1 GHANGPUGHANG GUI 17 - Cho Bible Common Language 2016

Elijah la Khokäu ah Mawng

¹ Kilead kho Tisbe ungka prophet Elijah naw Ghangpughang Ahab a pyen nak cu, “Kei naw a bii ka bi ah Israel gui ah ghing ciah Khanpughi, Bawipa ah ming ung, kei naw ka ning m’thein cu, kei naw kä ka pyen ba pha ah chuih, ma lam ah kum goi ung baw, kum thum ung baw k’daam phi kä bawk khai, kho phi kä aa khai.”

² Cun kawn ah Bawipa naw Elijah a pyen nak cu,

³ “Shin ah hmun hteh ta ne, a kiangtäng ah hteit neta, Jordan a kiangtäng ah Cherith tuihta lawng pei ah na ng’thuh vai.

⁴ Tui cu cun ah tui lawng ungka na awk khai, ei cu kaap gui naw ami ning thak law vai ah ka k’bäi pyi ci.”

⁵ Elijah naw Bawipa ah thumkhän cu ngai ne, Cherith tuihta lawng pei ah hteit ne om ci.

⁶ Ani cu tuihta lawng ungka tui awk ci, m’htut la meh cu kaap gui naw akhongawi tä, amühun tä thak law ci gui.

⁷ Shäng shäng khäta kho kä aa sei tuihta lawng cu kawi ci.

Elijah la Zarephath ung Hmeinu

⁸ Cun kawn ah Bawipa naw Elijah a pyen nak cu,

⁹ “Tuhbäi Sidon ah pei, Zarephath gawnu ah hteit ne om ä. A cu ah kaa hmeinu naw nang a ning m’bei vai ah kei naw ka thumkhän ci nei.”

¹⁰ Cun ah kyasei Elijah cu Zarephath ah hteit ne, gawnu ah m’kawt ung a gawk law sang ung, sing lak ciah hmeinu cu hmuk neta a pyen nak cu, “Tui khap ät na thak law ä,” ci sei,

¹¹ a va vü yah ung khü ba ne, “M’htut phi na thak law ä,” cik ci.

¹² Ani naw m’shang ne, “Kei naw ghing ciah Bawipa, na Khanpughi ung khän ne ka pyen cu, kei ung m’htut kä om ci. Kei ung om ci avan cu k’am ung m’htut den a shum la situi um ung olive-situi api ah kyak ci. Kei shin ung im ah ka hteh püi vai sing ka lak ci, ka mät la ka hta ah phäh apihta ka pyang khai. Cun cu kei ni ah a hnu ah ei ah kyak ci, cun kawn ah cawi ne kani sik khai kyak ci,” cik ci.

¹³ “Elijah naw cun ah hnumi am, “Kä na ng’ä vai, hteit ma ne na ei vai cu pyang ä. Cun ung phi nang ung om ci awn kei ah phäh ah m’htut aläm pum ät pyang ne law püi neta, k’pawih ba ci awn na mät la na hta ah phäh ah pyang ä.

¹⁴ Shin cu Israel Khanpughi, Bawipa naw a pyen nei; “Kei, Bawipa naw kho aa ka tüih law nak ah hnüüp kä a gawk law pha ah chuih m’htut-am ung m’htut den kä pyi khai, situi-um ung situi kä pyi khai.

¹⁵ Hmei nu cu hteit ba ne Elijah ah m’cäi ah mäih ah bik ci, ami van ah phäh ah hnüüp akda ung ei vai cu ng’büh ci.

¹⁶ Bawipa naw Elijah ung shai a taak ah mäih ah m’htut-am ung m’htut den kä ng’pyi ci, situi-um ung situi kä pyi ci.

¹⁷ Api shou law khäta hmeinu ah htapami cu gaw lawk ci; ani cu ka lawpi ka lawpi ne, ak hnu ah sik ci.

¹⁸ Ani naw Elijah pyen nak ci, “Khanpughi ah chang, a i ah kyasei kei ah khan ah shin ah na bi ang? Khanpughi am kei ah katnak gui m’thein ci sei, acun ah cheng ah ka hta a sih vai ah na lawk ci ang?”

¹⁹ Elijah naw, “A hmaw cu na pe ä” ci neta, hnumi ah akut ungka ak hmaw cu la ne, amät ah a ih nak akhan ah akhan kyong ah hteh püi neta, a ih phak ung m’shän ci.

²⁰ Cun kawn ah ani cu m’lau ne taigü ci, “O Bawipa ka Khanpughi, a i ah kyasei shin ah mäih ah kyihkyawk vai cu shin ah hmeinu ah khan ah na bi ang? Ani naw kei cu akni ah na m’hteihtang ci, cun ung phi tuhbäi nang naw a hta na ngawn ci!”

²¹ Cun kawn ah Elijah cu a hmaw ah khan ah thumvei yuk bawk neta taigü ci, “O Bawipa ka Khanpughi, shin ah a hmaw cu ghin ba sak ä!”

²² Bawipa naw Elijah taigü ngaih pek ci; a hmaw ci ng’ghi law ba ne, ghing law ba ci.

²³ Elijah naw a hmaw cu anu ah om nak ka ah yuk hteh püi ba neta a pyen nak cu, “Teng ä, na hta ghing ba ci nei!”

²⁴ Ani naw m’shang ne, “Tuhbäi kei naw ka hmat ci, nang cu Khanpughi ah chang ah na kyak ci, Bawipa naw akcang ah nang ung ng’thu pyen ci nei!” cik ci.