1 GHANGPUGHANG GUI 12 - Cho Bible Common Language 2016

Asiiptäng Pakhui gui Ng’küknet ci gui

¹ Rehoboam cu Shekhem ah hteit ci, a cu ah a siiptäng ah om ciah Israel gui ami van ng’bum u ne, ani cu ghangpughang ah hmoh ci gui.

² Nebat ah hta Jeroboam, Ghangpughang Solomon phyawn nak vai ah dawng ci naw cun ah mawng cu ng’ya neta, Egypt ah ka law ba ci.

³ A siiptäng ah om ciah chang pakhui gui naw ani ah chang tüi u neta, ngami ami van cu Rehoboam ah hteit u neta, ami pyen nak cu,

⁴ “Napa Solomon naw akghat ah na om püi gui ne, kami khan ah phuih gih gui taih ci. Nang naw cun ah phuih gih gui yaang sak ne, kami ghin nak bä law pi khai ah na bi ah a kyak ung, keimi cu nang ah bekhüt ciah chang ah kami kyak khai.”

⁵ Ani naw m’shang gui ne, “A hnüüp thum ung law ba ä, kei naw a mawng ka ning m’hlan khai nei ci sei cun kawn ah ngami hteit ba ci gui.

⁶ Ghangpughang Rehoboam naw, apa Solomon ah aka ah täpang ne bii bi man ci gui ah angvai gui cu khü gui neta, “Shin ah chang gui ka m’shan nak gui vai ah, a i cha ni mä nami na m’cäi m’ä kaw?” cine ng’shi gui ci.

⁷ Ngami naw m’shang u ne, “Nang naw shin ah chang gui cu akni ah na m’htei gui hlü ah a kyak ung, ngami naw ami k’thäh cu yeikyai nak vai pe gui ä, ngami naw ang’täi sei bekhüt ne na bii bik khai gui nei” cik ci gui.

⁸ Cun ung phi ani naw angvai gui ah m’cäi m’ä cu nawng en ne, ani awn thawn law ät ci gui, tuhbäi ani ah tängpang chang gui chang nong gui ah hteit neta,

⁹ Ani naw ng’shi gui ne, “Kei naw ka bilawh vai cu a i cha ah nami na m’cäi m’ä khai ang? Ami phuih yaang sak gui vai ah nak thäh lawk ciah chang gui ah ma ah a i hawkcha ka pyen khai ang?” cine ng’shi gui ci.

¹⁰ Ngami naw m’shang u ne, “Shin cu nang naw na m’thein gui vai cu: ‘Kei ah ka kut hta cu kapa ah khei ah ta shah tuba ci!’

¹¹ Kapa naw phuih gih ning phuih sak gui ci; kei naw gih pi ci ka ning phuih sak gui khai, ani naw htung cih awn ning that gui ci, kei naw htungtawn awn ka ning that gui khai!” na ci vai cik ci gui.

¹² Hnüüp thum lüng khäta Jeroboam la chang gui avan cu Ghangpughang Rehoboam naw am cäi gui ah mäih ah ani ah om nak ah law ba ci gui.

¹³ Ghangpughang naw ang vai gui ah m’cäi cu a i ah kä ngai ne chang gui cu ak ghat ah ng’thu püi gui ci,

¹⁴ Chang nong gui ah m’cäi tu ah mäih ah ani naw bik ci. Ani naw pyen ci, “Kapa naw phuih gih ning phuih sak gui ci; kei naw gih pi ci ka ning phuih sak gui khai. Ani naw htung cih awn ning that gui ci, kei naw htung tawn awn ka ning that gui khai.”

¹⁵ Shin cu Bawipa ah angyak hlü ah Shilon ungka prophet Ahijah ung Nebat ah hta Jeroboam am ng’thu am thein a law püi ah kyak ci. Cun ah kyasei ghangpughang naw chang gui cu a i ah kä a tä gui ah kyak ci.

¹⁶ Chang gui naw ghangpughang naw a i ah kä a ngaih gui cu hmu u neta, m’lau ci gui, “David la akyong chang cu nawng gui vä! Ngami naw mikmi ah phäh a i ang ami na bi pek gui man? Israel chang gui, mi im ah mi hteit ba khai nei! Rehoboam naw amät naw amät teng sä!” Cun ah kyasei Israel chang gui naw hnungtuk püi u ne,

¹⁷ Rehoboam cu Judah khopäng ung om ciah chang gui bäng ah ghangpughang ah kyak khai ah hteh tak ci gui.

¹⁸ Cun kawn ah ghangpughang Rehoboam naw Adoniram, ami chang ghüh gui ah ng’vaihta cu Israel gui ah tüi ci, cun ung phi ngami naw lung awn vawi ne ngawn ci gui. Acun vai am Rehoboam cu ang ghit ah a yatha ung ng’cum ne Jerusalem ah dawng ci.

¹⁹ Acun ung tün ne a siiptäng Israel uknak khaw ung chang gui naw David ah mangshon cu hnungtuk khüknet ci gui.

²⁰ Israel chang gui naw Jeroboam Egypt kho ah ka a law ba ng’ya u neta, ani cu khü ne chang gui awn ng’hmuh püi u ne, Israel ghangpughang ah hmoh ci gui. Judah pakhui bäng cu David ah hta ng’shon ung bekhüt ne om ci gui.

Shemaih ah Ng’cäi nak

²¹ Rehoboam cu Jerusalem ung a gawk law sang ung Judah la Benjamin pakhui ungka gakap anipi 180, 000 cu a täng ah law püi gui ci. Ani naw a siiptäng ah Israel pakhui gui cu tu ne khäm vai ah ngaih-tüh ci.

²² Cun ung phi Khanpughi naw prophet Shemiah cu pyen nak ci,

²³ Shin ah ng’thu cu Rehoboam la Judah la Benjamin pakhui chang avan am m’thein gui vai ah kyak ci:

²⁴ “Namät ah phäi nau gui Israel chang gui cu kä na ng’tuk püi gui vai. Nami van im ah hteit ba vä. Kya lawk ci phung cu kei ah ka ng’yak hlü ah kyak ci nei.” Ngami ami van naw Bawipa ah thumkhän cu ngai u ne ami im ah hteit ba ci gui.

Jeroboam naw Bawipa Hteh Tak ci

²⁵ Israel Ghangpughang Jeroboam naw Ephraim kho gui ah Shekhem gawnu cu ng’vongpaang ne, a cu ah a shäng om ci. Cun kawn ah acun cu hteh ta ne Penuela gawnu cu vongpaang ci.

^26-27 Ani cu amät ng’htau ne, “Tuhbäi ung, kei ah ka chang gui cu Jerusalem ah hteit u ne, a cu ah Taigüim ah Bawipa am khawihnah nak ami douthak ah a kyak ung, ngami cu Judah ghangpughang Rehoboam täng ah ami m’lung hlaih sei, kei cu na ngawn khai gui” cik ci.

²⁸ Cun ah ang ngaih-tüh kawn ah, ani naw vantang-gup hnih cu ghui awn pyang neta, a chang gui cu pyen na gui ci, “Nangmi cu Jerusalem ah khawihnah vai ah nami hteh nak shou law pyi ci. Israel chang gui, shin goi cu nangmi Egypt khaw ah ka ning law püi ba gui ciah nami Khanpughi goi ne! cik ci.

²⁹ Ani naw vantang-ghui gup tumat cu Bethela ung tha ne, a hei tumat cu Dan ung tha ci.

³⁰ Cun ah kyasei chang gui cu hma ka u ne, Bethela la Dan ung hteit ne khawihnah ci gui.

³¹ Jeroboam naw phi khomhtung-lai gui ung khawihnah nak ah hmun gui co ne, Levi pakhui ungka ah kä kyak ciah kyongkhui gui ungka taigü gui cu ghü gui ci.

Bethela ung Khawihnah nak cu M’shukchak ci

³² Jeroboam naw yumnak ah mangpawi cu acha cheit ah hnüüp gha lei hma ung bi vai ah k’bäi ci, cun cu Judah ung pawi ah mäih ah kyak ci. Bethela ah sonkiang ung amät ah pyan ah ghui vantang-gup gui am khawihnah nak cu douthak ci, ani naw a cu ah Bethela ung a cawh ah khawihnah hmun ung bii bik khai ah taigü gui phi tha gui ci.

³³ Ani naw am hnüt nak ah hnüüp ah kyak ciah a cha nak ah a hnüüp gha lei hma ung, ani cu Bethela ah hteit neta pawi abi sangung, sonkiang ung khawihnah nak cu douthak ci, cun cu Israel chang gui ah hmawk ah ani naw akbäi ah abi ah pawi ah kyak ci.