1 GHANGPUGHANG GUI 2 - Cho Bible Common Language 2016

David naw Solomon Akhnu ah Am’cäi nak

¹ David cu si law vai neta a hta Solomon cu khü ne ak hnu ah m’cäi m’ä nak pek ci.

² Ka sih nak vai gawk lawk ci. Na khüi ghat vai, na k’thamah vai.

³ Bawipa na Khanpughi naw bi vai ah ak bäi cu na bi vai. Moses ah thukhän ung guk ah thukhän gui la Thumkhän gui avan cu na läk vai, cun ah kyasei na hteh nak päng ah na bi nak päng ung bämang nak om khai.

⁴ Nang naw na ngaih ah a kyak ung, Bawipa naw abi ah shaitak cu k’pang khai, ani naw ana pyen nak cu, kei ah ka htang’shon gui naw ami m’lung kyong m’lung ngaih avan awn ani ah thumkhän cu bekhüt ne, geing na ne ami läk ah chuih Israel cu uk khai gui nei.

⁵ “A i baw om ba mä ci. Na shüm ba khai, Israel gabawi goi Ner ah hta Abner la Jether ah hta Amasa cu Joab naw ngawn goi ne kei ah khan ah bi bik ci. Ng’tuk yah ung ami ngawn tu ah phäh ah dimdeeih yah ung phu tu ne a ngawn gui cu nang naw na shüm ba ci. Ani naw chang ni gui ngawn gui ci, tuhbäi kei naw ani bi cu ka chaw nak ci, acun ah mawng cu kei naw ka yaica nak ci.

⁶ A i bi vai cu nang naw na hmat ci; nang naw ani cu k’dim ung kä na sih en sak vai.

⁷ “Cun ung phi Kilead ah ka Barzillai ah hta gui cu na m’gein gui vai, a i ah kyasei ci ung kei cu nami phäi Absalom kyih ne ka dawng sangung kei cu na m’gein ci gui.

⁸ Benjamin khaw Bahurim gawnu ungka Kera ah hta Shimei phi om ci. Kei Mahanaim ah ka hteh yah ung ani naw akshe ah na plah tam ci, cun ung phi Jordan Tuinu ung kani ng’hmuh sangung, ani kä ka ngawn khai ah Bawipa ah ang ming ung kei naw shaitak ka pek ci.

⁹ Cun ung phi ani kä m’kyuk ah kä na nawng en vai. A i bi vai cu nang naw na hmat ci, ani am sihnak pek nak vai cu nang naw na hmat vai” ciah pyen nak ci.

David ah Sih ah Mawng

¹⁰ David cu si sei David ah mang gaw ung k’phuh ci gui.

¹¹ Ani cu khokum phli kip ung Israel ghangpughang ah kyak ci, Hebron ung kum chih, Jerusalem ung kum thum kip lei thum uk ci.

¹² Solomon cu apa David ah hnün ung ghangpughang ah ngok ci, ani ah bämang huham cu khäng htek ci.

Adonijah ah Sih ah Mawng

¹³ Adonijah, Hakkith nu nak cicu Solomon ah nu Bathsheba ah hteit khäta, ani naw, “Na om law tuk ci ma” cine ng’shik ci. Ani naw, “ä ya” cik ci,

¹⁴ cun kawn ah ani naw pyen ba ne, “Kei naw ka ning shi k’thäh vai om ci,” ci khäta, Ani naw, “Cun cu a i ang?” cik ci.

¹⁵ Ani naw, “Na hmat ah mäih ah kei cu ghangpughang ah ka kyak khai süta, Israel chang päng naw phi ngaih te u ci. Cun ung phi a hei ah kya lawk ci, kei ah ka nau cu ghangpughang ah kya lawk ci, cun cu Bawipa ah ng’yak hlü ah kyak ci.

¹⁶ Tuhbäi kei naw bi vai tumat ka ning k’thäh hlük ci; na bä ni, kä na ma en vai nei.” Bathsheba naw, “Cun cu a i ang?” cik ci.

¹⁷ Ani naw, “Solomon ghangpughang ah na k’thäh pe ä — ani naw kä ning ma nak khai ah ka hmat ci nei — Shunem ah ka hnumi hta Abishag cu kei naw ka chu nak khai nei.”

¹⁸ Ani naw, “Bä khai nei, nang ah hmawk ah ghangpughang hteit ne ka ng’thu püi khai nei,” cik ci.

¹⁹ Cun ah kyasei Bathsheba cu Adonijah ah phäh ah ghangpughang ng’thu püi khai ah hteit ci. Ghangpughang cu ng’düi law ne, anu cu yavaih na neta ama ah kawp ci. Cun kawn ah ani cu amangkiaang ung ngo neta, akpat täng ung anu ah ngoh nak vai ah a hei tumat law pui sak gui ci.

²⁰ Ani naw, “Kei naw nang ka ning shi hlü api om ci; kä na ma en pe ä.” Ani naw, “Cun cu a i ang, nu awi, kei naw kä ka ning ma nak khai nei” cik ci.

²¹ Ani naw, “Na phäi Adonijah am Abishag cu chu na sak ä” cik ci.

²² Ghangpughang naw, “A i ah kyasei Abishag cu ani am ka pek vai ah kei na nak thäh ang? Kei naw mangkiang mä ani am ka pek vai ah na nak thäh khai ang! Cun kawn ah ani cu ka phäi ng’vai ah kyak ci, taigü Abiatha la Joab cu ani täng ah kyak ci goi!”

²³ Cun kawn ah Solomon naw Bawipa ah ang ming ung shaitak nak aktung ah bik ci, “Shin ah a nak thäh ah phäh ah Adonijah naw a hnun gui pek khai ah kä ka bi ah a kyak ung, Khanpughi naw ka sih vai ah na yuk bi sä!

²⁴ Bawipa naw kapa David ah mangkiang ung na khänhtek sak pyi ci; ani naw a shaitak k’pang ci, uknak khaw cu kei la ka hta ng’shon am na pe pyi ci. Adonijah cu a tuhngawi sik khai ah ghing ciah Bawipa ung ka ng’tam ci nei!” cik ci.

²⁵ Cun ah kyasei Solomon naw Benaiah cu ng’thu k’bäi sei, ani naw hteit ne Adonijah cu ngawn ci.

Abiatha Amik’täm la Joab ah Sih ah mawng

²⁶ Cun kawn ah Solomon ghangpughang naw taigü Abiatha a pyen nak cu, “Anathoth, na khaw ah hteit ba ä. Nang cu na si khin te ci, cun ung phi tuhbäi sih nak kä ka ning pek khai, kapa David ah pei ah na om sangung nang cu Bawipa ah Thukhän M’küm ngäng ciah na kyak ci, ani ah yaica nak avan cu na awt püt ciah kyak ci.”

²⁷ Cun kawn ah Solomon naw Abiatha cu Bawipa ah taigü ungka heeng ci, cun ah kya ne Shilon ungka taigü Eli la a hta ng’shon gui ah mawng Bawipa naw a pyen nak cu bä khai ah a bi ah kyak ci.

²⁸ Cun ah mawng gui cu Joab naw ng’yak ci. (Ani naw Adonijah cu ng’düih püi ci, Absalom cu kä ng’düih püi ci.) Cun ah kyasei ani cu Bawipa ah om nak ah Phung ah dawng ne, sonkiang ah a kit gui cu k’pang ci.

²⁹ Joab naw phung ah dawng ne sonkiang ah lawi ak pan cu Solomon ghangpughang naw ng’ya neta, Solomon naw Joab ah chang tüi ne, a i ah kyasei sonkiang ah a dawng cu Solomon a kyih ah phäh ah kyak ciah pyen ci. Cun ah kyasei Solomon ghangpughang naw Benaiah cu tüi ne Joab cu ngawn sak ci.

³⁰ Ani cu Bawipa ah om nak ah Phung ah hteit neta, Joab cu pyen nak ci “Ghangpughang naw na law vai pyen ci” cik ci. Joab naw, “Ka nei, a shin ung ka sik khai nei” cik ci. Benaiah cu ghangpughang ah hteit ba ne, Joab ah pyen cu m’thein ba ci.

³¹ Solomon naw, “Joab naw a pyen ah mäih ah bi vä. Ani cu ngawn neta k’phuh vä. Joab naw chang ni gui a ngawn yah ung abi gui cu kei la David ah hta ng’shon a u naw phi kä ma na phung khai nei.

³² Joab naw kapa David ah kä hmat ah chang gui ngawn ne akat ah phäh ah ani cu Bawipa naw m’kyuk khai. Joab naw chang ni hnih ngawn ci, ngani cu amät ah ta ni tuba ci goi: ngani cu Abner, Israel gakapbawi la Amasa Judah gakapbawi ah kyak ci goi.

³³ Chang ami ngawn ah phäh ah m’kyuk nak cu Joab la a hta ng’shon ah khan ah ngawi yä kya lawk khai. Cun ung phi a mangkiang ung ngok ciah David ah hta ng’shon gui läi am Bawipa naw ang’täi sei näng nak pe gui khai.”

³⁴ Cun ah kyasei Benaiah cu Bawipa ah om nak ah Phung ah hteit ne Joab cu ngawn neta amät ah im khaw ng’pia ung phuh ci.

³⁵ Ghangpughang naw Benaiah cu Joab ah hnün ung gabawi ah tha ne, Abiatha ah hnün ung Zadok cu taigü ah tha ci.

Shimei ah Sih ah Mawng

³⁶ Cun kawn ah ghangpughang naw Shimei am ng’thu m’khäh ne a pyen cu, “Shin ah Jerusalem ung na mät ah phäh ah im co vä, acun ung na om vai, mang gaw cu kä na hteh tak en vai.

³⁷ Nang naw hteh ta ne, Kidron tuilong aka täng ah na hteh a khoi ung, nang cu ang ghit ah na sik khai nei, na mät cu katnak na gah khai nei.”

³⁸ Shimei naw, “Bä khai nei, Bawi aw, na pyen ah mä ah ka om khai nei” cun ah kyasei ani cu Jerusalem ung akshou om ci.

³⁹ Kum thum law khäta, Shimei ah changshäm hnih goi cu Kath ghangpughang Maakah ah hta Achish ah dawng ci goi. Shimei naw ngani Kath ah ani om cu ng’ya neta,

⁴⁰ ang sela ung ng’cum ne, a changshäm gui shui ba khai ah Achish ghangpughang ah om nak Kath ah hteit ci. Ani naw hmu goi neta a im ah law püi ba goi ci.

⁴¹ Solomon naw Shimei ah bi cu ng’ya neta,

⁴² ng’thu m’khäh ne pyen ci, “Jerusalem kä na hteh tak en vai ah kei naw Bawipa ah ming ung shaita ne ka pyen ci. Cun ah na bi ah khoi ung ang ghit ah na sik khai nei, ci nei ka ning m’cäi ci. Nang naw phi yum ne, ka ngai khai nei, na cik ciah kä kya ne ang?

⁴³ A i ah kyasei na shaitak m’sheit ne kei ah ng’thu kä na ngaih ang?

⁴⁴ Kapa David ah khan ah nang naw chei khai ah na bi gui avan nang naw na hmat ci. Acun ah phäh ah Bawipa naw ning m’kyuk khai nei.

⁴⁵ Cun ung phi kei läi cu hrilham na pek khai, David ah uknak khaw cu khonglän ung khän sak khai.”

⁴⁶ Cun kawn ah Ghangpughang naw Benaiah cu ng’thu k’bäi sei, ani naw hteit ne Shimei cu ngawn ci. Tuhbäi Solomon naw a khaw cu akbe ah uk ci.