1 GHANGPUGHANG GUI 18 - Cho Bible Common Language 2016Elijah la Baala Prophet gui 1 Shou hta khäta, khokäu a kum thum nak ung Bawipa naw Elijah a pyen nak cu, “Nang cu ghangpughang Ahab ah ma ah hteit ä, kei naw kho ka aa sak khai nei,” ci sei, 2 Elijah cu hteit ci. Cun sang ung Samaria ung kho a käu cu akshe pikbäih ah kyak ci, 3 Cun ah kyasei Ahab naw mang im uk ciah Obadiah cu khü ci. (Obadiah cu Bawipa aktung ah khawihnah ciah chang ah kyak ci, 4 Jezebela naw Bawipa ah prophet gui a ngawn gui yah ung Obadiah naw prophet phia cu la gui neta, hma kip ciah hnih ah k’pai gui ne, khui ung thup gui ci, tui ei phi pe gui ci.) 5 Ahab naw Obadiah a pyen nak cu, “Ng’se lah la gui ami ghin nak vai ah khu ah lim nak mi hmuh vai ah khaw akyong ung tuinu tuihta phung cu hteit ne mi teng khai nei. Cung mi ng’sela api phi kä mi sih sak khai.” 6 Ani teng nak vai ah khaw täng phäh phäh cu yum yawp ni neta a lam hei hei ung hteit ci goi. 7 Obadiah naw a hteh nak ah lam ung ang ghit ah Elijah cu hmuk ci. Ani naw Elijah cu hmat ba neta, ama ah kawp ne, saya, nang Elijah ang?” cik ci. 8 Ani naw m’shang ne, “Ä, kei Elijah nei, hteit ne na Bawi ghangpughang am kei shin ung ka om cu m’thein ä” cik ci. 9 Obadiah naw, “Ghangpughang Ahab naw ana ngawn vai ah, nang naw ana ngawn vai nang yak hlü cu, kei naw a i ka bi ah phäh ah ang? 10 Na Khanpughi, ghing ciah Bawipa ung kei ka ng’tam ci nei, khaw ah ka, a khawpäng päng ung nang cu ghangpughang naw ning shui sä. Khawpäng uktu naw a khaw ung nang kä na om ciah a pyen law ba ah a kyak ung acun ah uktu naw nang kä a ning hmuh ah mawng angkhäntam vai ah Ahab naw k’thäh khai nei. 11 Nang naw tuhbäi, nang shin ung na om ah mawng cu, ani am hteit ne ka m’thein vai ah na ng’ya hlük ci ma? 12 Kei naw ka ning hteh tak kei yah ung, Bawipa ah mümcha naw nang cu kä hmat nak ah hmun ah a ning hteh ei püi ah a kyak ung, kei a i ah ka kyak khai aw? Nang shin ung na om cu kei naw Ahab am ka m’thein khai, ani naw law ne kä a ning hmuh ah a kyak ung, ani naw kei cu na ngawn khai nei. Na shüm vai cu, kei cu ka hmaw hta sang ge ung akcang ah Bawipa ka khawihnah ci nei. 13 Nang naw na ng’yak khai nei, Jezebela naw Bawipa ah prophet gui a ngawn gui sang ung, prophet phia cu hmakip ciah k’pai ne lungkhui ung thup gui ne, tui la ei cu ka tumbei gui ci nei. 14 Cun ah kyasei, nang ung na om ah mawng ghangpughang am hteit ne ka m’thein vai ah nang naw a i hawkcha ah na, nak thäh ang? Ani naw na ngawn khai nei!” 15 Elijah naw, “Kei naw abii ka bi ah ghing ciah Bawipa ung kei naw shai ka tak ci nei, tuhngawi ghangpughang ah ma ah ka mät ka hteit khai nei.” 16 Cun ah kyasei Obadiah cu ghangpughang Ahab ah hteit neta m’thein sei, Ahab cu Elijah hmuk khai ah lawk ci. 17 Ahab naw ani cu hmu law neta, “Shi ah nang na om ci maw — Israel khaw khüikha vai ah bi pikbäih ciah chang!” cik ci.” 18 Elijah naw, “Kei cu khüikha nak bik ciah kä ka kyak ci, nang — nang la na pa nei. Nang cu Bawipa ah thumkhän gui kä läk ne, Baala ah a gup gui na khawihnah ci. 19 Tuhbäi Israel chang gui avan Karmela M’htung ah law ne ami na hmuh law vai ah k’thäh gui ä. Baala ah prophet 450 la Asherah khanpughinu ah prophet 400, Ghangpughangnu Jezebela ah akbäi gui cu nami law püi gui vai nei. 20 Cun ah kyasei Ahab naw Israel gui ami van la Baala ah prophet gui cu Karmela M’htung ah k’bum ne ng’hmuh sak gui ci. 21 Elijah naw chang gui ah pei ah hteit neta a pyen cu, “Nangmi ah m’lung kyong pyan nak vai cu a i güt lüng khai ang? Bawipa cu Khanpughi ah a kyak ung khawihnah vä; Baala cu khanpughi ah a kyak ung khawihnah vä!” Cun ung phi chang gui cu m’kha ät ah phi kä ng’htau ci gui. 22 Elijah naw pyen ba ne, “Bawipa ah prophet gui ungka, kei bäng ka om ba ci, cun ung phi Baala ah prophet 450 lawk ci gui. 23 Vantang hnih law püi vä, tumat cu Baala ah prophet gui am pe gui vä, cun cu ngawn ne, m’sa ne, sing bum ah khan ah taih u sä — cun ung phi mei kä cik en u sä. Kei naw phi vantang tumat cu acun ah ka bik khai. 24 Cun kawn ah Baala prophet gui cu ami khanpughi ah taigü u sä, kei cu Bawipa ah ka taigü khai, mei chah law ne ng’thu m’shang lawk cicu — Khanpughi ah kyak ci.” Chang gui naw ani ah pyen cu k’cang na ne m’lau ci gui. 25 Cun kawn ah Elijah naw Baala ah prophet gui am, “Nangmi cu nami da ci, nangmi naw vantang cu la neta pyang ma vä. Nami khanpughi ah taigü vä, cun ung phi sing cu mei awn kä nami cih en vai nei” cik ci. 26 Ngami naw ami thak law gui ah vantang cu la ne, pyang u neta, khaw hnüüp law güt sei Baala ah taigü ci gui. Ngami m’lau u ne, “Baala aw, na m’shang gui ä!” ci u ne, ami cawh ah sonkiang cu veing ne ng’lam ci gui. Cun ung phi a i ah m’shan nak phi kä gawk lawk ci. 27 Khaw hnüüp law khäta, Elijah naw gaih tu gui ne a pyen cu, “M’lau pi ne taigü vä! A ni cu a i baw ngaih-tüh ne, käcung, ng’naw phyam ne, käcung, a hawi baw hteit ne kyak khai nei! Käcung ip bawk khai, cun ah kyasei nami m’thawh vai nei!” cik ci. 28 Cun ah kyasei prophet gui cu m’lau law pi ne taigü ci gui, ami thung ah khim la sem gui awn ami si long khai ah ami sa aat ci gui. 29 Ngami cu khaw hnüüp lunglai güt m’lau ne ng’pyang ci gui; cun ung phi m’shan nak gui kä gawk lawk ci, a i k’aw phi kä ng’yak ci gui. 30 Cun kawn ah Elijah naw chang gui am, “Ka pei ah law vä” ci sei, ngami ami van law ne ng’bum lawk ci gui. Ani naw ami phyeet te ah Bawipa ah sonkiang cu pyang ba ci. 31 Ani naw lung gha lei goi cu lak ci, Jakob ah hta gui pakhui gha lei goi ah phäh ah tumat ciah kyak ci, Jakob cu Bawipa naw Israel ah aming a sui ah kyak ci. 32 Cun ah lung gui awn ani naw Bawipa khawihnah nak vai ah sonkiang cu co ba ci. Acun ah angveing ung tui leter 14 lon nak vai ah m’yawng cu co ci. 33 Cun kawn ah ani naw sonkiang khan ah sing taih ci, vantang cu m’sa neta sing ah khan ah taih ci. Cun kawn ah ani naw, “Nami hlüng gui phli cu tui k’be u neta, douthak nak la sing ah khan ah yuk shawi vä” cik ci. Ngami naw acun ah bi u khäta, 34 ani naw, “Bi ba mä vä” cik ci, bi ba ci gui. “Bi ba mä vä” ci ba sei, acun ah biba ci gui. 35 Tui naw sonkiang cu k’plüm ne, m’yawng ung be ci. 36 Khaw k’awi täng khawihnah nak ah khin ung prophet Elijah naw sonkiang pei ah law neta ak taigü cu, “O Bawipa, Abraham, Issak, Jakob ni ah Khanpughi, Israel gui ah Khanpughi ah na kyak ah mawng, kei cu na na changshäm ah ka kyak ah mawng, shin gui avan nang ah thumkhän awn ka bi ah mawng cu tuhbäi m’dang law ä. 37 Na m’shang ä, Bawipa na m’shang ä, cun ung shin ah chang gui naw nang cu Bawipa, Khanpughi ah na kyak ah mawng la na mät ung na law püi ba gui ah mawng cu hmat khai gui nei.” 38 Bawipa naw mei yuk chah law sei, khawihnah nak ni, sing ni, lung gui ni avan ui ne, m’dek phi ng’khiit ne, m’yawng ung tui phi ket yawp ci. 39 Cun cu chang gui naw hmu u neta, m’dek ung ng’yän neta ami pyen cu, “Bawipa cu Khanpughi nei, Bawipa bäng nei Khanpughi!” 40 Elijah naw ng’thu k’bäi ne, “Baala prophet gui cu k’pang gui vä; tumat phi kä k’phyawn en vä!” Chang gui naw ngami cu ami van pha gui ci gui, Elijah naw Tuinu Kishon ah hteh püi gui neta ngawn gui ci. Khaw Akäu Angpyi nak 41 Cun kawn ah Elijah naw Ghangpughang Ahab a pyen nak cu, “Tuhbäi hteit ne ei ei ä. Kei naw khaw ang hmum ka ng’yak ci nei.” 42 Ahab ei ei khai ah a hteh sangung, Elijah cu Karmela M’htung lai ah kai neta, am’khuuk goi ah ng’lak ung alu m’hluh ne, m’dek ung kawp ci. 43 Cun kawn ah a changshäm am, “Hteit ne tuinu cu va teng ä” cine pyen nak ci. A changshäm naw hteit ne, ng’hlat law ba neta, a pyen cu, “A i phi kä ka hmuk ci nei.” Ani naw hteit ne ava teng vai ah chih vei pyen nak ci. 44 Ak chih vei nak ung ani naw law ba neta a pyen cu, “Khomei a pihta, chang tumat ah kut ah kä däm pi khai kyak ci cu, tuinu ungka, kai law sei ka hmuk ci nei.” Elijah naw a changshäm cu ng’thukbäi ne, “Ghangpughang Ahab ah hteit ne, khaw k’aa naw kä a kham pha ng, a yatha ung kai ne, a im ah a hteh ba vai ah nam then vai nei” cik ci. 45 Kä shou pha sei khawmik cu ng’meile naw shung law ne, khaw khi lawk ci, khaw aknui ah aa lawk ci. Ahab cu a yatha ung kai ba ne, Jezreelaa ah hteit ba ci. 46 Bawipa ah huham cu Elijah ah khan ah gawk law sei; a suisak awn a khei htün ne khit neta, Jezreela ah hteh nak lam avan ung Ahab ah ma ung dawng ne ana hteit ci. |
Cho Bible Common Language © Bible Society of Myanmar, 2016.
Bible Society of Myanmar