1 GHANGPUGHANG GUI 11 - Cho Bible Common Language 2016

Solomon naw Khanpughi Ng’Hlah Tak ci

¹ Solomon naw a khawhei chang hnumi gui akda m’hni gui ci. Ani naw Egypt ghangpughang ah hta hnumi bäng ah kä kyak ciah Hittite hnumi gui la Moab ah ka, Ammon, Edom la Sidon ah ka hnumi gui phi chu na gui ci.

² Bawipa naw Israel gui cu shin ah chang gui awn kä ami ng’chungla vai ah thumkhän gui sei phi ani naw chu na gui ci, a i ah kyasei ci ung cun gui naw Israel gui a ami bekhüt nak cu a hei khanpughi gui täng ah ng’hlah püi sak ci.

³ Solomon naw manghta phia chih chu nak ci, cun kawn ah a chu ba phi phia thum lawk ci. Cun gui naw ani cu Khanpughi ng’hlah ta sak ci gui,

⁴ ani a ghi law kawn ah ngami naw ani cu a khawhei khanpughi gui khawihnah nak ung luh püi sak ci.

⁵ Ani naw Sidon ah Khanpughi hnumi Astarte la Ammon ah shemshai ciah Khanpughi Molek cu khawihnah ci.

⁶ Ani cu Bawipa hnungtuk ne cheishoh ne apa David ah mäih ah ani ung kä ng’düng ba ci.

⁷ Ani naw Jerusalem ah ak kyang khomhtung khan ah shemshai ciah Moab khanpughi Chemosh khawihnah nak vai la Ammon ah Shemshai ciah khanpughi Molek khawihnah nak vai ah hmun cu co ci.

⁸ Akhaw hei chang akchu gui naw ami khanpughi gui tui ng’ui m’khih nak la khawihnah nak ami douthak nak vai ah ani naw khawihnah nak vai ah hmun phi co ci.

^9-10 Cun ung phi Bawipa, Israel Khanpughi cu Solomon ah ma ah hnih vei ng’dang neta a khaw hei khanpughi gui kä ami khawihnah vai ah thumkhän ci, Solomon naw Bawipa cu kä ngai ci, ani ungka naw a hei ah ng’hlat ci. Cun ah kyasei Bawipa naw Solomon ah khan ah m’lungshe neta

¹¹ a pyen nak cu, “Nang naw nang la kei ah thukhän cu akcang ah na m’shet ci, ka thumkhän gui kä na läk ci, kei naw shai ka tak cu, nang ah na uknak khaw cu kei naw ka lak khai, na bawi gui ungka tumat am ka pek khai.

¹² Cun pang ung phi napa David ah phäh ah nang na ghin yah ung cun cu kä ka bik khai, na hta naw a uk yah ung cun cu ka bik khai.

¹³ Cun ung phi cun ah uknak khaw avan cu nang ungka kä ka lak khai; cun nak vaisü ung, ka changshäm David ah phäh la ka mät ah ka vai ah ka pyan Jerusalem mang gaw ah phäh ah kei naw ani am pakhui tumat ka nawng pek khai.”

Solomon ah Ga gui

¹⁴ Cun ah kyasei Bawipa naw Edom pahta ungka Hadad am Solomon cu hnungtuk püi sak ci.

^15-16 Kä shin pha ung a cau, David naw Edom tu ne a näng yah ung, ani ah gakapbawi Joab cu aksi gui k’phuh khai ah a cu ah hteit ci. Ani la a chang gui cu Edom ah cha chuk om ci gui, cun sangung ngami naw Edom ung pami phung ngawn ci gui,

¹⁷ Hadad la apa ah Edomit changshäm gui, Egypt ah dawng ci gui bäng phyawng ci gui. Cun sangung Haded cu a hmaw hta ah kyak ci.

¹⁸ Ngami cu Midian nawng shüt ne Paran ah hteit ci gui, acu ah chang amshah gui ana ng’dawn lawk ci gui. Ngami cu Egypt ah gawk u ne ghangpughang ah hteit u sei, ani naw Hadad am khaw ni, im ni, ei vai nei pek ci.

¹⁹ Hadad cu ghangpughang awn ng’khawt sheng ni neta, ghangpughang naw akchu ah nau, ghangpughangnu Tahpenes ah nau cu Hadad am chu na sak ci.

²⁰ Ani cu pami hta ah hta ci, Kenubath ah aming sui ci gui, ani cu ghangpughangnu naw mang im ung om tu püi sei ghangpughang ah hta gui awn a täng ah om tuk ci.

²¹ David sik ci, gakapbawi Joab phi sik ci, cicu Egypt khaw Hadad law khäta, Hadad naw ghangpughang cu pyen nak ci, “Ka mät ah khaw ah ka hteit ba khai nei” cik ci.

²² Ghangpughang naw, “A i ah kyasei ang? A i baw ka ning pek vai häu ci om ne ang? A i ah phäh ah na im ah na hteh ba hlü ang? Hadad naw ghangpughang am, “Na hteh ba sak ä” ci neta, ani cu a khaw ah hteit ba ci. Hadad cu Edom ung ghangpughang ah kya ne, Israel ah ga akshe ah kyak ci.

²³ Khanpughi naw Eliada ah hta Rezon am phi Solomon cu hnungtuk püi sak ci. Rezon cu amät ah bawi Zobah ghangpughang Hadadezer ungka dawng neta,

²⁴ bung ah om ci gui ah ami ng’vai ah kya lawk ci. (Shin cu David naw Hadadezer cu hnim ne, ng’khawt ci gui ah Sirian gui a ngawn gui kawn ah kyak ci.) Rezon la a chang gui cu Damaskas ah hteit ne om ci gui, a cu ah ani cu Siria ghangpughang ah m’hmoh ci gui.

²⁵ Ani cu Solomon a ghin ah chuih Israel gui ah ga ah kyak ci.

Jeroboam ung Khanpughi ah Shaitak

²⁶ A hei tumat Ghangpughang Solomon hnungtuk püi cicu amät ah bawi, Ephraim khaw Zeredah ungka Nebat ah hta Jeroboam ah kyak ci. Anu cu hmeinu Zeruah ah kyak ci.

²⁷ Shin cu hnungtuk nak ah mawng ah kyak ci. Solomon cu Jerusalem ah a kiangtäng ah m’dek k’be ne om ne, mang gaw k’paang gui phi pyang ci.

²⁸ Jeroboam cu changnak ciah chang nong ah kyak ci, ani naw tha na ne a bilaw cu Solomon naw hmu neta, Ephraim la Manasseh pakhui khawpäng ung ami chang ghüh gui avan uk khai ah tha ci.

²⁹ Hnüüp ät ung, Jeroboam cu Jerusalem ah ka a law lam ah Shilon ah ka prophet Ahijah naw khaw ng’pyäu ung lam ah amät ng’hmuh püi ci.

³⁰ Ahijah naw a sui ng’lung ah suinu akthai cu suut neta, gha lei goi ah k’teek ci,

³¹ Cun kawn ah Jeroboam cu pyen nak ci, “Teh gha cu na mät ah hmawk ah na lak vai, a i ah kyasei ci ung Bawipa Israel Khanpughi naw ning pyen nak ci, ‘Kei naw Solomon ah uknak khaw cu ka lak law pek khai, cun kawn ah nang am pakhui gha ka ning pek khai.

³² Solomon naw pakhui tumat cu k’pang khai, cun cu ka changshäm David ah hmawk la Israel khaw avan ungka, ka mät ah kaa vai ah ka ghü ah mang gaw Jerusalem ah hmawk ah kyak ci.

³³ Kei naw acun ah ka bi lawk khai, a i ah kya se ci ung Solomon naw kei cu na hnungtuk püi ne a khaw hei khanpughi gui a khawihnah ah phäh ah kyak ci: cun gui cu Astarte Sidon khanpughinu; Chemosh, Moab khanpughi; Molek, Ammon khanpughi ah kyak ci. Solomon naw kä na ngai ci; ani naw chei khai ah bik ci, apa David ah mäih ah kei ah ka thukhän gui la thumkhän gui cu kä k’pang ci.

³⁴ Cun ung phi Solomon ah uknak khaw avan cu kä ka lak pek khai, ani a ghin ah hmawk ah cun ah ka bik khai, ani cu ka chang ghü, ka thukhän la thumkhän gui läk ciah kyak ci.

³⁵ Kei naw Solomon ah hta ah uknak khaw cu ka lak khai, nang am pakhui gha ka ning pek khai,

³⁶ cun ung phi Solomon ah hta am pakhui tumat pek vai. Cun ah kyasei kei am na khawihnah nak vai ah ka ghü ah Jerusalem mang gaw ung ka changshäm David ah hta ng’shon awn angtäi sei ka uk sak khai.

³⁷ Jeroboam, kei naw nang cu Israel ghangpughang ah ka ning pyang khai, nang naw khawpäng avan cu na ng’yak hlü ah na uk khai.

³⁸ Nang naw kei cu akbe ah na ng’ngai ne, ka thukhän awn ghing ne, ka changshäm David ah bi ah mäih ah, ka thumkhän ah mäih bi ne, ka ng’yak hlü ah na om ah a kyak ung, kei naw angtäi sei ka ning om püi khai. Kei naw nang cu Israel ghangpughang ah ning pyang ne, nang ah kawn ah na hta ng’shon gui naw ami uk vai cu ng’hteicha khai ah ka bik khai, cun cu David ung ka bi ah mäih ah kyak ci.

³⁹ Solomon ah a hmakat ah phäh ah David ah hta ng’shon cu kei naw ka m’kyuk khai, cun ung phi ang täih ah kä kyak khai.

⁴⁰ Solomon naw Jeroboam cu ngawn khai ah k’tha nak ci, cun ung phi Egypt ghangpughang Shishak ah phyawng ne hteit ne, Solomon a sih güt a cu ah om tuk ci.

Solomon ah Asih

⁴¹ Solomon ah bilawh nü, a om ih, a cüivai nak gui avan cu Solomon ah mawng ung guk ah kyak ci.

⁴² Ani cu Jerusalem ung ghangpughang ah kya ne, kum phli kip ung Israel khaw avan cu uk ci.

⁴³ Ani cu si sei David mang gaw ung phuh ci gui, a hta Rehoboam cu ani ah hnün ung ghangpughang ah ngo ba ci.