1 GHANGPUGHANG GUI 19 - Cho Bible Common Language 2016

Sinai M’Htung Khan ah Elijah Gawk ci

¹ Elijah naw abi gui phung la Baala prophet gui avan a ngawn gui ah mawng cu Ghangpughang Ahab naw akchu Jezebela am m’thein tuk ci.

² Ani naw Elijah am ng’thu m’khäh ci: “Prophet gui ah khan ah na bi ah mäih ah ngawi ung a shin ah khin ung kei naw nang ah khan ah kä ka bi ah a kyak ung khanpughi gui naw ka sik khai ah na ci u sä.”

³ Elijah cu kyi neta a phyawn vai ah dawng ci; ani naw a changshäm cu khah püi ne Judah khaw Beersheba ah hteit ci. A cu ah achangshäm cu nawng shüt neta,

⁴ Elijah cu bung hmu ah hnüüp pum ung hteit ci. Ani cu sing ghing ah ang hniim ka ah ng’düm neta, ka sih ung bä tuba khai, ci neta ak taigü cu, “Bawipa, ka yai aih ci nei, ka ghin nak cu na lak pe ä; kei ka sih ung bä tuba khai nei!” cik ci.

⁵ Ani cu sing ghing ka ah ng’yän neta ip ci. Ang ghit ah khanchang naw tawn neta a pyen cu, “Tho law ne ei ei ä” cik ci.

⁶ Ani cu mang shüi neta, m’htut pum ät la tui um ät a lu pei ah om sei hmuk ci. Ani cu ei aw neta ng’yän ba ci.

⁷ Bawipa ah khanchang law ba mä ne ak hnih vei nak ah m’tho neta a pyen ba cu, “Tho law ne ei ei ä, na hteh nak vai ah lam cu thuuk aih ci nei.”

⁸ Elijah cu tho law neta ei aw ba ci, a ei awk naw k’thagui pe sei hnüüp phli kip ung hteit ne khomhtung theing Sinai ah gawk ci.

⁹ Acu ah ani cu lungkhui ah lut ne mü ah ip ci. Ang ghit ah Bawipa naw ani cu ng’thu law püi ci, “Elijah, shin ung a i ang na bi?” cik ci.

¹⁰ Ani naw, “Bawipa, M’gäi ciah Khanpughi, kei naw angtäi sei nang ah bii ka bik ci nei — nang bäng ah bi nei ka bi. Cun ung phi Israel chang gui naw nang ung thukhän cu m’shet u ne, na sonkiang phye u ne, na prophet gui avan ngawn ci gui nei. Kei bäng ka k’pawih ba ci — kei phi na ngawn khai gui ah k’tha nak ci gui nei!” cik ci.

¹¹ Bawipa naw ani am, “Hteit ne m’htung lai ung kei ah ma ah ng’düi ä” ciah pyen nak ci. Bawipa naw sunpah ne hteit neta, khokhinu cu chah law sei, khomhtung gui pyawn ne, lung gui payak ci — cun ung phi Bawipa cu khokhi ung kä om ci. Khokhi ng’düm law khäta, shihpi thüng lawk ci — cun ung phi shihpi a thüng nak ung Bawipa kä om ci.

¹² Shihpi a thüng kawn ah mei däi lawk ci — cun ung phi mei ung Bawipa kä om ci. Mei a däi law kawn ah ng’awi gii cia k’aw gawk lawk ci.

¹³ Elijah naw cun cu ng’ya neta, a suinu awn a hmai shung ne, lungkhui valuh nak ung hteit ne ng’düi ci. Ng’thu k’aw naw a pyen nak cu, “Elijah, shin ung a i ang na bi?”

¹⁴ Ani naw, “Bawipa, M’gäi ciah Khanpughi, kei naw angtäi sei nang ah bii ka bik ci nei — nang ah bii bäng nei ka bi. Cun ung phi Israel chang gui naw nang awn ng’thukhän cu m’shet u ne, na sonkiang cu phye u ne, na prophet gui avan ngawn ci gui nei. Kei bäng ka k’pawih ba ci — kei phi na ngawn khai gui ah k’tha nak ci gui nei” cik ci.

¹⁵ Bawipa naw pyen nak ci, “Damaskas ah pei bungnu ah hteit ba ä, cun kawn ah mang gaw ung lut ne, Hazela cu Siria ghangpughang ah hmoh ä;

¹⁶ Nimshi ah hta Jehu cu Israel ghangpughang ah hmoh ä, Abel Mehola ungka Shaphat ah hta Elisha cu nang ah hnün ung prophet ah kya ba khai ah hmoh ä.

¹⁷ Hazela naw kä a ngawn gui, luat ci gui cu Jehu naw ngawn gui khai, Jehu ah kut ung phyawng ci gui cu Elisha naw ngawn gui khai.

¹⁸ Cun ung phi kei naw Israel ung chang phia chih kip cu ka ghin sak gui khai — ngami ami van cu kei ung bekhüt u ne, Baala ma ung kä kawp ci gui, ani ah a gup kä ng’ui hnam ci gui ah kyak ci.”

Elisha A Khü ah mawng

¹⁹ Elijah cu acun ungka naw hteit neta vantang bum awn lai thawn ne om ciah Elisha cu hmuk ci; ani ah ma ung vantang bum gha lei ät naw lai thawn ci, ani cu ak hnu bäih bum ät awn thawn ci. Elijah naw a suinu cu suut neta Elisha am m’sui ci.

²⁰ Elisha naw vantang gui nawng ne, Elijah ah dawng law neta a pyen cu, “Kapa la kanu cu ng’ui ne ka yavaih goi cang khai, cun kawn ah nang awn a täng ah ka hteit tuk khai nei” cik ci. Elijah naw, “Ä ya, hteit ba ä, kä ka ning ma nak khai nei!” cik ci.

²¹ Elisha cu a vantang bum gui om nak ah hteit ba ne, ngawn gui neta, ami meh cu shong ne, ami thapo gui cu mei ah cik ci. Sei meh gui cu ani naw chang gui am pe gui sei ei ci gui. Cun kawn ah ani cu hteit ne Elijah ah bawmtu ah kya ne läk tuk ci.