nak ah hmun bä bä ung nang ah si cu m’leik khai gui nei!”

²⁰ Ahab naw Elijah cu hmu neta, “Ka ga aw, kei na na hmu ne ma?” cik ci. Elijah naw, “Ä, ka ning hmuk ci nei, nang cu Khanpughi täng ah akshe akbe ah bi vai ah nang ap ci nei.

²¹ Cun ah kyasei Bawipa naw nang ning pyen nak ci, “Kei naw nang ah khan ah leigai ka law püi khai, nang cu ning k’täm ne, na kyongkhui ung a ghi a hmaw pami phung ka nawt heng khai.

²² Nang ah kyong khui cu Nebat ah hta ghangpughang Jeroboam ah kyongkhui ah mäih, Ahijah ah hta Ghangpughang Baasha ah mäih ah kya lawk khai, a i ah kyasei ci ung Israel gui katnak ung hteh püi gui ne kam lung shek khai ah na na thawh sak ah hmawk ah kyak ci.

²³ Jezebela ah mawng Bawipa naw a pyen cu, ani ah pumsa cu Jezreela mang gaw ung ui gui naw ei khai gui nei.

²⁴ Nang ah na mätyah gui phung mang gaw kyong ah sik cicu ui gui naw ei khai gui, gaw k’pung ah sik ci gui cu langta gui naw ei khai gui nei.”

²⁵ (Ahab ah mäih ah Bawipa täng ah akshe bi vai ah akbe ah ng’ap cicu a u kä om ci — avan cu akchu Jezebela ah tooktam ah kyak ci.

²⁶ Ani cu Amorit chang gui ah mäih ah a gup gui khawihnah ne lüng aa nak pikbäih ah katnak cu bik ci. Amorit gui cu Israel chang gui ami khaw ung ami gawk law sangung Bawipa naw aktäm gui ah kyak ci.)

²⁷ Elijah naw ng’thu a pyen yawp ung, Ahab naw a sui gui k’teek ne, suut ne, suishe gui sui ci. Ani cu ei kä ei ne, suishe awn ip ne, thüi nei ng’üüp ne hteit hton ci.

²⁸ Bawipa naw prophet Elijah cu pyen nak ci,

²⁹ “Ahab naw kei ah ma ah a i hlawk ah amlung ang neim sak cu nang naw na hmu ne ang? Ani cu cun ah kyak ci kyasei, ani a ghin yah ung ani ah khan ah kei naw leigai kä ka law püi khai nei; Ani ah a hta gui ah ghin yah ung Ahab ah kyongkhui ah khan ah kei naw leigai ka law püi khai nei.”