1 GHANGPUGHANG GUI 15 - Cho Bible Common Language 2016Judah Ghangpughang Abijah ( 2Stn 13:1—14:1 ) 1 Israel ghangpughang Jeroboam ah uknak akum gha lei cheit nak ung, Abijah cu Judah ghangpughang ah kya lawk ci, 2 ani naw Jerusalem ung kum thum uk ci. Ani ah nu cu Absalom ah hta Maakah ah kyak ci. 3 Ani phi apa ah mäih ah hmakatnak bik ci, ani cu apughi David ah mäih ah a Khanpughi Bawipa ung bekhüt nak kä om ci. 4 Cun ung phi David ah hmai teng ne a Khanpughi Bawipa naw ani ah hnu ung Jerusalem ung om ne uk ne, ngäng khai ah hta tumat Abijah cu pek ci. 5 Cun ah Bawipa naw abi cu a i ah kyasei ci ung David naw ani ah yeikyai nak vai bi ne, Hittite chang Uriah chang ah mawng ah kawn ah, ani ah ah thumkhän kä läk nak api phi kä a om ah hmawk ah kyak ci. 6 Rehoboam la Jeroboam ah ng’lak ung ng’tün pyi ciah ng’tuk bi nak cu Abijah ah ghin yah akchuih om gäk gäk ci. 7 Abijah ah bi nü nü cu Judah ghangpughang gui ah mawng ca-uk ung guk ah kyak ci. 8 Abijah cu si sei David mang gaw ung k’phuh ci gui, a hta Asa cu ghangpughang ah kya ba ci. Judah Ghangpughang Asa ( 2Stn 15:16—16:6 ) 9 Israel ghangpughang Jeroboam ah uknak a kum ku nak ung Asa cu Judah ghangpughang ah kya lawk ci, 10 ani naw Jerusalem ung kum phli kip lei ät uk ci. Ani ah apighi cu Absalom ah hta Maakah ah kyak ci. 11 Asa naw apughi David ah bi ah mäih ah Bawipa naw a yeinak vai ah bik ci. 12 Agup khawihnah nak ah hmun gui ung bii bik ci gui ah pawmyaa ciah hnumi pami ami van cu ami khaw ungka k’täm gui ci, ani pupa gui ah pyan ah a gup gui avan phi nawt heng yawp ci. 13 Ani naw apighi Maakah phi ghangpughangnu a kyak nak ungka k’täm ci, a i ah kyasei ci ung ani naw ng’lei ani nak khanpughinu Asherah ah gup cu shemshai khai ah a pyan ah phäh ah kyak ci. Asa naw a gup cu shawm neta Kidron khong nawi ung m’khih ci. 14 Asa naw a gup khawihnah nak ah hmun gui avan kä amdi pang ung phi ani cu a ghin nak chuih Bawipa ung bekhüt ci. 15 Ani naw, apa naw Khanpughi am ap ah khawhcham gui avan cu Taigüim ung tha ci, amät ah ap ah ghui la ngui gui cun phi tha ci. 16 Judah ghangpughang Asa la Israel ghangpughang Baasha cu ani huham a om ah chuih ng’tu gäk gäk ci goi. 17 Baasha naw Judah cu tu neta, Judah ah akyong la akpung avan ung hmuh teng nak kä om ba khai ah Ramah ung ng’vong ne khai ci. 18 Cun ah kyasei ghangpughang Asa naw Taigüim la mangim ungka ghui la ngui gui avan cu la neta a bawi gui am hteh püi sak ne Damaskas ah Siria ghangpughang Benhadad, Tabrimmon ah hta, Hezion ah tu am, shin ah ng’thu awn m’khah ne thak sak gui ci. 19 “Mi pa gui ah mäih ah mi khawtgei khai nei. Shin ah ghui la ngui cu nang ah phäh ah letsawng ne. Tuhbäi Israel ghangpughang Baasha awn na ni ng’khawtgei nak cu m’shet ä, cun ung ani naw kei ah khawpäng ungka agakap gui cu la ba khai nei.” 20 Ghangpughang Benhadad naw Asa ah ng’ge püi cu yum neta a gabawi gui la gakap gui cu Israel mang gaw gui tuk khai gui ah tüi gui ci. Ngami naw Ijon, Dan, Abel Beth Maakah, Kalile tuinu pei ung la Naphtali khawpäng avan cu khäm ci gui. 21 Ghangpughang Baasha naw cun ah a kyak gui ah mawng cu ng’ya neta, Ramah ung ang vongpang gui cu nawng en ne Tirzah ah hteit ci. 22 Ghangpughang Asa naw Judah khaw avan ung ng’thu k’bäi ne ak thäh gui cu, a chang sing a u kä k’pawih sei, Baasha naw angvongpang nak ah lung gui la sing gui cu Ramah ungka naw avan ami m’kawn vai. Acun gui awn Asa naw Mizpah la Benjamin khopäng Keba mang gaw ung vongpang ne om ci. 23 Asa ghangpughang ah bi phung phung, am gäi nak gui la gawnu gui ang vongpang nak gui avan cu Judah ghangpughang gui ah mawng ca-uk ung guk ah kyak ci. Cun ung phi ani ghi law ne a khaw na sei ng’dääk ci. 24 Asa cu si sei David ah mang gaw, mang gui ah phuh hmun ung phuh ci gui, cun kawn ah a hta Jehoshaphat cu ghangpughang ah kya ba ci. Israel Ghangpughang Nadab 25 Judah ghangpughang Asa ah uknak a kum goi nak ung Ghangpughang Jeroboam ah hta Nadab cu Israel ghangpughang ah kya lawk ci, ani naw kum goi ung uk ci. 26 Ani cu apa ah mäih ah Bawipa cu hnungtuk püi ne katnak bi ne Israel chang gui phi katnak ung hteh püi gui ci. 27 Ahijah ah hta Baasha, Issakha pakhui naw Nadab cu hnungtuk püi ne, ngawn ci, cun cu Nadab la a gakap gui naw Philistia ung Kibbethon mang gaw ami khaai yah ung ah kyak ci. 28 Shin gui ah a kyak cu Judah ghangpughang Asa naw a uknak akum thum nak ung ah kyak ci. Cun ah kyasei Nadab kawn ah Barsha cu Israel ghangpughang ah kya lawk ci. 29 Acun vai am ani naw tün ge ne Jeroboam ah kyong chang gui avan ngawn gui ci. Cun cu Bawipa naw a changshäm prophet Shilon ah kaa Ahijah ung a pyen ah mäih ah Jeroboam ah kyong chang gui cu ami ngawn gui; tumat phi kä pawih ci. 30 Shin ah a kyak cu Jeroboam naw katnak bi ne, Israel gui phi katnak bi sak gui ne, Israel Khanpughi Bawipa am lungshe sak ah hmawk ah kyak ci. 31 Nadab naw a bilawh gui phung cu Israel ghangpughang gui ah mawng ca-uk ung guk ah kyak ci. 32 Judah ghangpughang Asa la Israel ghangpughang Baasha cu ani huham a om mah chuih ng’tu laih laih ci goi. Israel Ghangpughang Baasha 33 Judah ghangpughang Asa ah uknak ah a kum thum nak ung, Ahijah ah hta Baasha cu Israel avan ung ghangpughang ah kya lawk ci, ani naw Tirzah ung kum m’ku lei phli uk ci. 34 Ama ung ghangpughang Jeroboam ah mäm ah ani naw katnak bi ne Bawipa cu hnungtuk püi ne, Israel gui cun phi katnak ung hteh püi gui ci. |
Cho Bible Common Language © Bible Society of Myanmar, 2016.
Bible Society of Myanmar