1 GHANGPUGHANG GUI 13 - Cho Bible Common Language 2016

¹ Bawipa ah thumkhän nak awn Judah ah ka prophet tumat cu Bethela ah hteit ne sonkiang ung douthak khai ah Jeroboam ang düih yah ung gawk lawk ci.

² Bawipa ah thumkhän ah mäih ah Prophet naw sonkiang ng’shäu ci, “O sonkiang, sonkiang, shin cu Bawipa ah ng’thu pyen nei: Josiah ang ming ami sui vai ah ak hmaw cu David ah kyong khui ung ng’tüi lawk khai nei. Khogam ah sonkiang khan ung ng’bik ci gui ah taigü gui cu nang ah khan ah ani naw ngawn gui khai, ani naw chang ah guh gui cu nang ah khan ah m’khih khai.”

³ Prophet naw k’täi ne pyen ba ne, “Shin ah sonkiang cu ng’phye ne ng’gäi khai, acun ah khan ungka m’vut gui cu ng’phyang yawp khai. Cun kawn ah kei ung Bawipa naw ng’thu pyen ciah nang naw na hmat khai.”

⁴ Ghangpughang Jeroboam naw cun cu ng’ya neta, ani cu a kut awn tawk ne, “Shin ah chang cu pha vä” cik ci. Acun vai am ghangpughang ah kut cu k’shum sei kä va saw ba hlawt ci.

⁵ Ang ghit ah sonkiang cu ng’phye ne ng’gäi ne, m’vut gui kya law yawp ci, cun cu prophet naw Bawipa ah ming ung angcäi ah mäih ah kyak ci.

⁶ Ghangpughang Jeroboam naw prophet pyen nak ci, “Na bä ne, Bawipa, na Khanpughi ah nak taigü peä, ka kut ana khan sak vai ah nak thäh peä!” Prophet cu Bawipa ah taigü khäta, ghangpughang ah kut cu khan ci.

⁷ Cun kawn ah ghangpughang naw prophet a pyen nak cu, kei awn a täng ah ka im ah law ä, a i baw mi ei kaw. Nang ah na bi ah phäh ah kei naw ka ning m’cümhnah khai nei” cik ci.

⁸ Prophet naw m’shang ne, “Nang naw na khawh a teih ah na nak pai tu vai ung phi nang awn a täng ah kä ka hteit tuk khai, nang awn a i phi kä ka ei awk khai.

⁹ Bawipa naw na thumkhän ci, a i phi kä ka ei awk vai, ka law nak ah lam ung kä ka hteh ba vai.”

¹⁰ Cun ah kyasei ani cu a law nak ah lam ung kä hteit ba ne, a lam hei ung hteit ba ci.

Bethela ung Prophet Ghipa

¹¹ Cun ah khin ung Bethela ung prophet ghipa tumat om ci. A hta gui naw, Judah ah ka lawk ciah prophet naw cu hnüüp ung Bethela ung bii a bi la Ghangpughang Jeroboam a pyen nak gui cu ani am m’thein ci gui.

¹² Prophet ghipa naw, “Ani a hteh ba ung a i lam ung ang a hteh ba” cine ng’shi gui ci. Ngami naw lam cu m’thein ci gui.

¹³ Ani naw ng’sela ung ngoh nak ami pyan pek vai pyen ci, acun ah pyan be u sei, ng’se cu ng’cum ne,

¹⁴ Judah ah ka lawk ciah prophet ah hteh nak ba ah lam ung hteit neta, oak sing ghing ah ka ah ana ngo sei hmuk ci. Ani naw, “Nang cu Judah ah ka prophet ang?” cine ng’shik ci. Cun ah chang naw, “Ä! kei nei” cik ci.

¹⁵ Ani naw, “Im ah law ne, kei awn a täng ah ei ei law ä” cik ci.

¹⁶ Cun ung phi Judah ah prophet naw m’shang ne, “Nang awn a täng ah na im ah kä ka hteit tuk khai, nang ah na khinchah nak phi kä ka dou khai. Shin ung a i phi nang awn a täng ah kä ka ei awk khai,

¹⁷ a i ah kyasei ci ung Bawipa naw na thumkhän ci, a i phi kä ka ei awk vai, ka law nak ah lam ung kä ka hteh en ba vai.”

¹⁸ Bethela ah ka prophet naw pyen ah ne, “Kei phi nang ah mäih ah prophet nei, Bawipa ah thumkhän ung khanchang naw ana pyen nak cu, nang cu ka im ah ka mät awn a täng ah ning hteh püi ne ka ning khincha nak vai ah kyak ci” cik ci. Cun ung phi prophet ghipa cu a hleei ah kyak ci.

¹⁹ Cun ah kyasei Judah ah prophet cu prophet ghipa ah im ah hteit tu ne, ani awn a täng ah ei ei tuk ci.

²⁰ Ngami cu ei vai ne ami ngoh law sangung Bawipa ah ng’thu cu prophet ghipa ung lawk ci,

²¹ Ani naw Judah ah ka prophet ah ma ah m’lau ne, Bawipa naw pyen ci, nang naw angthu kä ngai ne, a thumkhän kä na bik ci.

²² Ei kä na ei en nak vai ah a ning k’bäi nak ah hmun ung hteit ba ne ei na na ei ci. Acun ah phäh ah nang cu ning ngawn khai gui, na pumsa cu na kyong ungka gui ah ng’cim hmun ung kä ning phuh khai gui.

²³ Ei ami ei kawn ah prophet ghipa naw Judah prophet ah phäh ah ng’se ung ngoh nak vai pyan pe sei,

²⁴ ani cu ng’cum ne hteit ba ci. Lam ung phongkawng naw hmu neta lou ci. Apumsa cu lam ung ng’yän ci, ng’se la phongkawng cu a pei ah ng’düi ci goi.

²⁵ Chang gui naw acun cu sun ne hteit u neta, lam ung apumsa ng’yän sei, a pei ah phongkawng ng’düi sei hmuk ci gui. Ngami cu Bethela ah hteit u ne ami hmuh cu pyen ci gui.

²⁶ Prophet ghipa naw cun ah mawng ng’ya neta a pyen cu, shin ah prophet cu Bawipa ah thumkhän kä ngai ciah kyak ci nei! Cun ah kyasei Bawipa naw a bi vai ah a pyen ah mäih ah phongkawng cu ani tu ne lou khai ah a tüih law ah kyak ci.

²⁷ Cun kawn ah ani naw a hta gui pyen nak ci, “Kei ah phäh ah ng’se ung ngoh nak cu na pyan pe vä” cik sei, ngami naw pyan pek ci gui,

²⁸ ani cu k’se ng’cum ne hteit neta, prophet ah a pum cu lam ung ng’yän sei, a pei ah ng’se om ci, phongkawng phi ng’düi lä sei hmuk ci. Phonkawng naw chang phi kä ei ci, ng’se phi kä lou ci.

²⁹ Prophet ghipa naw changsi cu kaw ne, ng’se ung taih ne, Bethela ah hteh püi ba neta, thüi kyap ne phuh ci.

³⁰ Ani naw cun cu amät ah kyongkhui ng’cim hmun ung phuh ci, ani la a hta gui cu thüi kyap u neta, “O Ka phäi hta, ka phäi hta!” cik ci gui.

³¹ Ami phuh kawn ah prophet naw a hta a pyen nak gui cu, “Kei ka sih ah a kyak ung, shin ah phuh hmun ung nami na k’phuh vai, ani ah pei ah ka pumsa nami na k’phuh vai.

³² Bethela ung sonkiang hnungtuk ne Bawipa ah thumkhän ung ani ah pyen ah ng’thu gui, la Samaria gawnu gui ung khawihnah nak ah hmun avan hnungtuk püi nak cu akcang ah bä lawk khai nei.”

Jeroboam ah Nuuipai ciah Katnak

³³ Israel ghangpughang Jeroboam cu tu ä akshe abi nak ungka naw kä ng’hlat law ba ci, ani naw k’täi ne amät ah cawh ah sonkiang ung bii bik khai gui ah taigü gui cu kyongkhui düt ungka ghü gui ci. Ani naw taigü ah kya hlük ci phung phyuh theh nak pek ci.

³⁴ Shin ah katnak naw ani dishum sak ne a mangshon avan dishum nak ung gawk sak ci.