1 GHANGPUGHANG GUI 1 - Cho Bible Common Language 2016

David Ghangpughang Ghi Lawk ci

¹ David Ghangpughang cu ang htei ah ghi law ci, a changshäm gui naw yih akda khuih u sei phi ani cu kä awh hlawt ci.

² Cun ah kyasei a bawi gui naw ani cu pyen nak ci gui, “Bawi awi, nang ning om püi ne ning m’hteihtang khai ah hnumi hta cu kami shui khai nei. Ani naw na pei ah ip ne ning üp awh sak khai nei.”

³ Ngami naw Israel khaw avan ung kyom ciah hnumi hta cu shui u neta, Shunem ung Abishag ng’ming nak ciah hnumi hta cu hmu u ne, ghangpughang ah law püi ci gui.

⁴ Ani cu ang htei ah kyom ci, ghangpughang cu ngäng ne m’htei ci, cun ung phi ghangpughang naw kä yawpawm ci.

Adonijah naw Mangkiang Khäm vai ah K’tha nak ci

^5-6 Tuhbäi Absalom a sih kawn ah, David la Hakkith ah hta Adonijah cu htapami ang vaipi ah kyak ci. Ani cu ang htei ah kyom ci. Ani cu David naw a i ung phi kä am cäi ä man ah kyak ci, ani cu ghangpughang ah kya hlük ci. Ani ung amät ah hmawk ah yatha gui, ng’se gui la ani ngäng ciah ak chang hma kip om ci.

⁷ Ani naw Joab (anu cu Zeruiah) la taigü Abiatha cu niipüi goi sei, ngani naw ng’düih püi vai ah yum ci goi.

⁸ Cun ung phi taigü Zadok, Jehoiada ah hta Benaiah, prophet Nathan, Shimei, Rei la David ngäng ciah chang gui cu Adonijah täng ah kä kya tuk ci gui.

⁹ Hnüüp ät ung Adonijah naw Enrokel tuihta ah pei, Phyu Lung Song ung htome, pat hta la plan ciah sei hta gui awn khawihnah ci. Ani naw a hei David ghangpughang ah hta gui la Judah ah ka ghangpughang ah bawi gui cu, cun ah khawihnah mang ei ung ami law vai ah khü gui ci,

¹⁰ Cun ung phi anau m’shum Solomon, prophet Nathan, Benaiah la ghangpughang ngäng ci gui cu kä khü gui ci.

Solomon cu Ghangpughang ah Hmoh ci gui

¹¹ Cun kawn ah Nathan cu Solomon ah nu Bathsheba ah hteit neta ng’shik ci, “Hakkith ah hta Adonijah naw amät ghangpughang ah am hmoh cu kä na hmat ne ma? Ghangpughang David naw a i phi kä hmat ci!

¹² Na hnun-gui la na hta Solomon ah hnun-gui nak phyawn hlü ah a kyak ung, kei naw ka ning m’shümthein khai,

¹³ Ghangpughang David ah ang ghit ah hteit neta na pyen nak vai, ‘Bawi awi, ka hta Solomon cu nang ah hnün ung ghangpughang ah ngok khai ah akcang ah shai na tak ciah kä kya ne ang? A i hawkcha ah kyasei Adonijah cu ghangpughang ah a kyak law ang?

¹⁴ Nathan naw pyen ba ne, “Nang cu ghangpughang David awn na ni ng’htau yah ung, kei law ne nang ah ng’thu cu ka ning k’püi khai nei.”

¹⁵ Cun ah kyasei Bathsheba naw ghangpughang cu a ih nak kyong ah hteit ne va hmuk ci. Ghangpughang cu anghtei ah ghi lawk ci, Shunem ah ka hnumi hta Abishag naw m’hteihtang ci.

¹⁶ Bathsheba cu ghangpughang ah ma ah m’khukdong khäta, ghangpughang naw, “A i ang na ng’yak hlü?” cine ng’shik ci.

¹⁷ Ani naw pyen ne, “Bawi awi, nang ah kawn ah kei ah hta Solomon cu ghangpughang ah kyak khai ah Bawipa na Khanpughi ah ng’ming ung nang naw kei ung shaitak nak na bik ci nei.

¹⁸ Cun ung phi Adonijah cu ghangpughang ah kya pyi ci, nang naw a i phi kä na hmat ci nei.

¹⁹ Ani naw seipat gui, htome gui la plan ciah seihta gui awn khawihnah ne, douthak nak bi ne, na hta gui, taigü Abiatha, la na gakapbawi Joab cu ei awk pawi ung khü gui ci, cun ung phi na hta Solomon cu kä khü tuk ci.

²⁰ Bawi awi, nang ah hnün ung ngo ba khai ah ghangpughang cu na m’thein gui vai ah Israel chang avan naw ning ngäng ci gui nei.

²¹ Cun ah kä na bi ah a kyak ung, nang na sih vai am ka hta Solomon la kei cu kä bekhüt ciah pyen ne na pha goi khai gui nei.”

²² Ani cun ah ang htau sang ung Nathan cu mang im kyong ah gawk lawk ci.

²³ Prophet a gawk law cu ghangpughang am m’thein u khäta, Nathan cu kyong ah lut law ne ghangpughang ah ma ah m’khukdong ci.

²⁴ Cun kawn ah ani naw, “Bawi awi, Adonijah cu nang ah hnün ung ghangpughang ah ngok khai ah nang naw na ng’shäu ne ma?

²⁵ Tuhngawi ani hteit ne seipat gui, htome gui la sei akplan hta gui awn khawihnah ne douthak ci nei. Ani naw na hta gui avan, na gakapbawi Joab la taigü Abiatha cu khü gui ci, tuhbäi chü ngami cu akshaw ghing sä!” cine m’lau ci gui nei.

²⁶ Cun ung phi bawi awi, kei ni, taigü Zadok ni, Benaiah ni, Solomon ni gui cu kä na khü gui ci.

²⁷ Bawi awi, shin gui avan cu nak bäi ne ma, nang ah hnün ung ngok khai ah ghangpughang cu na bawi gui am phi kä na m’thein ne ma?

²⁸ Ghangpughang David naw pyen ci, “Bathsheba a law vai ah pyen vä” — cisei ani law ne a pei ah ng’düi ci.

²⁹ Cun kawn ah ani am, “Ka khüikha nak avan ungka, na gung ciah, ghing ciah Bawipa ung shai ka tak ci,

³⁰ Cun ah hnüüp ung Israel Khanpughi Bawipa ah ang ming awn nang ung ka bi ah shaitak cu ka k’pang khai nei, cun ah kyasei na hta Solomon cu kei ah hnün ung ghangpughang ah ngok khai nei.

³¹ Bathsheba naw m’khukdong neta, “Ka bawipa ghangpughang cu angtäi ah ghing ne om sä! cik ci.

³² Cun kawn ah David ghangpughang naw Zadok, Nathan la Benaiah ni cu k’thäh gui ci. Ngami law u khäta,

³³ a pyen nak gui cu, “Ka yungbawi gui la gui ne, ka hta Solomon am ka ng’sela ng’cum sak ne, Kihon tuihta pei ah hteh püi vä,

³⁴ A cu ah ani cu Israel ghangpughang ah kyak khai ah Zadok la Nathan naw phyuh theh khai goi. Cun kawn ah phyungheng tum ne m’lau khai gui. “Solomon ghangpughang cu akshou ghing sä!”

³⁵ Ani cu kei ah mangkiang ung ngok khai ah a law ung nami läk law vai nei. Ani cu ghangpughang ah kya ne kei ah hnün ung ngok khai, a i ah kyasei ci ung ani cu kei naw Israel lah Judah ah uktu ah kyak khai ah kei naw ka ghü pyi ah kyak ci.”

³⁶ Benaiah naw, “Acun ah bi vai nei, na Khanpughi Bawipa naw k’bäi khai nei.

³⁷ Bawipa naw nang bawi a ning om püi ah mäih ah Solomon cu om püi khai nei, ani ah uknak cu nang ah ta bämang pi khai ah ani naw bi pek khai nei.”

³⁸ Cun ah kyasei Zadok, Nathan, Benaiah la mang im ngäng gui naw Solomon cu ghangpughang David ah ng’sela ung ng’cum sak neta Kihon tuihta ah hteh püi ci gui.

³⁹ Zadok naw Bawipa ah om nak ah Phung ungka a law püi ah olive-situi cu la neta Solomon cu phyuh theh ci. Ngami naw phyungheng tum u ne, chang gui ami van m’lau u ne, “Solomon ghangpughang akshaw ghing sä!” cik ci gui.

⁴⁰ Ngami ami van naw ani cu läk u ne, phyung lawi tum ne, yei ne m’lau u ne, kho ng’lei thüng sei m’lau ci gui.

⁴¹ Adonijah la ak khin gui ami van cu ami ei awk ng’pyi ci, ngami naw cun ah k’aw gui cu ng’yak ci gui. Joab naw phyungheng cu ng’ya neta, “Manggaw avan ung pamcam ci gui cu a i gui ang? ci nei ng’shi gui ci.

⁴² Ani naw ng’thu kä a pyen pha yawp ung taigü Abiatha ah hta Jonathan cu gawk law khäta, Adonijah naw, “Kyong ah lut law ä, nang cu chang ni ah na kyak ci, — nang naw thu k’ni na law püi khai” cik ci.

⁴³ Jonathan naw, kaa ne, David ghangpughang naw Solomon cu ghangpughang ah hmoh pyi ci nei.

⁴⁴ Ani naw Zadok, Nathan, Benaiah la mang im ngäng gui cu ani m’htei khai gui ah tüi gui ci nei. Ngami naw ani cu ghangpughang ah ng’sela ng’cum sak ci gui.

⁴⁵ Zadok la Nathan naw Kihon tuihta ung ani cu ghangpughang ah phyuh theh ci goi, Ngami cu mang gaw kyong ah lut u ne, yei ne m’lau u sei, tuhbäi chang gui thüghak ci gui. Cun cu nang naw na ng’yak ah kyak ci.

⁴⁶ Solomon cu tuhbäi ghangpughang nei.

⁴⁷ Cun kawn ah phi mang gaw bawi gui cu ami bawipa, David ghangpughang chang m’sui khai gui ah hteit u neta, a nang ah Khanpughi naw Solomon cu nang ah ta mingthang pi khai ah pyang sä, Solomon ah uknak cu nang ah ta bämang pi sä! David ghangpughang cu a ih nak ung khawihnah neta,

⁴⁸ taigü ci, ‘Israel Khanpughi, Bawipa cu mi m’tamkhah khai nei, ani naw kei ah ka hta ng’shon gui ungka tumat cu, kei ah hnün ung ghangpughang ah ngoh sak ci nei, acun ka hmuk khai ah kei cu na ghin sak ci nei!”

⁴⁹ Adonijah ah khin gui cu kyih u neta, ami van ng’düi law ba ne ami lam phäh phäh ung hteit ba ci gui.

⁵⁰ Adonijah naw Solomon cu kyih aih neta Bawipa ah om nak ah Phung ah hteit ne sonkiang ah akit gui cu k’pang ci.

⁵¹ Solomon ghangpughang am m’thein law cu, Adonijah naw ani cu kyih aih neta, sonkiang ah kit gui k’pang neta a pyen cu, “Ak htükbäih ah Solomon ghangpughang naw, kei am sihnak kä na pek khai ah ng’thu akbäi vai ka ng’ya hlük ci nei” cik ci.

⁵² Solomon naw m’shang ne, “Ani cu a bekhüt ah a kyak ung alumu ng’ma ät phi a i naw kä tawn khai, cun ung phi kä a bekhüt läi ung sik khai nei.”

⁵³ Ghangpughang Solomon naw Adonijah cu k’thäh ne, sonkiang ungka law püi sak gui ci. Adonijah cu ghangpughang ah law neta ama ah kawp ci, ghangpughang naw, “Na im ah na hteit ba hning ci nei” cine pyen nak ci.