1 GHANGPUGHANG GUI 10 - Cho Bible Common Language 2016

Sheba Ghangpughangnu Om Law tuk ci

¹ Sheba Ghangpughangnu naw Solomon ah mingthang cu ng’ya neta m’nüm nak ah ng’shi nak gui awn m’nüm khai ah Jerusalem ah lawk ci.

² Ani naw chang akda khah püi ne, ghui akda, pyülung gui la tui ng’ui gui akda ami phuih sak ah, kala-uk gui law püi ci.

³ Ani naw avan m’hlam yawp ci; ani naw kä akphlan thei vai ah khak aih ci a i kä om hnga ci.

⁴ Ghangpughangnu Sheba naw Solomon ah cüivai nak cu ng’ya ne, a cawh ah mang im cu phi hmu tuk ci.

⁵ Cun ah hnumi naw tawnglang ung ami pyan ah buhmeh gui, a bawi gui ah om nak ah im gui, mang im kyong ah bii k’bi gui ami m’düih m’thawh gui, la täng khai ah ami suisak gui, ei awk nak ung ani ngäng ciah changshäm gui, Taigüim kyong ah ami douthak ah khawihnah nak gui cu hmuk ci. Acun naw ani cu kä ng’ghi hlawt khai ah cäi sak ci.

⁶ Ani naw Ghangpughang Solomon cu pyen nak ci, Nang la na cüivai nak ah mawng ka mät ah khaw ah om ne ka ng’yak cu hman ci nei!

⁷ Cun ung phi kei naw law ne, avan kä ka hmuh pha ung kei naw kä ka yum ci nei. Cunung phi kei naw a teih phi kä ka ng’yak ci kyak ci; nang ah cüivai nak la bühmang nak cu ami na m’thein tu ah ta dämduh pi aih ci.

⁸ Na chu gui cu bä aih ci gui nei! Na changshäm gui cu bä aih ci gui nei, ngami cu angtäi sei na pei ah om ci gui, cüivai ciah na ng’thu cu ng’ya khenggeng ci gui nei!

⁹ Bawipa na khanpughi cu m’tamkhah ä! Ani naw Israel ghangpughang ah ning pyang ne, nang awn a täng ah a om ah phäh ah a i hlawk ah a yeikyai cu m’dang ci nei. A i ah kyasei ci ung ani naw Israel am hni nak cu angtäi ah kyak ci, ani naw nang cu ami ghangpughang ah ning pyang ci, nang naw thukhän la taga nak cu na bi hning ci.”

¹⁰ Ani naw a law püi ah m’cümhnah nak cu Ghangpughang Solomon am pek ci; phia phli kilokram ah däm ciah ghui la tui ng’ui la pyülung akda ah kyak ci. Cun ah hnumi ah pek ah tui ng’ui cu ani naw a gah man ni ciah dämduh pikbäih ci.

¹¹ (Hiram ah htingpaw gui naw Ophira ah ka ghui gui law püi ci gui, acun ah mäih ah juniper sing gui akda la pyülung gui phi law püi ci gui.

¹² Solomon naw sing k’pen gui cu Taigüim la mang im ung ng’pan nak gui vai ah mang ne, tumkhawng ci gui ah phäh ah tingtäng akyaw amkawm gui pyang ci gui. Cun cu Israel ung ami law püi man ni ci ung aknipikbäih ah juniper sing ah kyak ci; cun ah mäih a i yah ung phi kä hmuh ba vai.)

¹³ Ghangpughang Solomon naw Sheba ghangpughangnu am akthäh päng pek ci. Cun kawn ah ami pek ci man ah ami pek law ah m’cümhnah nak cun phi ng’khailang ne ani am pek ci. Cun kawn ah ani la akha püi gui cu Sheba khaw ah hteit ba ci gui.

Ghangpughang Solomon ah Khawh

¹⁴ A kum tä sei Ghangpughang Solomon naw ghui phia phia m’ku lei thum kilokram gah ci,

¹⁵ Cun kawn ah Sumlei chang gui ah peit ah k’phlam gui, ami sumlei nak ung taang lawk ci gui, Arabian ghangpughang gui naw ami pek law gui, Israel khopäng gui ung uktu gui ah pek law gui cu gah ci.

¹⁶ Solomon naw shawi ang kawm nu gui phia goi ah pyang ne, tumat cu ghui kilokram ak chih ci awn vook ci.

¹⁷ Ani naw shawi aläm phia thum phi pyang ci, tumat cu ghui kilokram a goi ci awn vook ci. Ani naw cun ah shawi gui avan cu Lebanon Bung imnu kyong ah tha ci.

¹⁸ Ani naw mangkiang akdäm nu phi pyang ci, avang cu m’vui ha awn pyang ne, avang cu ghui akni awn pyang ci.

^19-20 Mangkiang ung hang kai nak vai ah hlaak khän cuk lawk ci. Hlaak khän ah vang goi vei a mawng päng ung phongkawng ah gup tumat ci om ci, avan ah ng’dawn phongkawng ah gup gha lei goi lawk ci. Mangkiang ah a hnu täng ung vantang ah lu gup om ci, kut taih nak vang goi vei angleng ung phongkawng ah gup goi om ci. A hei a u ah uknak khaw ung phi cun ah mäih mangkiang kä om man ci.

²¹ Solomon ah a awk nak ah khap gui avan cu ghui awn pyan ah kyak ci, Lebanon Bung Imnu kyong ah khawh avan cu ghui bäng awn pyan ah kyak ci. Solomon ah khin ung ngui cu a phu kä m’küih u ne, a i ngui phi kä mang ci gui.

²² Ani ung tuinu ung hteit ciah htinpaw gui om ci, cun gui cu Hiram ah htinpaw gui awn a täng ah hteit ci gui. A htinpaw gui cu kum thum ung hnü ät ci law ba ci gui, ghui ni, ngui ni, m’vui ha ni, yawng ga ni, yawng gui ni law püi ci gui.

²³ Ghangpughang Solomon cu a hei ghangpughang gui ah ta bühmang pi ne cüivai pi ci,

²⁴ khaw ah ka ungka avan cu ani ah law hlük ci gui, Khanpughi naw ani am a pek ah cüivai nak cu ng’ngai law hlük ci gui.

²⁵ Lawk ciah chang phung naw m’cümhnah nak law püi ci gui — ngui ni ghui ni, suinu gui, likhim gui, tui ng’ui gui, ng’se la, laa gui pe lawk ci gui. Akum tä sei acun ah pe lawk ci gui.

²⁶ Solomon naw ng’tuk nak yatha phia gha lei phli la ng’tuk nak se phia phia lei goi m’düih ci. Amshah cu Jerusalem ah tha ne, amshah cu mang gaw gui ung tha ci.

²⁷ Ani ah uk sang ung ngui cu Jerusalem ung lung ah mäih ah da ne, cedar sing cu Judah khawng nawi ah sing k’pyou ah mäih ah da ci.

²⁸ Murri la Cilicia ah ka ng’se ami law püi gui cu ghangpughang ah a changshäm gui naw shuum ne bik ci gui.

²⁹ Egypt ah ka yatha gui ami law püi phi shum ci gui. Ngami naw Hittite la Sirian ghangpughang gui cu ng’se gui la yatha gui awn bawm gui ci gui, yatha tumat cu ngui phe 600, ng’se tumat cu ngui phe 150 ah yoi ci gui.